Македонија
Апелација одлучи за „Плацови на Водно“: Мијалков ослободен од затвор, Груевски треба да издржи девет години
Апелациониот суд Скопје, постапувајќи по предметот познат како „Плацови на Водно“, по одржана јавна седница и разгледување на списите во предметот, пресудата, изјавените жалби, предлогот на Вишото јавно обвинителство Скопје, како и усните наводи изнесени на јавната седница на 14.2.2023 година, донел пресуда со која ги одби како неосновани жалбите на обвинетиот експремиер Никола Груевски и на правното лице ДТУОР Л.К.Ц. ДООЕЛ, а делумно ја уважи жалбата на обвинетиот ексдиректор на УБК, Сашо Мијалков. Истовремено, ја уважи жалбата и на Основното јавно обвинителство за гонење организиран криминал и корупција.
„Апелациониот суд Скопје пресудата ја преиначи во делот на одлуката за кривичната санкција на начин што на обвинетиот Н. Г. (Никола Груевски) за кривичното дело перење пари и други приноси од казниво дело од член 273 ст. 1 од Кривичниот законик му се утврдува казна затвор во траење од 7 (седум) години, а за кривичното дело противправно стекнување и прикривање имот од член 359-а став 1 од Кривичниот законик му се утврдува казна затвор во траење од 3 (три) години и 6 (шест) месеци и во согласност со чл. 44 од Кривичниот законик, се осудува на единствена казна затвор во траење од 9 (девет) години.
– на обвинетиот С. М. (Сашо Мијалков) за кривичното дело перење пари и други приноси од казниво дело од член 273 став 1 в.в. со член 24 од Кривичниот законик му се изрекува алтернативна мерка – условна осуда, така што одмерената казна затвор во траење од 1 (една) година и 3 (три) месеци, во која му е засметано и времето поминато во притвор, сметано од 22.12.2021 година до 29.12.2021 година, се зема за утврдена и се определува дека таа нема да се изврши ако обвинетиот во рок од 4 (четири) години по правосилноста на пресудата не стори ново кривично дело“, велат од скопска Апелација.
Апелациониот суд Скопје првостепената пресуда КОК. бр. 63/21 од 21.4.2022 година во преостанатиот осудителен дел под I од изреката ја потврди.
„Првостепената пресуда во обжалениот дел е јасна и подобна за испитување, не содржи суштествени повреди на постапката, фактичката состојба е јасна и правилно е утврдена. Во однос на казните утврдени за обвинетиот Н. Г., Апелациониот суд Скопје оцени дека првостепениот суд недоволно ги ценел отежителните околности и ја уважи жалбата на Основното јавно обвинителство за гонење организиран криминал и корупција во однос на изречената казна и одлучи како во изреката. По однос на обвинетиот С. М., кој е помагач од член 24 на Кривичниот законик за кривичното дело од член 273 став 1, кој не презел реални дејства и постапки, туку дејствата му се вербални, за кое се огласени виновни и осудени Н. Г., и Ј. К. 1 (една) година затвор, Н. Ј. алтернативна мерка – условна осуда, Р. Н. алтернативна мерка – условна осуда, па советот оцени дека првостепниот суд го повредил член 24 од Кривичниот законик, во кој е наведено дека помагачот се казнува исто или поблаго од сторителот на делото. Имајќи го предвид член 24 од Кривичниот законик и во сооднос и корелација на казните на Н. Г. (кој е во бегство), Ј. К: една година затвор, Н. Ј. алтернативна мерка условна осуда, Р. Н. алтернативна мерка – условна осуда, директни сторители со конкретни дејства и постапки, како и одлуките на Врховниот суд на РСМ и врховните судови на земјите од поранешна СФРЈ, одлучи како во изреката“, вели Апелација.
По однос на конфискуваниот недвижен имот од обвинетите како и од правното лице, Апелациониот суд Скопје ја потврди првостепната пресуда со која е конфискуван целокупниот недвижен имот во приближна вредност 3.000.000,00 евра.
Претходно, Кривичниот суд пресуди седум години казна затвор и конфискација на тајниот имот за поранешниот премиер Никола Груевски во случајот „Плацови на Водно“. Освен него, осудени беа и ексдиректорот на УБК, Сашо Мијалков, на 15 месеци затвор, но и на бизнисменот Орце Камчев на една година затвор.
Со условни казни поминаа бизнисменот Ненад Јосифовиќ и кумот на Груевски, Ристо Новачевски. Мајката на Камчев, Ратка Куновска-Камчева, куртули затоа што делото за кое беше обвинета застари.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Мисајловски: Ветуваме дека сите дечиња ќе ги запишеме во градинките, сите ученици ќе добијат учебник
Ние како нова влада ветуваме дека сите дечиња ќе ги запишеме во градинките, дека сите дечиња ќе добијат учебник, рече денеска Владо Мисајловски, потпретседател на ВМРО-ДПМНЕ и носител на изборна единица 2.
„Денеска сме тука во Ѓорче Петров во Стопански Двор каде што позади мене ова место набрзо ќе започне изградба на градинка и навистина ми е драго и со огромна чест и задоволство можам да најавам јас заедно со Бојан дека за кратко започнува новата градинка во Ѓорче Петров. Онаа градинка каде што јас и Бојан како пратеници во Собранието поднесовме амандмани и ни беа прифатени од владата и Александар Стојкоски како градоначалник ги започна сите постапки и веќе наскоро ќе потпише договор за да се гради таа градинка во Ѓорче Петров.
Ние како нова влада ветуваме дека сите дечиња ќе ги запишеме во градинките, дека сите дечиња ќе добијат учебник. И затоа ова ветување ни е многу важно за да се започнат сите градинки со изградба. И навистина во Ѓорче Петров имаше голем проблем изминативе години со запишување на дечиња, со нови градинки и така натаму.
Но со одличната работа на Александар и неговиот тим може да видиме дека листата е намалена, со отворање на нови градинки, со нови реконструкции, со нови можности и адаптација дека многу дечиња се згрижија. Но со оваа градинка тука во Стопански Двор навистина е полн погодок и уште еднаш ми е драго што јас и Бојан навистина поднесувавме стотици и стотици амандмани, но овој беше прифатен и околу 60 милиони денари токму тука во Стопански Двор за брзо ќе започне нова градинка во Ѓорче Петров.
Аирлија нека се сите овие проекти. Може да видиме дека во Ѓорче Петров насекаде е раздвижено, се градат нови улици и тука во Стопански Двор, се градат нови улици во Кисела Јабука, се гради во урбаниот дел, се градат нови спортски терени. Вака се сака Ѓорче Петров, вака се сака Македонија. Но за да има уште повеќе проекти и за победува Македонија сите масовно на 8 ми мај да ставиме печат, да ставиме печат на победата на ВМРО-ДПМНЕ и Коалицијата Твоја Македонија и после тоа владата да ги засука ракавите и уште повеќе проекти да има за сите луѓе во Македонија“, рече Мисајловски.
Македонија
Сајкоски: Ќе вложиме во РЕК Битола, комбинатот ќе биде во полн сјај и ќе бидат реконструирани блоковите
Битола е на врвот на агендата на идната влада на ВМРО-ДПМНЕ, рече денеска Ѓорѓија Сајкоски, генерален секретар на ВМРО-ДПМНЕ и носител на изборна единица 5.
„Сакаме да им гарантираме дека Битола ќе биде културен, образовен, економски и енергетски центар. Ќе вложиме во РЕК Битола , комбинатот ќе биде во полн сјај и ќе бидат реконструирани блоковите. Сакаме исто така да укажеме дека ќе вложуваме и во општина Битола. Секоја година општината од владата ќе добива 11 милиони евра, ќе се направат влезовите во Битола. Но, владата исто така ќе ја направи обиколницата до Меџитилија, ќе вложи многу средства за градот Битола. Сакам да ги повикам битолчани во што поголем број на изборите на 8 мај да се приклучат исто како и во првиот круг за да донесеме една голема победа на ВМРО-ДПМНЕ и победа за Македонија“, изјави Сајкоски.
Македонија
Костадиновска-Стојчевска: „Битолски весник“ – пирејот на демократските и културните процеси
Министерката за култура, Бисера Костадиновска – Стојчевска присуствуваше на културната манифестација во Офицерскиот дом во Битола, организирана по повод 60 годишното постоење на локалниот „Битолски весник“. Со честитката за јубилејот желбата за ново децениско опстојување, таа потенцираше дека годишнината е прилика да се нагласи важноста на слободата на медиумите и нивниот придонес во развој на културата.
–„Битолскиот весник“ како пиреј 60 години опстојува простум во медиумскиот етер. Ги паметам изданијата од мојата младост и горда сум на истрајноста и активноста на весникот, со кои се вбројува во релевантен и уникатен презентер на градската колективна меморија. Весникот во континуитет е организатор на културни и хуманитарни настани со што го потврдува својот придонес во позитивните промени во културата,- истакна Костадиновска – Стојчевска.
Низ изложбата со весниците од изминатите шест децении јавноста се присети на архивата и бројноста на изданијата низ кои се потенцирани приказните за животот на човекот. Многу од нив придонеле и за промоција на културните вредности.
–Од 1964 година до денес „Битолски весник“ придонесува за развој на плурализмот и слободата на говорот што го прави чинител во демократските процеси. Единствениот локален весник ја потенцира важноста на гласното новинарство и значењето на вистинското информирање во опкружувањето со дезинформации и лажни вести. Ја нагласувам важноста на медиумите како дел од демократија и ја почитувам нивната слобода и независност во придонесот за заедничка европска иднина“- нагласи министерката за култура од настанот во Битола.
На 29 април, во далечната 1964 година, во предвечерјето на празникот 1 Мај, излезе првиот број на Битолски весник. По повеќе неуспешни обиди да се издаде градски весник, група ентузијасти предводени од првиот главен и одговорен уредник на весникот, Владо Ласковски го издадоа првиот број на Битолски весник.
Во изминатите 60 години весникот се афирмирал и како организатор на значајни манифестации. Веќе 24 години успешно ја организира манифестацијата „Избираме најуспешни битолчани“. 19 години ја доделува наградата за новинарство „Тоде Петревски“, а организирал и бројни хуманитарни акции.
Битолски весник е добитник на многу признанија и дипломи, меѓу кои и највисокото признание на Битола, наградата 4 Ноември.
На денешната свечена Академија беа врачени златни плакети на заслужни поединци, установи, инсититуции, кои дале значаен придонес во опстојувањето на „Битолски весник“.