На покана на претседателот на Комунистичката партија на Руската Федерација (КПРФ), Генадиј Зјуганов, претседателот на Левицата, Димитар Апасиев, заедно со членот на президиумот на партијата, Александар Симонов, се во официјална посета на Руската Федерација по повод 9 мај – Денот на победата над фашизмот.

Апасиев одржа говор во Паркот на победата во Москва, каде што истакна дека Левицата се бори против историскиот ревизионизам и ги брани вредностите на антифашистичката борба.

„Нашите дедовци, партизаните, се бореа рамо до рамо со народите на Советскиот Сојуз против заедничкиот непријател. Во борбата против фашизмот бевме обединети и таа солидарност е основа на нашата историска поврзаност, која сме должни да ја зачуваме.

Во контекст на современата меѓународна нестабилност, особено е важно да се зачува историската вистина и да се спротивставиме на обидите за историски ревизионизам. Победата од 1945 година е победа на антифашизмот и победа на човештвото. Наша должност е да ја пренесеме оваа вистина на идните генерации, да го зајакнеме мирот заснован на почит, еднаквост и солидарност меѓу народите“, рече Апасиев.

Во рамките на посетата, претседателот на Левицата, Апасиев, и Симонов ќе остварат средба со пратеници на КПРФ во државната Дума на Руската Федерација.

Посетата ќе трае до сабота, а утре ќе присуствуваат на главната воена парада во Москва по повод одбележувањето на Денот на победата над фашизмот.

За посетата на Москва, Апасиев претходно објави на социјалните мрежи споделувајќи ја поканата.

„Некој од задњи ред кај Трамп, некој со официјална покана за воената парада на Црвениот плоштад“, напиша Апасиев.