Македонија
Али Ахмети: Да се обединиме Албанци, Македонци и други за Европа

Претседателот на Демократската унија за интеграција, Али Ахмети, придружуван од претседателот на Собранието, Талат Џафери, првиот вицепремиер Артан Груби, министри, заменик-министри, директори, како и други соработници, вчера ги продолжи средбите со граѓани и партиски активисти во градот Тетово, поточно во Голема и Мала Речица 1 и 2, Теќе, Сончев Брег и Ван Вардарска.
„Внимателно ги следев соговорниците и забележав дека нема скептицизам во нивните зборови, а тука можам да кажам дека и јас немам скептицизам и не се чувствувам скептик ниту, пак, чувствувам страв бидејќи кој би поверувал пред дваесет години дека ќе имате министер за одбрана Албанец, претседател на парламент, албански министер за надворешни работи, кој претседава со ОБСЕ. Зошто да кажеме дека нема да бидеме успешни? Затоа што не треба да правиме дневни политики, туку долгорочни, добро осмислени и за доброто на граѓаните. Овие средби се во екот на постојаните традиционални средби што ДУИ ги водеше со граѓаните во текот на годините, сега кога ќе се вратам и ќе ги видам записниците на тогашниот генерален секретар, покојниот Абдилаќим Адеми, одржавме 130 средби во рамките на два месеца, така што ова се одрази на животниот век на ДУИ и како процес што недостига беше забележан во времето на короната. Ја пропуштивме оваа комуникација и сега се врати. Дали заедно за Европа ѝ служиме на иднината вака? Дали сме генерацијата што ќе направи чекори напред? Направивме чекор во 2002 година за сите Албанци, да го спроведеме нашиот договор. Сега сме во преговори за членство во Европската Унија, затоа треба да го повикаме народот и да седнеме да разговараме бидејќи многу политички партии, кои досега беа регистрирани и нерегистрирани, вкупно 14 на број, не успеаја да ја победат ДУИ. Затоа сега сакаме да отвориме нова сцена, проевропски фронт, што го забрзува нашето членство во Европската Унија. Овој фронт е помош што го забрзува нашиот пат кон ЕУ, кој мобилизира кон уставни измени. Овој фронт мора да работи и за нашите македонски сограѓани. Македонските публицисти и интелектуалци пишуваат дека сум ја предал македонската кауза. Тоа никогаш нема да се случи бидејќи јас сум бил, сум и секогаш ќе бидам ангажиран во одбрана на каузата на нашите сограѓани, нивниот идентитет, јазик и култура. Не треба да се плашиме кога Албанците се на наша страна, затоа треба заедно да одиме напред, бидејќи бугарското и црногорското малцинство не претставуваат никаква опасност ако се застапени во Уставот на Северна Македонија. Ништо лошо не се случи ниту со Охридскиот рамковен договор или со албанскиот јазик, напротив, Албанците ѝ станаа полојални на својата држава. Албанците денеска се чувствуваат како дома и во своја држава“, истакна претседателот Ахмети.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Започна изградбата на пречистителната станица за отпадни води во Битола

Во општина Битола, денес беше одржан состанок, со кој се означи почетокот на реализацијата на проектот за изградба на пречистителната станица за отпадни води.
Во присуство на претставници на Министерството за животна средина, Министерството за финансии, изведувачот на пречистителната станица конзорциумот Лантаниа-Стентон градба-Карканиас, избраниот надзор- фирмата Ептиса, претставници на КЈП „Нискоградба“ и претставници на општинската администрација, градоначалникот на општина Битола Тони Коњановски, посочи дека овој стратешки еколошки проект е многу значаен чекор кон заштитата на животната средина.
Основната цел на проектот е да се подобри инфраструктурата за собирање и третман на комунални отпадни води, во согласност со директивата за третман на отпадни води и националниот закон. Според договорот, времетраењето на градба е 2 години и една година гарантен период. Со помош на ЕУ, се гради одржлив систем за отпадни води за идните генерации, преку инвестирање во чиста вода и зелени решенија што ќе обликуваат поздрава и поодржлива иднина.
Македонија
Дожд и грмежи вечерва и во раните утрински часови, јавува УХМР

Времето до крајот на денот ќе биде сончево со мала до умерена локална облачност. Ќе дува слаб до умерен, во западните делови западен, а долж Повардарието северен ветер, кој наместа повремено ќе засилува. Кон крајот на денот во северозападните делови облачноста ќе се зголеми и во текот на ноќта и во раните утрински часови ќе има локален дожд, повремено пороен со појава на грмежи и услови за краткотрајно невреме.
Времето утре ќе биде променливо облачно и посвежо, претпладне со повремено пороен локален дожд, грмежи и услови за појава на краткотрајно невреме. Ќе дува слаб до умерен, а наместа долж Повардарието повремено засилен ветер од северозападен правец. Минималната температура ќе биде во интервал од 13 до 22, а максималната ќе достигне од 27 до 35 степеним јавува УХМР.
Во Скопје, променливо облачно, во раните утрински и претпладневни часови со повремен пороен дожд и услови за појава на ретки грмежи. Ќе дува слаб до умерен, попладне во делови од котлината повремено засилен северен ветер. Минималната температура ќе се спушти до 19, а максималната ќе достигне до 33 степени.
Македонија
Тошковски од Охрид: Поголема контрола на водниот појас, зголемена е безбедноста на туристите

Mинистерот за внатрешни работи, Панче Тошковски, оствари работна посета на Секторот за внатрешни работи Охрид, Регионалниот центар за гранични работи Запад и Полициската станица за граничен надзор „Охридско Езеро“.
Притоа ги посети на терен и полициските службеници од СВР Охрид кои патролираат со велосипеди низ градот, како и српските полициски службеници кои и оваа година учествуваат во заеднички патроли во текот на туристичката сезона.
„Во пикот на летната сезона, кога бројот на туристи и возила е драстично зголемен, МВР презема координирани мерки и динамички го адаптира полициското присуство. Во СВР Охрид веќе функционира засилен состав, преку распоредување на полициски службеници и од други сектори, што придонесува за ефикасна покриеност на целиот регион и зачувување на стабилната безбедносна состојба.
Во делот на граничното управување, РЦ за ГР Запад бележи континуирано подобрување на оперативната ефикасност. Податоците покажуваат позитивен тренд во откривање кривични дела, подобра организација на протокот на патници и одржување на стабилен ритам на граничниот сообраќај дури и во најоптоварените часови“, истакна министерот Тошковски, додавајќи дека Охридското Езеро годинава е покриено со значително повисок степен на полициско присуство.
„Обезбедена е поголема контрола на водниот појас, зголемена е безбедноста на туристите, а резултатите од контролните активности покажуваат подобри ефекти од претходните сезони. Видливоста на полицијата во градското подрачје е исто така засилена. Патролите на велосипед, веќе препознатлив белег на СВР Охрид, придонесуваат за побрзо реагирање, директна комуникација со граѓаните и чувство на поголема сигурност во јавниот простор. Присуството на српските полициски службеници, како дел од мешовитите патроли и годинава се потврдува како успешна пракса што позитивно влијае врз перцепцијата на безбедност кај туристите. Иако е зголемено присуството и делувањето на сообраќајната полиција, сепак бројот на жртви во сообраќајни незгоди покажува дека безбедноста во сообраќајот бара посистемски пристап, со силен акцент на превентивни, едукативни и инфраструктурни мерки“, истакна министерот за внатрешни работи Панче Тошковски заклучувајќи дека МВР функционира со зголемена ефикасност, подобра координација и подготвеност да одговори на зголемените предизвици, резултатите се видливи, напредокот е реален, обврска што продолжуваме да ја исполнуваме професионално, посветено и со јасна цел за создавање побезбедна држава.