Општина Центар ги активира банкарските гаранции на правното лице „Графички центар“ ДОО Скопје во стечај врз основа на потпишани договори за отуѓување градежни парцели, кои се дел од детаљниот урбанистички план – локалитет Тетовска Трошарина, во близина на тврдината Кале.

Двата договора „Графички центар“ ги склучил со Министерството за транспорт и врски на 13.11.2012 година. Во согласност со член 4 од договорите, рокот на прибавување одобрение за градење на предвидените објекти бил 9 месеци од денот на запишување на правото на сопственост во Катастарот, односно од 20.12.2013 година.

„Од причина што парцелите се наоѓаат во дел што е од културно и историско значење за градот (тврдината Кале), ‘Графички центар’ склучува договор со НУ Конзерваторски центар за вршење заштитно-археолошки истражувања, кои почнале на 1.9.2014. При истражувањата на парцелите пронајдени се археолошки остатоци од муслимански гробници од 19 век и НУ Конзерваторски центар го известил правното лице дека археолошките истражувања ќе траат 50 дена. Со мислење на НУ Конзерваторски центар, по завршување на археолошките истражувања, остатоците од гробниците треба да се префрлат на градските гробишта во Бутел.
По неколку преписки помеѓу ‘Графички центар’ и Министерството за транспорт и врски и пролонгирања на роковите за добивање одобрение за градење, во мај 2017 година ‘Графички центар’ ДОО оди во стечај“, соопшти Општината.

Со одлука на владата од 18.12.2018 година, неизграденото градежно земјиште во сопственост на државата на територија на општината, по долго време, ѝ било вратено во владение на Општина Центар и предметите формирани врз основа на склучени договори за отуѓување градежно земјиште по пат на јавно наддавање ѝ се предадени на Општината.

Со добивањето на дополнителната документација, а врз основа на договорите, Општината поднела непарично побарување со барање за исполнување на обврските од договорите, парично побарување за наплата на договорни казни поради необезбедно одобрение за градење во предвидениот рок и парично побарување за активирање и наплата на износот од банкарските гаранции за навремено и квалитетно завршување на работите.

Општина Центар се обратила до НУ Конзерваторски центар и добила одговор дека заштитните археолошки истражувања се завршени, но не и дислокацијата на коските, за што се потребни финансиски средства од купувачот на земјиштето, „Графички центар“, за кого, пак, е отворена и веќе се води стечајна постапка. За евентуален почеток на какви било градежни дејства, потребно е да се заврши целата постапка.

„Поради непочитување на договорот и непреземање на договорните обврски на правното лице ‘Графички центар’, Општина Центар ги активира банкарските гаранции за двата потпишани договора за отуѓување градежно земјиште со електронско јавно наддавање и во општинскиот буџет врати вкупно 20.000 евра“, се наведува во соопштението.