Македонија
Апел до скопјани за рационална и совесна употреба на водата за пиење, повторно има енормна потрошувачка

ЈП Водовод и канализација – Скопје ја информира јавноста дека се продолжува со енормно зголемената и неконтролирана потрошувачка на вода на дневно ниво, што предизвикува повторно нарушување на стабилноста на водоснабдителниот систем.
Како последица на сето ова, градскиот водоводен систем функционира со намален притисок и со повремени прекини на вода во делови од градот. Стабилизарање на водоснабдителниот систем се очекува во период по 23 часот.
„Имајќи го предвид фактот дека градот Скопје се снабдува од природен извор со ограничени количини вода за пиење од непроценлива вредност, апелираме до сите граѓани на градот Скопје за рационална и совесна употреба на водата за пиење, како и избегнување непотребно трошење на водата за полевање на зеленило, бавчи и ниви, за перење автомобили, за полнење на базени и сл“, велат од Водовод.
Од таму апелираат до органите на локалната самоуправа, согласно надлежностите, преку службите со кои располагаат, како и преку Месните заедници на територија на општините, да се ангажираат во подигање на свеста кај жителите на општините за рационално користење на водата за пиење.
Апел до граѓаните на град Скопје, доколку забележат див приклучок, истиот да го пријават на 02 3073 010, [email protected]или www.vodovod-skopje.com.mk
Со дивите приклучоци, велат од Водовод, се нанесува директна штета на системот за водоснабдување и на квалитетот на водоснадбувањето до сите корисници во град Скопје
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Морбидни обивнувања на Мицкоски и измислени приказни за пожарите, велат од СДСМ

Нема крај на морбидното однесување на ВМРО-ДПМНЕ и Христијан Мцикоски. Во услови на огнена стихија и прогласена вонредна состојба на територија на целата држава, партијата на власт наместо да бара решенија, бара изговори за катастрофата, реагираат од СДСМ.
„Минатата година со ВМРО-ДПМНЕ на власт изгореа помеѓу 10% и 15% од целокупната територија на земјата. И тогаш наместо одговорност, Мицкоски бараше виновници додека ветуваше дека ЌЕ биде подобро следната година.
Точно една година подоцна, во моментов гори тоа што остана од шумите и зелените површини низ земјава да догори.
Нема нова опрема – промовираа стари реновирани хермелини и БТР кои ги нема никаде на терен бидејќи веќе се во сервис.
Нема нови авиони, поточно, воопшто нема авиони.
Нема пилоти, иако ветуваа дека за една година ќе обучат и вработат доволно нови пилоти.
Нема нови пожарникари, а сега за 24.000 денари бараат привремени пожарникари кои би требало за минимална плата да го ризикуваат сопствениот живот. Цела година немаат абер да почнат да работат“.
Населението, додаваат од опозициската партија, само се спасува, кравите бегаат и не ја пасат тревата, пожарите беснеат, само Мицкоски не е крив.
„Мицкоски е одлепен од реалноста. Веќе има една жртва од пожарите, а наместо збор на утеха или превземање на мерки, Мицкоски повторно забегува во некрофилска реторика и бара виновници, бркајќи духови“, оценуваат од СДСМ.
Македонија
Во државата се регистрирани 23 пожари, 11 се активни, еден е под контрола, соопшти ЦУК

Центарот за управување со кризи соопшти дека до 19 часот на територија на државата регистрирани се вкупно 23 пожари на отворен простор од кои 11 се активни, а еден е под контрола.
До 19.00 часот регистрирани се вкупно 23 пожари на отворен простор, од кои 11 се активни, 2 се локализирани, 9 се изгаснати и 1 е под контрола.
Според ЦУК активни пожари има во Прилепско с. Бешиште (мешана шума), Македонски Брод – помеѓу с. Црешнево, с. Локвица и с. Слатина (дабова шума и грмушки), Македонски Брод – с. Самоков (лесно запалив материјал), Дебарца-Струга – с. Волино кон с. Ливада, Охрид (ниска вегетација и жито),
Чашка – под Солунска глава, меѓу Изворите на Бабуна и Бабина Дупка (чад во карпест терен),
Чучер Сандево – помеѓу с. Блаце и с. Чучер (мешана шума и ниска вегетација), Чучер Сандево – Кучевишка бара (ниска вегетација), Бутел – с. Лубанци (ниска вегетација), Дојран – с. Николич (нискостеблеста шума), Кавадарци – с. Крушевица (ниска вегетација), Гостивар – автопат Гостивар-Тетово (ниска вегетација).
ЦУК информира и за локализирани пожари: Делчево – градска депонија, Желино – с. Ларце (ниска вегетација и грмушки).
„Под контрола е пожарот во Штип – с. Врсаково (жито).
Изгаснати се пожарите во Чучер Сандево – црква Св. Недела (ниска вегетација), Шуто Оризари – Њу Стар Хотел (депонија), Гази Баба – парк-шума „Гази Баба“ (ниска вегетација),Бутел – с. Лубанци (ниска вегетација), Пробиштип – с. Петршино (ниска вегетација и стрниште), Бутел – с. Визбегово (ѓубре), Велес – поранешна фабрика Порцеланка (ниска вегетација), Росоман – с. Сирково (ниска вегетација), Липково – с. Никуштак (ниска вегетација)“, соопшти ЦУК.
Македонија
„Супорт Кочани“: Никој нема да биде сам, пристигна втора пратка компресивна облека за повредените во пожарот

Денес во Кочани пристигна и беше официјално донирана втората пратка компресивна облека, обезбедена од граѓанската иницијатива „Супорт Кочани“, наменета за повредените од трагичниот настан од 16 март 2025 година, соопштија од оваа гражанска иницијатива.
Во оваа пратка, како што информираат, се вклучени 43 парчиња компресивна облека, изработени по индивидуални мерки за 17 повредени лица.
„Облеката беше испорачана во Македонија во понеделник навечер, а веќе денес е доставена на Општата болница во Кочани.
Фактурата за оваа пратка, во износ од 283.802 денари, е целосно исплатена од страна на Support Kocani.
Ова е втора по ред испорака на компресивна облека што ја обезбедува иницијативата. Претходно, Support Kocani целосно ја покри и првата пратка во вредност од 923.458 денари, со што вкупниот износ за двете набавки изнесува 1.207.260 денари, односно 23.560,37 евра – средства обезбедени исклучиво преку донации од хумани граѓани, фирми и поддржувачи од земјата и дијаспората.
Голема благодарност упатуваме до компаниите Julius Zorn GmbH и Health 2000, кои што овозможија квалитетна и навремена медицинска помош за што поголем број повредени лица“.
Како што велат, во време на болка, солидарноста е најголем лек.
Од граѓанската иницијатива потенцираат дека никој нема да биде сам.
„Делата зборуваат многу погласно од зборови, а ние не застануваме, продолжуваме посветено и одговорно, сè додека постои потреба и сè додека има луѓе што веруваат во хуманоста,“ порачаа од „Супорт Кочани“.