Македонија
Активисти симболично запалија ѓубре пред Владата : Се гушиме од отпад и депонии, отруени сме

Активисти од иницијативата „Не биди ѓубре“ и здружението О2 попладнево симболично запалија смет пред Владата за да им укажат на надлежните како се живее во Визбегово и во главниот град, каде чадот е секојдневие.
,,Денешната акција е наменета за Владата, за да видат, ако не виделе до сега, како е да се живее еден ден во скопско Визбегово, а и на многу други места низ земјава каде постојано чури запалено ѓубре, депонии”, велат од Иницијативата О2.
,,Ѓубрето го оставивме пред Влада, чадот од димните машини да осетат како живееме во градов и земјава каде се гушиме, со затворени прозори живееме и лето и зима, отруени сме. Тие што треба да го регулираат отпадот, ѓубрето спијат, ич не им се брза. Немаме ништо од трите РРР – Редуцирај, Реупотреби, Рециклирај, во град со огромен број на индивидуални домови, зелениот отпад, лисја, гранки, завршуваат на Дрисла, наместо да се компостираат.
Се пали онаму каде нема поставено контејнери, каде не се собира редовно. Се пали и таму каде има контејнери. Ѓубре расфрлано насекаде. Мини депонии ко национално обележје”, објавија од Иницијативата О2 на Фејсбук.
Тие се пожалија дека полиција ги легитимирала. ,,Ние сме запрепастени од грижата на МВР за спроведување на Законот за јавна чистота, цитирање на членови, казни изрекување, ама САМО околу Влада и САМО за активисти.Иако им беше кажано дека е повикано возило од Комунална хигиена да го собере ѓубрето, дека преку улица одиме да завршиме со чистењето, не, ако сме се тргнеле од ќесите, ќе нè казнеле, веднаш. И заминавме, казнете нè.Камионот на комунална се појави после неколку минути и ги собра кесите”, укажуваат од О2.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Дел од Сарај и Илинден денеска без струја

Регионалниот центар за управување со кризи на Град Скопје, по добиеното известување од ЕВН Македонија АД, информира дека поради технички зафати во електродистрибутивната мрежа денеска, без електрична енергија ќе останат:
· од 08:30 до 13:00 часот, дел од корисниците од село Кондово, општина Сарај;
· од 08:30 до 15:00 часот, корисниците од ул. 534 и ул. 531 во село Марино, општина Илинден.
Македонија
На Табановце се чека до половина час за влез во државата

Сообраќајот на државните патишта се одвива непречено, по суви коловози, извести АМСМ.
Интензитетот на сообраќај на патните правци надвор од градските средини е умерен. Се бележи зголемена фреквенција на возила на ГП Табановце, времето на чекање за влез во државата е околу 15 до 30 минути. На останатите гранични премини, од македонска страна, нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
СДСМ: Демографија не се подобрува со кампањи, туку со квалитетен животен стандард и јасна перспектива за младите

„Наместо да создава услови младите да останат тука и да формираат семејства, Мицкоски ги брка од државата со зголемување на сиромаштијата и нееднаквоста, без да понуди каква било јасна перспектива за државата. Денес, младиот човек во Македонија е оставен без иднина. Стандардот е уништен. Платите се недоволни, а Мицкоски се заканува со нови даноци. Со вакви политики, за кратко време, тој ќе ги избрка сите од државата“, велат од СДСМ.
„Наместо да понуди современа, хумана и искрена поддршка за младите семејства, тој вели дека ќе ги едуцирал за „семејните вредности“. Демографијата не се решава со кампањи за „семејни вредности“, туку со стабилни и добро платени работни места, достапно и квалитетно здравство и сигурна социјална заштита.
Младите не бегаат затоа што не сакаат да создадат семејство, туку затоа што не можат да си го дозволат. Тоа е директен резултат на промашените и класично десничарски политики на оваа влада. Стандардот е намален за 20%, се богати само елитата околу Мицкоски, а за останатите граѓани нема никаква корист од владините политики.
Ако навистина сакаше да се раѓаат деца во Македонија, ќе се грижеше најпрво нивните родители да бидат сигурни и да ја гледаат својата иднина тука. Таква политика од Мицкоски нема“, соопшти СДСМ.