Со 66 гласа ,,за”, три ,,воздржани” и седум ,,против” од вкупно 76 пратеници кои гласаа, Собранието денеска го усвои и последниот од четирите амандмани за уставните измени согласно со преспанскиот договор. Се работи за 36. амандман со кој се предвидува Македонија да го негува и штити културното наследство и да се грижи за интересите на македонските граѓани во дијаспората.

Бидејќи е исцрпена дискусијата по сите амандмани, следи јавна расправа што ќе трае пет дена, по што амандманите одат во Владата, која има рок од два дена да изготви конечни предлози по нив. Пратеникот на СДСМ, Јован Митревски, побара расправата да трае пет работни дена бидејќи 8 декември е празник. Неговиот предлог беше усвоен.

Претходно Собранието го усвои 35. амандман. Со 64 гласа „за“, двајца „воздржани“ и 14 гласа „против“ пратениците го усвоија нацрт-амандманот за почитување на суверенитетот, територијалниот интегритет и политичката определба на соседите.И овој нацрт-амандман, исто како и претходните два, се донесе со просто мнозинство, при што беа потребни гласови на 61 пратеник.

Претходно, за време на викендот, Собранието ги усвои првите два нацрт-амандмана со кои се
предвидува во Уставот зборовите „Република Македонија“ да се заменат со зборовите „Република Северна Македонија“, а зборот „Македонија“ се заменува со зборовите „Северна Македонија“, освен во членот 36, кој има историски апсект и се однесува на „посебните социјални права на борците од антифашистичката војна и од сите националноослободителни војни на Македонија“.

Со другиот нацрт-амандман на Уставот, пак, се предвидува зборовите „одлуките на АСНОМ“ да се заменат со „прогласот од Првото заседание на АСНОМ“, а тука се додава и Охридскиот рамковен договор.

Финалното носење на амандманите ќе следува по владиниот извештај кога претседателот на Собранието, Талат Џафери, е должен во рок од 30 дена да закаже нова седница за која повторно ќе биде потребно двотретинското мнозинство.

Габриела Димковиќ-Мишевска