Македонија
Алијанса за Албанците: Груби призна дека правдата досега била порачана по телефон

Вицепремиерот Артан Груби самиот признава дека правдата била селективна и дека досега таа била нарачана по телефон, велат од Алијансата за Албанците, откако Груби денеска на прес-конференција говорејќи за приоритетите на Владата рече: „на правдата испорачана по телефон и дојде крајот“.
„Груби вели дека ќе се залага за систематизација на администрацијата, за признавање на нивните дипломи, вели дека ќе започнат да ја следат реализацијата на целосната еднаквост, ќе бидат посветени на спроведувањето на законот на албански јазик итн. Овие изјави докажуваат дека досега ништо не е сторено во врска со ова. Ако сега планирате да започнете да ги спроведувате, тоа значи дека не сте започнале во последните 18 години и никој не верува дека сте сериозни. Исто така, тој вели дека не може да има правда за едниот и различно за другиот, различен за политичарите и различен за граѓаните и правдата нарачана по телефон. Парадоксална изјава, бидејќи тој самиот признава дека правдата била селективна и дека досега таа била нарачана по телефон“, велат од партијата на Зијдаин Села.
Оттука додаваат дека никој повеќе не му верува на Артан Груби, па дури ни на Владата.
„Во оваа прилика, ве потсетуваме на времето кога Артан Груби беше партнер на Груевски. По случајот во Кале Скопје, тој изјави дека СДСМ му понудил да создаде етнички проблеми, но тој одбил. СДСМ категорично ја демантираше оваа изјава. До денес не е познато кој изневерил, Артан или СДСМ. Истото денес по оваа конференција, не знаеме кој е во право? Артан со она што го изјави денес, или Заев со она што го рече на неговото експозе.Значи, со еден збор, продолжува дежаву-то на оваа влада, со празни изјави и паушални суми од типот на изјави за албанскиот премиер, додека оние кои ја доживуваат штетата на сопствената кожа, се самите граѓаните“, се додава во соопштението на Алијансата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Гаши имал интестинална опструкција на тенкото црево, неговата состојба е стабилна, соопшти МЗ

Министерството за здравство информира дека претседателот на Собранието, Африм Гаши е во стабилна здравствена состојба.
Тој околу полноќ бил хоспитализиран на Клиниката за дигестивна хирургија со болки во стомакот.
„Веднаш му се направени потребните радиолошки и лабораториски испитувања, утврдена е интестинална опструкција на тенко црево.
Задржан е на болничко лекување и е под постојан лекарски надзор. Во моментот е на конзервативен, медикаментозен третман, без поставена индикација за оперативно лекување“, соопштија од ресорното министерство.
Македонија
Лефков: И Жерновски се појави како бугарска интернет страна хостирана на Бихачка, менаџирана од Софија

„За Mushroom медиуми сме чуле и виделе, ама Жерновски покажа дека постојат и mushroom политичари – без светло, без корен, и со многу влага од минатото. Пропаднатиот градоначалник, амбасадорот на диво се јави со писание за да не запознае дека не се во игра само mushroom страници туку постојат и mushroom политичари, објави на социјалните мрежи пратеникот на ВМРО-ДПМНЕ, Миле Лефков како реакција на претходната објава на Андреј Жерновски.
„МНР на Бугарија најави дека ќе ги ангажира сите ресурси и достапни канали за заштита на бугарските интереси и оп се појави Жерновски како бугарска интернет страничка хостирана на Бихачка, менаџирана од Софија!
Со тоа што се јави Жерновски, сам се пријави. Само уште не ни кажа дали е ресурс, канал или mushroom пропаднат амбасадор!
Жерновски, човек без акредитив, без политичка тежина и без капка авторитет, се појави на сцена како интернет-трол во обид да ме дискредитира – не заради некаква вистина, туку затоа што моите ставови го погодија токму онаму каде што боли: во вистинската насока.
Додека јас предупредував за хибридна закана од Бугарија, неговите партиски другари релативизираа со “параноја” и навреди, ама ден подоцна бугарски медиуми стартуваа уште еден координиран напад. И како по команда – уште еднаш, пак Жерновски, истрошен глумец од маргините на политиката, mushroom политичар, за да ја продолжи прљавата работа дома, со досетка “сум паднал во јамата”, во ред, ајде малку да зборуваме и за јами:
Јама е кога си пропаднат градоначалник кој општината ја претвори во партиски расадник – со роднини и активисти од СДСМ вработени со договори во 4 очи.
Јама е кога одиш во Букурешт како “амбасадор на диво”, без акредитив, без процедура, без достоинство.
Јама е кога цела кариера ја минуваш на грбот на државата, а потоа глумиш досетко-mishroom полотичар со туѓи агенди.
Јама е кога после сè – од пропаднат градоначалник, преку дипломатија на диво, завршиш како обичен интернет трол кој се фаќа за роднини и браќа, оти со аргументи не можеш да се справиш“.
Јас сум пратеник и зборувам во свое име, пишува Лефков во објавата и додава дека не бега од вистината.
„Јас не бегам од вистината – ја кажувам, колку и да не им одговара на некои. А моите роднини не се предмет на јавна расправа. Тоа што некој друг цел живот се криел зад туѓи имиња и привилегии – не му дава право да ги влече моите роднини во калта, затоа што така правел кариера!
Јас зборувам, и ќе продолжам да зборувам за Македонија, без разлика кого тоа нервира – во Софија или во Централен одбор на СДСМ.
А ти, ако баш сакаш да бидеш корисен за некого – прво реши се дали си ангажиран “ресурс” или “канал” за бугарските интереси“.
Упатува како што вели, јавно прашање до Андреј Жерновски:
„Дали со месеци се криеше од МНР бидејќи Романија не ти дозволуваше да ги предадеш акредитивните писма?
„Дали МНР за тој сериозен пропуст дозна директно од романските власти наместо од тебе?
Ако на било кое од овие прашања одговорот е не, јавно и лично ќе му се извинам.
Но ако е да, тогаш ред е тој да им се извини и на институциите, и на граѓаните што на диво ги трошел нивните пари на туризам во Букурешт“, нагласува Лефков.
Македонија
Вработен во болницата во Прилеп си присвоил 2.110.640 денари, пари наплатени од пациенти

Основниот суд во Прилеп донесе правосилна пресуда против службено лице од ЈЗУ Општа болница со проширена надлежност „Борка Талески“ – Прилеп, за сторено кривично дело Проневера во службата, согласно член 354 став 2 во врска со став 1 и во врска со член 45 од Кривичниот законик, соопштија од Управа за финансиска полиција.
Станува збор за случај во кој, како што појаснуваат, во периодот од август 2024 до април 2025 година, вработен во болницата противправно присвоил средства наплатени од пациенти во вкупен износ од 2.110.640 денари.
„Обвинетиот иако ги врати средствата, судот ја утврди вината и му изрече условна затворска казна во траење од две години, која нема да се изврши ако во наредните четири години не стори ново кривично дело.
Овој случај е дел од пошироката истрага на Управата за финансиска полиција, која со месеци го анализираше финансиското работење на прилепската болница и истовремено ја потврдува нашата заложба за борба против корупцијата и злоупотребата на јавни средства“.
Додаваат дека враќањето на парите не ослободува од одговорност, правдата мора да биде еднаква за сите.
„Оштетувањето на јавниот буџет, особено во здравствениот сектор е недозволиво и секој обид за прикривање или игнорирање на вакви постапки претставува закана за довербата на граѓаните во институциите“.