Македонија
Арсовска: Веќе покажуваме како се работи домаќински

Изминатите 82 дена беа доволен период да се покаже и докаже дека со искрен пристап и напорна работа администрацијата во служба на граѓаните ќе овозможи враќање на довербата со спроведување проекти за поубав град, рече на денешната прес-конференција скопската градоначалничка, Данела Арсовска.
Таа во говорот се посвети и на нападите што во изминатиот период доаѓаат кон неа од луѓе што, како што рече, потрошиле милиони од средствата на скопјани за свои лични хирови и за прослави во кафеани.
„Притоа не исполнија ни 5 % од она што го ветуваа 4 години, јас можам пред скопјани да потврдам дека таквите денови се веќе минато. Повеќе нема трошење пари на граѓаните за лични цели, Градот се води домаќински, а проектите што ги реализиравме и ќе ги реализираме во периодот што следува ќе бидат доказ за тоа“, истакна Арсовска.
Градоначалничката додаде дека сето ова е доказ дека сепак може да се работи и да се реализираат ветувањата наспроти, како што рече, претходното градско раководство.
Во денешниот отчет за работата во првите 82 дена таа го истакна формирањето на Градскиот екосовет – зелен совет, отворањето на канцеларијата што нуди помош и брза реакција за решавање на проблемите на граѓаните, чистењето на депониите, воведувањето ноќни автобуски линии, намалувањето на цената на градскиот паркинг…
„Исчистени се над 150 диви депонии во градот, од кои над 120 мапирани за време на изборната кампања. Чистењето на дивите депонии ќе остане пракса и во наредните години сѐ со цел чиста околина и чист воздух“, нагласи Арсовска, која на ова го надоврза и формирањето на Градскиот екосовет.
„Градскиот екосовет што го формиравме го сочинуваат дваесет и пет експерти, професори и претставници на граѓански организации од областа на урбаното планирање, урбанизмот, архитектурата, сообраќајот, енергетиката и заштитата на животната средина. Тој има цел креирање политики од областа на екологијата, сообраќајот, урбаното планирање на градот, да предлага стратегии и да дава совети за иднината на развојот на Скопје“, рече градоначалничката.
Таа нагласи дека едно од нејзините главни цели во предизборната кампања било дека Град Скопје ќе биде отворен град, достапен за граѓаните.
„Отворена е канцеларија за комуникација со граѓаните, која работи 24 часа на прием на барањата на граѓаните и решавање на предизвиците со кои се соочуваат. Град Скопје стави во функција и електронска адреса за комуникација со граѓаните [email protected] како чекор кон транспарентно управување со цел 24 часа постапување во служба на граѓаните. Отворена е посебна телефонска линија во служба на граѓаните, преку која остваруваат редовна и брза комуникација со Градот преку бројот 02 3207 536. Воедно, редовно се одговара на поднесените писмени и телефонски барања од граѓаните со кои се обраќаат до Град Скопје за каков било проблем или предизвик“, посочи градоначалничката.
„Парите на граѓаните нема да се трошат на прослави и кафеани и на луксузирање од поединци, нема да се злоупотребуваат привилегиите поради кое однесување Градот е оставен со милионски долгови“, потенцира Арсовска во своето излагање.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Ледено невреме доаѓа кон Македонија: се очекува силен ветер, дожд, снег и минусни температури

Денешниот ден донесе вистинска пролет во Македонија и сончево време во најголемиот дел од земјата, но во наредните часови следува бурна промена на времето.
Моќен циклон во овој момент носи обилен снег и силен ветер во источна и североисточна Европа.
Снегот и бурните ветрови како дел од студениот фронт стигнаа до северот на Романија и Словачка.
Во исто време, во Македонија се уште е топло, температурата во Скопје е 14 степени, а за само неколку часа студениот фронт ќе ја намали температурата за повеќе од 10 степени за многу краток временски интервал.
Според информациите од Управата за хидрометеоролошки работи (УХМР) ќе има продор на студена воздушна маса од север, кој ќе предизвика значителна промена на времето.
Ќе преовладува претежно облачно време со врнежи од дожд, а на повисоките места од дожд и снег.
На планините врнежите ќе бидат од снег и ќе се формира снежна покривка од 10 до 15 сантиметри.
Ќе дува засилен северен ветер со брзина од над 70 километри на час и температурите значително ќе опаднат.
Во понеделник со засилен северен ветер наместа повремено ќе провејува слаб снег.
Потоа времето ќе биде стабилно и ветровито со утринските температури кои насекаде ќе бидат негативни и ќе се спуштат до минус 7 степени.
Кон крајот на следната недела се очекува постепен пораст на температурите.
Македонија
(Видео) Директорката на клиниката за пластична хирургија низ солзи им се заблагодари на странските доктори за помошта по трагедијата во Кочани

Д-р Јасмина Ѓоргиевска Павловска, директорката на Универзитетска клиника за пластична и реконструктивна хирургија низ солзи се заблагодари на докторите од Израел, Чешка и Србија кои дојдоа во земјава за да им помогнат на нашите доктори по големата трагедија во Кочани.
„Сакам да ви се заблагодарам на сите што сте тука и ни помагате во оваа ситуација. Завршивте одлична работа. Ни го дадовте патот по кој треба да одиме, за да го направиме најдоброто за овие млади души и да им дадеме шанса да го видат светот“, вели Ѓоргиевска Павловска.
Емотивното видео го објави Sheba Medical Center Global Impact, еден од водечките светски медицински центри, со седиште во Израел. Нивниот тим изведе 35 процедури на пациенти во четири различни болници во Македонија.
Македонија
(Видео) Гинов: Во ниту еден момент не е доведено во прашање водоснабдувањето на Битола

Изнесени се опасни лаги и манипулации од партиска говорница на една политичка партија, дека „ќе секнат чешмите во Битола“ и сакам јавно да побарам од советничката од СДСМ Мирјана Захариевска Ралевска да им се извини на битолчани и одговорно тврдам дека во ниту еден момент водоснабдувањето на Битола не е и нема да биде доведено во прашање, кажа денеска на прес-конференција Андреј Гинов, директор на ЈКП Водовод Битола.
„Околу „загубата“ на ЈКП Водовод Битола ќе кажам само неколку работи: -вкупните приходи за 2024 година се околу 284 милиони денари, вкупните расходи се околу 346 милиони денари, што продуцира загуба од околу 61 милион денари. Ако се земат предвид само неколку ставки на расходи и приходи ќе се види јасно зошто е тоа така. Вкупен приход од наплата на вода од правни и физички лица е околу 262 милиони денари, а од останатата реализација е околу 22 милиони денари, а додека расходите по само три основи и тоа : електрична енергија околу 43 милиони денари, сирова вода- кон „Стрежево“(заради сушата минатото лето) околу 50 милиони денари и трошоци за плати за вработените 148 милиони денари – што дава вкупен расход кога се додава и ДДВ по само три ставки е повеќе од 280 милиони денари“, рече Гинов.
Ова, според него, покажува дека целокупниот приход при висока наплата на сметки од околу 95% е близу вкупниот расход за само овие три ставки.
„Само за илустрација би кажал уште две споредби и тоа: во 2021 година во ЈКП Водовод имаше вкупно 227 вработени и трошокот за плата изнесуваше околу 107 милиони денари, а сега во 2024 год. има вкупно 205 вработени (22 вработени помалку) а трошокот за плати изнесува околу 148 милиони денари што е за 41 милион денари повеќе при значително помал број на вработени.
Во текот на 2021 година „Водовод“ влезе во непотребна инвестиција за „нова управна зграда“ за која што се потрошени повеќе од 60 милиони денари колку што изнесува сегашната загуба на ЈКП Водовод Битола“, истакна Гинов.