Македонија
Арсовски: Вработени се и браќата на пратеничките Прентовиќ и Димовска-Симеска

Ниту политичкиот прогон, ниту насилството, ниту заканите по живот нема да нè спречат вистината за непотизмот на власта, епидемијата на непотизам да излезат на виделина, изјави на прес-конференција портпаролот на ВМРО-ДПМНЕ, Димче Арсовски.
Тој објави дека во Македонската опера и балет е вработен братот на пратеничката на СДСМ, Татјана Прентовиќ , а братот на пратеничката на СДСМ од Македонски Брод, Анета Димовска-Симеска од стоматолог во приватна ординација е назначен за директор на Здравствениот дом во Македонски Брод.
Арсовски праша според кои критериуми и квалитети е вработен братот на Прентовиќ, а во однос на братот на Симеска праша – немало ли доволно доктори да се изберат во домот за директор, па морало приватен стоматолог, кој е брат на пратеничка од СДСМ, да се именува на оваа позиција.
Портпаролот на ВМРО-ДПМНЕ потсети дека претходно вработени биле синот, сопругот и братот на пратеничката Мира Стојчевска, братот, синот и снаата на пратеничката Милева Ѓорѓиева, мајката на пратеникот Костадин Костадинов, синот на пратеникот Горан Мисовски, кумот и внукот на пратеничката Фросина Ременски, братот на пратеничката Славица Митева Шуманска и уште десетици други случаи на блиски роднини на функционери.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
МВР: Граѓаните да не наседнуваат на измами со лажни сообраќајки, веднаш да пријават во полиција

Во изминатиот период во Министерството за внатрешни работи од страна на граѓаните пријавени се повеќе кривични дела „измама“, кои се извршени врз повозрасни лица.
Сторителите ги доведуваат во заблуда лицата на тој начин што им се јавуваат телефонски и им се претставуваат како службени лица, најчесто полициски службеници, и од нив бараат финансиски средства за ослободување од кривичен прогон на нивни деца или внуци кои, наводно, непосредно пред јавувањето направиле сообраќајна несреќа со смртни последици.
Измамниците ги контактираат жртвите најчесто на фиксен телефон, но има случаи каде што се контактирани и преку мобилен телефон со скриен број, а за да бидат поуверливи во позадина се слуша глас кој бара помош.
Министерството за внатрешни работи ги известува граѓаните дека се преземаат мерки и активности за расчистување на досега пријавените кривични дела и воедно апелираме до граѓани да не наседнуваат на ваквиот вид на измами, а доколку бидат контактирани, веднаш да пријават во полиција.
Македонија
Средба на претседателката Сиљановска-Давкова со кралот на Јордан, Абдула Втори

Претседателката Гордана Сиљановска-Давкова, на маргините на состанокот на шефови на држави и влади „Акаба Процес Балканот III” во Софија, оствари средба со кралот на Хашемитското Кралство Јордан, Абдула Втори.
Сиљановска-Давкова ја реафирмираше заложбата за унапредување на вредностите на дијалогот, почитувањето на културната разноликост и регионалната соработка како неопходни предуслови за стабилна и просперитетна Европа.
Во разговорот, беше потврдена блискоста меѓу двете земји, токму во година кога се одбележуваат 25 години од воспоставувањето на дипломатските односи. Претседателката нагласувајќи ја симболиката и значењето на оваа годишнина како поттик за натамошно продлабочување на билатералната соработка, упати покана до кралот Абдула Втори за посета на нашата држава.
Обајцата се согласија за важноста од продлабочување на културната и образовната размена, како и за интензивирање на соработката во областа на стабилизацијата на регионот на Блискиот Исток.
Претседателката изрази длабоко почитување за дипломатските напори на Јордан во постигнувањето на мировниот договор меѓу Израел и Хамас, притоа потенцирајќи ја улогата на Хашемитското Кралство како столб на стабилност и разум.
На крајот, таа ја нагласи потребата од темелна реформа на Обединетите Нации, организација којашто, според неа, мора да ја врати својата првична мисија и да има примарна улога во изнаоѓањето мировни решенија.
Македонија
ВМРО-ДПМНЕ: Градоначалникот од СДС на Крива Паланка, Митовски кривично да одговара за лагите со водата

Градоначалникот на Крива Паланка, секојдневно минатава недела ширеше паника меѓу сожителите и јавно говореше невистини, велат од ВМРО-ДПМНЕ.
„СДС продолжува да биде промотор на лажни вести и тие се оние кои бараат селективна правда.
Откако јавно Државниот инспекторат за животна средина утврди дека цијанид во водите на Крива река нема, СДС продолжи со своите лажни вести да обвинува кој стигне, но не погледнува во својот двор.
Градоначалникот на Крива Паланка од редовите на СДС, Сашко Митовски, кој велеше дека за 100 пати над дозволеното имало цијанид во водите на Крива река, излезе дека излажал. За овие изнесени лаги и ширење на паника меѓу сограѓаните, кривично се одговара.
Иако бил свесен за изнесените лаги, Митовски за политички поени во пресрет на локалните избори, свесно ширел паника меѓу своите сограѓани во Крива Паланка.
Ги повикуваме надлежните институции да го проследат овој однос на Митовски и да реагираат.
За крај, да ја потсетиме јавноста дека цијанид над дозволената граница во Крива река, нема“, пишува во соопштението на ВМРО-ДПМНЕ.