Македонија
Агенцијата за медиумите објави извештај за предизборното претставување

Агенцијата за аудио и аудиовизуелните медиумски услуги денес го објави извештајот од мониторингот на медиумското претставување за претстојните претседателски и парламентарни избори за периодот од 15 февруари до 7 март 2024 година.
Со мониторингот беа опфатени девет национални телевизиски програмски сервиси – МТВ1, МТВ2, ТВ „Алсат-М“, ТВ „Алфа“, ТВ „Канал 5“, ТВ „Сител“, ТВ „Телма“, ТВ „21-М“ и ТВ „24 вести“. Во извештајот се анализирани прилозите во централните изданија на вестите/ТВ-дневникот поврзани со теми за предизборието и со домашните актуелни општествено-политички случувања, како и другите видови емисии од овој тематски делокруг.
Наодите од мониторингот покажаа дека во овој период не се констатирани прекршувања на одредбите од Изборниот законик.
„На програмските сервиси ретко беа забележани новинарските информативни прилози во контекст на партиски предизборни ветувања, а мошне често беа нагласени критичките прилози за постојните, тековни општествено-политички последици од недоволно обмислени, лошо менаџирани политики на претходната и на одредени структурни делови од составот на преодната Влада“, велат од АВМУ.
Забележани се разни степени на новинарска критичка зрелост во односот кон псевдонастаните, што во предизборието, како активен облик на самопромоција, ги организираат партиите и одредени носители на јавни функции во составот на преодната Влада. Без исклучок – сите информативни редакции, доминантно покажаа интерес за темите поврзани со административните лавиринти за замена на документите за лична идентификација, каскадната одговорност за системска негрижа за пациенти со ретки и/или со тешки заболувања и навредливата реторика и политичката некултура во комуникацијата меѓу некогашни носители на јавни функции и медиумските работници.
Информирање за лицата со сетилна попреченост единствено обезбедија МТВ 1 и ТВ „24 вести“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Манасиевски: ССМ сега е против решението за минимална плата кое го бараше додека власт беше СДСМ

Сојузот на синдикатите на Македонија (ССМ) сега е против решението за минимална плата кое го бараше додека власт беше СДСМ, изјави Валентин Манасиевски од ВМРО-ДПМНЕ.
Тој вели дека ССМ самите бараа минималната плата да се усогласува со растот на просечната плата и стапката на инфлација, а тоа се пресметува 50 проценти од порастот на просечната плата и 50 проценти од процентот на индексот на живот, со дополнителен услов, уделот на минималната во просечната плата задолжително да биде над 57 проценти. ССМ ова го договори и го презентираше како историски успех, ВМРО-ДПМНЕ го почитува тоа што синдикатите го договориле со работодавачите.
Но сега, вели Манасиевски, СДСМ не е повеќе на власт, а тие кои го поставија раководството во ССМ, на чело со Трендафилов, и синдикатот сега се користат за пресметка и политичка битка.
Тој оцени дека ССМ се лицемерни и одат сами против себе, само за да исполнат партиска насока на опозициската партија.
Македонија
(Видео) Талески до Тошковски: Кој ќе одговара за пропустите на МВР за трагедијата во Кочани

Пратеникот на СДСМ, Миле Талески, на денешната собраниска седница посветена на пратенички прашања упати прашање до министерот за внатрешни работи, Панче Тошковски, кое се однесуваше на одоворност за пропустите на МВР за трагедијата во Кочани, во која животот го загубија 59 луѓе, а над 200 беа повредени.
Toj ги потенцира сите пропусти на МВР и повика на неселективна истрага и утврдување на одговорноста.
Талески вели дека ваква трагедија, со толку многу жртви и повредени, повикува на неселективна истрага и утврдување одговорност.
„Досега нема одговор на најважните прашања: за потфрлањето на безбедносниот систем, кој е одговорен за пожарот во кобната ноќ и кој дозволи таков настан со присуство на толку луѓе и малолетници. Клучната улога за безбедноста на граѓаните, за сигурноста на јавните собири, за превенцијата и спречување потенцијални настани со огромни последици е во Министерството за внатрешни работи. Затоа ќе поставам прашања до министерот за внатрешни работи, кој раководи со ова Министерство и е најодговорен за неговата работа и постапувањето. Господине Тошковски, механизмите за контрола под надлежност на МВР покажуваат алармантни пропусти непосредно пред и за време на кобниот настан на Бирото за јавна безбедност, на ОВР Кочани и СВР Штип.
Факт 1. Законот за јавни собири јасно наведува дека за собири со повеќе стотици лица – како што беше овој настан со 650 присутни – полицијата има обврска да има оперативни сознанија и да преземе мерки за обезбедување, дури и ако собирот не бил формално пријавен.
Стандардните процедури во вакви случаи вклучуваат 1) формирање на оперативен штаб најмалку во ОВР Кочани, 2) Комуникација со сите СВР за можни ризици и присуство на организирани групи и 3) Превентивно зголемување на полициското присуство.
МВР не подготвила официјален план за обезбедување на настанот, што е стандардна процедура при јавни собири со голем број посетители. Овој пропуст значително ја намалил способноста за контрола и управување со ризици, особено во случај на итни ситуации.
Факт 2. МВР, односно БЈБ, СВР Штип и ОВР Кочани, не направиле ниту план за процена на ризик. Без разлика што немало официјално известување, настанот бил јавно објавен и најавен, а покрај тоа немало комплетен безбедносен план.
Значи МВР – конкретно во Кочани – не постапило по закон. Да постапеше, на местото на настанот ќе имало полиција, противпожарна бригада, брза помош и безбедносен план кој можеше да спаси животи.
Факт 3. МВР е директно одговорно за контрола на процесот на употреба и давање дозвола за користење на пиротехника во затворен простор, што е единствена причина за пожарот, а БЈБ е одговорно за обезбедување на јавната безбедност.
Факт 4. МВР не презел никакви активности за прекинување на настанот кобната вечер, иако непосредно пред случување на несреќата во клубот имало полицајци, ама во 2 часот полноќ. Увиделе присуство на малолетници, присуство на пиротехника, затекнале настан кој се случува непријавено, во клуб за кој биле должни да знаат дека не поседува валидна лиценца и не презеле ништо.
И уште еден факт. По смената на началниците, сопственикот првин го реновирал клубот, па го отворил во ноември, исто така со јавна најава. Немал лиценца, полицајците оделе во акциски контроли во диво кабаре, а не спречиле ништо.
Доколку МВР преку своите ОВР и СВР постапеле по кој било од наведените 4 основи, немало да има ваква трагедија.
Ова го покажува директното непостапување на службениците на МВР, особено Бирото за јавна безбедност и службениците во СВР Штип и ОВР Кочани.
Господине Тошковски, мото прво прашање е: Кој ќе одговара за овие институционални и системски пропусти во МВР? Ама не лани, не пред две години, туку на денот на несреќата, 16 март 2025 година?“, додаде Талески.
Македонија
В недела се враќа студот, наместа ќе паѓа и снег

Денес попладне и во текот на ноќта, во западните, а утре и во источните делови, ќе има повремени врнежи од дожд, наместа пообилни од над 15 литри на квадратен метар.
В сабота ќе има услови за локална појава на нестабилност со пороен дожд, грмежи и засилен ветер.
В недела ќе има брз продор на студена воздушна маса од север и ќе има врнежи од дожд, на планините и на повисоките места снег. Ќе дува засилен северен ветер, температурите значително ќе опаднат и врнежи од снег се очекуваат и во некои од пониските места. В понеделник наместа ќе има провејување слаб снег, а утринските температури на повеќе места ќе бидат негативни.
Потоа следува период на стабилно и постудено време со утрински температури кои насекаде ќе бидат по нулата.
Во Скопје, попладне и во текот на ноќта, ќе има врнежи од дожд, во делови од котлината повремено пообилни (10-15 л/м2). Утре ќе се задржи променливо облачно време со повремен дожд. В сабота ќе има преодно стабилизирање на времето, а в недела ќе биде претежно облачно, ветровито и студено со повремени врнежи од дожд. Во вечерните часови во повисоките делови од котлината ќе има услови за повремен слаб снег.