Македонија
„Анима мунди“: Да не се убиваат кучиња, нема епидемија на лајшманиоза во Прилеп

Здружението „Анима мунди“ бара да се не се крева паника и да не се убиваат кучиња во Прилеп бидејќи нема епидемија од лајшманиоза во општината.
„Се обраќаме до градоначалникот, Советот и надлежните служби на Општина Прилеп, како и до директорот на Агенција за храна и ветеринарство, итно да се запре со кревањето паника и страв во однос на бездомните кучиња во Прилеп, како и информациите за епидемија од лајшманиоза во општината и најавите за убивање на бездомните кучиња во градот. Станува збор за сериозни шпекулации и дезинформации што ги ставаат на удар кучињата, кои сами по себе никако не може да бидат извор на болеста што се шири саму преку инсект (мушичка) за што потребно е градот да врши редовна дезинсекција, а не да најавува и спроведува убивање на животните“, соопшти здружението.
Според нив, цената на незнаењето на градот да се справи со прекубројноста на бездомни животни преку масовна стерилизација и казни за неодговорно сопствеништво (пуштање на милениците на улица и неконтролираниот расплод) не смее да ја плаќаат животните што се на улица, но не по своја вина.
Граѓаните мора да знаат дека болеста не се пренесува преку кучињата, преку никаков контакт – допир, галење, играње, а ниту со угриз од животно; туку исклучиво преку мушички преносители и само со нивно сузбивање се сузбива ризикот за човечкото здравје.
„Анима мунди“ смета дека најавата за масовна појава на лишманија не е ништо друго, освен сеење страв, паника и поттикнување агресија, насилство кон животните, кое оди во прилог на нивно брутално и масовно убивање. „Информираме дека никаде на Балканот и земјите од нашето соседство, како и никаде во европските земји, лишманијата не е причина за убивање бездомни животни, и тоа дури во подрачја каде што појавата на болеста е далеку поприсутна – ваквата одредба само се злоупотребува во Македонија, при што, наместо да се сузбиваат ризиците од болеста и се трошат пари на масовни стерилизации на бездомните кучиња, се плаќаат трошоци за тестирања на секое куче одделно – трошоци кои се скапи, при што се дава можност за сериозни финансиски малверзации – и убивање што никогаш нема да биде решение на проблемот, туку ќе го продлабочуваат до неврат.
Бараме Општината и надлежните органи итно не преземат мерки што ќе ја гарантираат безбедноста на граѓаните и животните – итно да се запре кревањето паника и да се информира јавноста дека болеста се пренесува само преку мушичките; никако да не се убиваат животните, туку итно да се започнат програми за масовно стерилизирање на бездомните животни и казни за неодговорните сопственици (напуштање, неконтролиран расплод на милениците); итно да се изврши дезинсекција во градот доколку се сомневаат на зголемена појава на лајшманија“, се вели во соопштението.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Активни се три пожари на отворено во Македонија

Утрово се активни три пожари на отворено во Македонија, информира Центарот за управување со кризи.
До 06:30 часот на територијата на Република Северна Македонија имаше вкупно 28 пожари на отворен простор, од кои три се сѐ уште активни, еден пожар е под контрола, а 24 се изгаснати.
АКТИВНИ: 3
1. Општина Василево, Радовиш и Берово
• с. Нивичино, планина Голем Готен и Малешевските Планини
• Нискостеблеста шума, смрека, грмушки и ниска вегетација
2. Општина Прилеп
• с. Бешиште, м.в. Бешишки Рид (под контрола)
• Друг крак кон с. Градешница (опш. Новаци) и трет крак кон граница со Р. Грција
• Не се интервенира поради детонации (мешана шума)
3. Општина Кавадарци
• помеѓу селата Галиште и Ќесендре
• Мешана шума и нискостеблеста вегетација
ПОД КОНТРОЛА: 1
1. Општина Карбинци
• с. Јунузлија (шума)
Македонија
Без струја делови од Сопиште, Аеродром и Студеничани

Без струја денеска ќе останат делови од општините Сопиште, Аеродром и Студеничани.
ЕВН Македонија АД известува дека на ден 31.07.2025 година ( четврток ) без електрична енергија ќе останат:
– во периодот од 07:00 до 16:00 часот, од последна автобуска станица 24ка до маркет„ДАВИДОВ“ . (општина Сопиште)
– во периодот од 08:30 до 15:30 часот, корисниците од ул.Ѓорѓи Капчев. (општина Аеродром)
– во периодот од 09:30 до 12:00 часот, дел од корисниците на селото Морани СЕЛОТО МОРАНИ (општина Студеничани)
– во периодот од 13:00 до 15:00 часот, корисниците од викендици Дражилово, ХПП Патишка Река, Крас Јаболце.(општина Сопиште)
Македонија
Во прекин сообраќајот на патот Струмица – Берово

Од вчеравечер 22:10 часот сообраќајот на регионалниот пат Струмица-Берово, поточно кај „Сарајска раскрсница“, е во целосен прекин поради случена сообраќајна незгода, информира АМСМ.
Сообраќајот на државните патишта се одвива непречено, по наместа влажни коловози.
Интензитетот на сообраќај на патните правци надвор од градските средини е зголемен. Поради летните одмори се бележи зголемена фреквенција на возила, но на граничните премини од македонска страна, нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.