Македонија
Антикорупциската комисија ќе го испита случајот со „Еуровија“; за Ковачевски – сомнително е ако донатор добие тендер со највисока, а не со најниска цена

Ако тоа што одредена компанија финансирала политичка партија, имало влијание врз изборот за тендер, тоа треба да го провери Државната комисија за спречување корупција (ДКСК), која веќе објави дека ќе отвори случај по овој основ, рече премиерот Димитар Ковачевски.
Премиерот вели дека на тендерот што го објави МНР за салата за претстојниот самит на ОБСЕ, е избрана најниската понуда, а би било сомнително доколку некој донатор на одредена политичка партија добие тендер со највисока цена или, пак, не е заведен дека е донатор.
Според Ковачевски, во случајот станува збор за тендер што е објавен законски и на кој учествуво зеле повеќе фирми, односно МНР го објави бројот на фирми, како и цените на понудувачите во однос на работата што требало да ја извршат.
„МНР детаљно информира колку компании учествувале, какви суми понудиле во однос на извршувањето на работите. Очигледно е дека е избрана најниската понуда. Секој од понудувачите има право на жалба во согласност со Законот за јавните набавки. Инаку, се работи за компанија што работи и на други инфраструктурни објекти“, рече Ковачевски.
Фирмата „Еуровија“ ДООЕЛ од Желино доби 1,8 милион евра на тендер за реконструкција на салата „Борис Трајковски“ во пресрет на конференцијата на ОБСЕ, што треба да се одржи во декември. Министерот Бујар Османи истакна дека тој не знаел оти фирмата била донатор на ДУИ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Наскоро зонско паркирање во Автокоманда

Во скопската населба Автокоманда наскоро ќе биде воведено зонско паркирање, најави кандидатот за градоначалник на Општина Гази Баба, Бобан Стефковски.
„ Со особено задоволство ги информирам жителите на Автокоманда дека е донесено Решение за утврдување на режим на сообраќај во Автокоманда. Со ова официјално се одобрува воведувањето на зонско паркирање – решение кое жителите на Автокоманда го очекуваат повеќе од една деценија“, рече Стефковски.
Тој додава дека во моментов интензивно се работи на изработка на проектот за обележување на улиците и поставување на потребната сигнализација, а активностите на терен ќе започнат во најкус можен рок.
Стефковски најави дека секое домаќинство ќе добие две бесплатни картички за паркирање.
Македонија
Уапсена сопругата на докторот кој беше застрелан во Куманово, била вмешана во обидот за неговото убиство

Полицијата ја уапси сопругата на докторот кој беше застрелан вчера во Куманово. Тој со повреди беше пренесен во болница, но се наоѓа во стабилна состојба. Според информациите на МВР, сопругата е осомничена дека е вмешана во обидот за неговото убиство.
„Вчера полициски службеници од СВР Куманово ја лишија од слобода А.А. (43) од Тетово, поради основи на сомнение дека е поврзана со обидот за убиство на нејзиниот сопруг З.Ш. (43) од село Слупчане, липковско“, велат од МВР.
Исто така, во врска со настанот на службен разговор во СВР Куманово се повикани шест лица, а во домот на Б.С. (50) од Куманово по судска наредба, е извршен претрес.
По целосно документирање на случајот, против сопругата ќе следува соодветна пријава, додека против Љ.Ф. (36) од Гостивар, кој се сомничи за обид за убиство и се уште е во бегство, по консултација со Основното јавно обвинителство, исто така ќе биде поднесена кривична пријава.
Од Министерството за здравство вчера соопштија дека во вооружениот напад во Куманово е повреден докторот Зекирија Шаини. Од таму известија дека повредите не се животно-загрозувачки и дека докторот е во стабилна состојба и се опоравува.
Од ДУИ, пак, информираа дека станува збор за нивен кандидат и носител на листата во Општина Липково.
Македонија
Евакуации во објектите околу плоштадот „ВМРО“ поради куфер оставен на плочникот, полицијата утврди дека е празен

Обезбедувањето на Јавното претпријатие за државни патишта пријавило во полиција дека две лица денес оставиле куфер на плочникот пред нивниот објект сместен на плоштадот „ВМРО“ веднаш до седиштето на владејачката партија ВМРО-ДПМНЕ. Полицијата веднаш излегла на терен, почнала евакуација на вработените од објектите околу плоштадот, а проверките покажале дека куферот е празен.
„Денеска (08.10.2025) во 12.55 часот лице од обезбедувањето на ЈП ‘Државни патишта’ пријавило дека на видеонадзор пред канцелариите на ЈП ‘Државни патишта’ на плоштадот ‘ВМРО’ во Скопје биле забележани две лица како го разгледуваат местото, а едно од лицата оставило куфер. Веднаш по добиената пријава, преземени се соодветни мерки и активности, извршени се потребните проверки и утврдено е дека куферот е празен“, соопшти МВР.