Македонија
Алијанса за Албанците: Да се отворат кафулињата, а полицискиот час да почнува во 23 часот

Полицискиот час да почнува од 23 до 5 часот и да се отворат кафулињата и рестораните, порача Алијансата за Албанците.
Од партијата на Зијадин Села велат дека, за среќа, бројот на пациенти излечени од Ковид-19 се зголемува, додека бројот на нови случаи на заразени лица значително паѓа.
„Врз основа на овој факт, правото на слободно движење на луѓето е ограничено на многу строга мерка без потреба, затоа Алијансата за Албанците предлага мерките во земјата да го означат вториот бран на олеснување, почнувајќи од скратување на полицискиот час од 23:00 до 5:00 часот. Знаеме дека економијата на нашата земја не може да го толерира ова темпо на работа долго време, затоа почитувајќи ги заштитните мерки (дистанца, маски, ракавици) предлагаме да почнеме со отворање на рестораните, кафулињата и сличните бизниси што се затворени поради вирусот“, велат од Алијансата.
Оттука додаваат дека иако туризмот во земјата не е на ниво што треба да биде, сепак, неспорно е дека овој сектор, како и хотелите и транспортот, придонесуваат на економијата на земјата, кои се најпогодени сектори од здравствено-економската криза.
„За 72.743 вработени во овој сектор да можат да ја обезбедат својата егзистенција, барем она што може да го направи владата за најпогодените сектори е да понуди 100% субвенција на придонеси за плати на работниците на ниво на минимална плата за што од државната каса треба да бидат издвоени 15,6 милиони евра“, додава Алијансата.
Според партијата, олеснувањето на мерките за движење, државната помош за погодените сектори и постепеното започнување со работа на бизнисите би биле добра основа за да се спаси кревката економија на земјата од рецесија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ВМРО-ДПМНЕ викендов организира Саем за отчет на градоначалниците

Генералниот секретар на ВМРО-ДПМНЕ, Ѓорѓија Сајкоски, најави дека на 23 и 24 август во хотелот „Холидеј Ин“ во Скопје ќе се одржи Саем – Отчет под мотото „4 години работа за тебе“, на кој градоначалниците од оваа партија ќе го презентираат сработеното во изминатиот мандат.
Настанот ќе почне во сабота во 11 часот со обраќање на претседателот на ВМРО-ДПМНЕ, Христијан Мицкоски. Во текот на двата дена ќе се одржат повеќе панел-дискусии на кои градоначалниците, поделени по региони, ќе ги претстават реализираните проекти.
Секоја општина ќе има и свој штанд на кој граѓаните и новинарите ќе можат директно да се запознаат со постигнувањата на локалната власт.
Во недела програмата ќе продолжи од 10 часот, со панели посветени на темите: „4 години развој и прогрес“, „инфраструктурни инвестиции“, „вклученост на граѓаните во носењето одлуки“ и „меѓународна соработка“.
„Разликата меѓу општините во 2021 и денес е огромна и мерлива. Ветените и реализирани проекти ја покажуваат посветеноста и одговорноста на нашите градоначалници,“ изјави Сајкоски, додавајќи дека со овој отчет ВМРО-ДПМНЕ ја покажува отчетноста и транспарентноста кон граѓаните.
Македонија
ВМРО-ДПМНЕ: Каде испари Венко Филипче

Има ли Социјалдемократскиот сојуз лидер на партијата или на непочнати избори „кормиларот“ го напушти бродот кој тоне? Каде испари Венко Филипче, се крие ли од македонската јавност или сфатил дека се наоѓа пред дебакл и нема што да понуди?, прашува ВМРО-ДПМНЕ преку соопштение.
„Филипче јавноста не го видела цели 20 дена, последен пат во земјава е виден на 2 август за прославата за Илинден во Крушево, а ни претходно нешто не се појавуваше.
Додуша, за волја на вистината, во меѓувреме се појавија фото и видеоснимки како ужива луксузно пловење низ Грција на скапа јахта со неговиот ментор, Зоран Заев за која ни Филипче ни неговата партија, ако е негова, не одговорија со чии пари е купена.
Претходно кога го снема исто Филипче повторно беше со Заев, ама тогаш на друго луксузно патување во Дубаи, од каде што си набавија златни визи, за кои, исто така, не добивме конкретен одговор како се набавени.
Изгледа луксузните забави и бизниси со Зоран Заев на Филипче му се поинтересни и приоритетни, наспроти водењето на партијата.
Или, пак, можеби Филипче уште сега се спрема за дебаклот и големиот пораз кој го чека на локалните избори, па тренира бегање од јавноста?“, се вели во соопштението на ВМРО-ДПМНЕ.
Македонија
Стоматолошката комора: Конечно ќе се разгледаат и нашите докази

Стоматолошката комора на Македонија соопшти дека со одобрување ја примила информацијата оти министерот ги доставил до Обвинителството сите наводни докази за неправилности во работењето на Комората.
„Конечно ќе имаме можност и нашите докази да стигнат пред непристрасна институција и таму да се потврдат нашите тврдења за исправноста во работењето на Комората“, наведуваат од Стоматолошката комора.
Од таму потсетуваат дека дел од доказите веќе се доставени до Јавното обвинителство како пропратен материјал на кривичната пријава која Комората претходно ја поднела против Комисијата за надзор, врз основа на чиј извештај министерот постапил.
Претходно денес, Министерството за здравство соопшти дека целокупната документација и наодите од извештаите на комисиите што вршеле надзор над работата на Стоматолошката комора се доставени до Јавното обвинителство за натамошно разгледување и постапување во согласност со законските надлежности.
До Обвинителството се испратени три извештаи за работата на комисијата за надзор над законитоста при вршење на јавното овластување на Комората, изготвени на 25 февруари, 15 мај и на 21 мај годинава. Дополнително, доставено е и известување од 11 март 2025 година до Стоматолошката комора, како и документација од Секторот за стоматолошка здравствена заштита.
Документацијата, натаму, ќе биде распоредена кај јавен обвинител кој ќе го разгледа предметот и ќе го достави на надлежно постапување на соодветно јавно обвинителство.