Македонија
Алтернатива: Заев купи вакцини само за неговата партија и нејзините филијали

„По официјалните информации дека Владата, односно Министерството за здравство, обезбедило вакцини за околу 3000 граѓани, кои ќе дојдат во март, а за другите не е познато кога, слободно можеме да констатираме дека оваа влада само за интересите на народот не работи. Оваа количина на вакцини е веројатно планирана за неговата партија и нејзините филијали“, се вели во соопштението на Алтернатива.
Според партијата, вакцинирањето на 1-2% од населението, не само што е крајно неодговорно, туку и најдобро објаснува кој е реалниот интерес на оваа влада. Ова поточно ја објаснува и заложбата на оваа влада за легализација на дрогата. Влада која се грижи за дрога, не може да се грижи и за здравјето на граѓаните.
„Колку за информација и споредба, Србија од понеделник го започнува вториот циклус на вакцинација со околу 20 илјади дози, Бугарија, исто така, ја очекува и втората пратка со 25 илјади вакцини, додека Република Албанија објави дека веќе обезбедила половина милион вакцини, од кои првата пратка ќе пристигне во јануари. Само овие бројки, а да не ги спомнувам европскиот и американскиот стандард за вакцинација, се доволен доказ дека Северна Македонија, токму поради невниманието на оваа влада или нејзината грижа за темите спротивни на граѓанскиот интерес, ќе продолжи да ги брои жртвите на пандемијата и ќе продолжи да се оправда дека толку може да направи.Затоа, Алтернатива смета дека ослободувањето од оваа влада, ако не од некоја друга причина, барем од оваа причина, веќе стана обврска. Едноставно, станува збор за спасување на животите на луѓето“, се вели во соопштението.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Милевски: Виница 4 години назадува, катастрофално владеење на Петков и ВМРО-ДПМНЕ

Така наречениот отчет на градоначалникот Миле Петков и ДПМНЕ е најдобар доказ за четири години катастрофално и досега невидено лошо владеење на една локална власт во Виница, изјави кандидатот на СДСМ за градоначалник на Виница, Гоце Милевски.
Наместо вистински отчет, додаде тој, видовме обид за замачкување на очите на јавноста и бегање од одговорност за неисполнетите ветувања.
„Затоа таканаречениот отчет беше во скап хотел а не на улиците, во градот и селата во Виница. Затоа што реалноста е разочарувачка. Ниту еден од капиталните проекти од програмата на Петков и ДПМНЕ за Виница не се реализирани“, рече Милевски.
Според Милевски, Петков се фалел со наследени проекти од претходната власт на СДСМ и неколку асфалтирани улици.
„Но фактите говорат: сегашната власт нема реализирано ниту 20 километри улици, наспроти 45 километри изградени во времето на СДСМ. Виница денес изгледа како мала депонија од не собереното ѓубре и смет, собирен центар за кучиња скитници, со небезбедни кратери од вода и хаос од неправилно паркираните возила, со запуштени зелени површини и ниту едно ново засадено дрво. Тоа сликата за Виница после 4 години неспособна локална власт на ВМРО-ДПМНЕ. Да не дозволиме оваа казна да продолжи уште четири години! Локалните избори се шанса за промени во Виница“, рече Милевски.
Македонија
Голема акција на Финансиската полиција: уапсени седум лица за даночни измами и перење пари, го оштетиле буџетот за 430 милиони денари

По двегодишна опсежна предистражна постапка, во текот на денешниот ден Управата за финансиска полиција спроведе акција во која беа извршени претреси на повеќе локации на подрачјето на општина Липково, Куманово и Желино.
Се работи за сложена предистрага, која опфаќа повеќе правни и физички лица, а целта е целосно разоткривање на криминална група, која дејстувала подолг временски период и имала цел вршење на кривичните дела злосторничко здружување, даночно затајување, даночна измама и перење пари и други приноси од казниво дело, со намера организаторите и припадниците на групата да стекнат противправна имотна корист во висина од над четиристотини триесет милиони денари, со што е предизвикана огромна штета на буџетот на Република Македонија.
По налог на јавен обвинител од Основно јавно обвинителство за гонење организиран криминал и корупција, во акцијата со асистенција на САЕ „Тигар“ од слобода се лишени седум лица и тие се изведени пред судија на претходна постапка при Основниот кривичен суд, а едно лице не е достапно на органите на прогонот.
Македонија
Утре сончево време, со температура до 34 степени

Времето утре ќе биде сончево со мала до умерена облачност. Попладне во источните делови ќе има услови за локален краткотраен дожд. Ќе дува слаб до умерен ветер претежно од јужен правец, информира УХМР.
Минималната температура ќе биде во интервал од 9 до 18, а максималната ќе достигне од 27 до 34 степени.
Во Скопје сончево со мала до умерена облачност. Ќе дува слаб до умерен ветер од југозападен правец. Минималната температура ќе се спушти до 14, а максималната ќе достигне до 32 степена.
До петок времето ќе се задржи претежно сончево и топло со постепен пораст на дневните температури. Ќе дува слаб до умерен ветер од јужен правец.
За време на викендот времето ќе биде променливо облачно и нестабилно со локален пороен дожд и грмежи. В сабота ќе дува умерен до засилен југозападен, а в недела ветерот ќе го смени правецот во северен.