Асоцијацијата на спортските обложувачници на Македонија (АСОМ) денеска прати отворено писмо до Владата, во кое пишува дека најмалку очекувале во ек на економска криза таа да им го сврти грбот на 10.000 вработени во индустријата на игрите на среќа и од нив да направи социјални случаи.

„Вџашувачки за нас како Асоцијација е дека по толку долго време од нашите обиди и повици да се организира јавна расправа за измените на Законот за игрите на среќа вие како Влада останавте глуви. Сега на мала врата и по скратена постапка сакате штетното законско решение да помине во Собранието преку злоупотреба на европското знаменце“, пишува АСОМ во писмото до Владата.

Во писмото АСОМ исто така прашува зошто измените и дополнувањата во Законот за игрите на среќа и забавните игри треба да се донесат по скратена постапка со ЕУ-знаменце и без да поминат јавна расправа и без да се слушнат засегнатите страни, пошироката и стручната јавност, која може и треба да даде свој коментар или нов пакет-предлози.

Со одлуката на Владата, АСОМ се игнорира како официјална организација во која членуваат над 90 % од приредувачите на игри на среќа, што за Асоцијацијата на спортските обложувачници на Македонија отвора ново прашање: Дали и кој стои зад овие измени и чиј интерес се штити?

Во однос на грижите на граѓаните од негативните последици, АСОМ во отвореното писмо потсетува дека Владата ниту еднаш не ги зела предвид низата решенија и законски измени што биле доставувани до ЕНЕР-системот, но и до Владата.

„Треба да биде јасно дека нашата индустрија НЕМА ИНТЕРЕС од играње ниту на малолетници ниту има интерес од креирање зависности. Напротив, индустријата на игри на среќа има интерес игрите да се играат за забава и тоа силно го промовира. Годишно трошиме десетици илјади евра како компании за спроведување кампањи за заштита од негативни последици и едукација на играчите. Ние сме општествено одговорни компании, кои 100 % ги почитуваат актуелните законски норми и правила поврзани со нашата дејност, плаќаме даноци и со тоа постојано ги зголемуваме буџетските приливи. Ние сме индустрија која одлично е регулирана во моментот, а нашите членки се компании што работат во согласност со законите, без никакви отстапки. Ако вие како Влада сакате на кој било начин да помогнете или придонесете, треба да бидете партнер во овие напори“, порача АСОМ во писмото до Владата.

Според АСОМ, затворањето на индустријата во државата значи враќање во деведесеттите и играње во подруми и во нелегални објекти. Единствениот начин да се влијае позитивно е преку едукација и добра регулација.

„АСОМ е против и до крај ќе се бори против нелогични и погрешни законски измени. Вашиот предлог како Влада не постои во ниедна европска земја, гарантирано ќе отвори пат до диво обложување и нема да го намали играњето или, пак, негативните последици од него“, пишува АСОМ.

Во писмото до Владата, АСОМ потсетува дека измените на законот се направени без анализи, а одлуката за утврдување на измените и дополнувањата на овој закон и владините државнички одлуки се контрадикторни.

„Нелогично е Владата со новиот закон да дозволи затворање на 98 % од објектите и во исто време да очекува поголем број вработувања или поголеми приходи од зголемените давачки. Дислокација на објектите значи нивно затворање, односно околу 250 милиони евра годишно помалку пари во буџетот. Одговорно тврдиме, а вие како Влада проверете со Министерството за финансии и другите институции, дека овој закон ќе значи директно губење 10.000 работни места, а индиректно со намалени или целосно изгубени приходи ќе бидат 54.000 работници“, пишува АСОМ во писмото до Влада.

Актуелниот закон, според АСОМ, ги опфаќа сите сегменти на контрола на игрите на среќа од сите надлежни институции. Во согласност со тоа, покрај законските регулативи и забрани за влез на малолетни лица во објектите, членките на Асоцијацијата спроведуваат и дополнителни контроли во објектите со цел да не дојде до какво било нарушување на законите. Тоа дополнително потврдува дека АСОМ како индустрија застапува светски реномирани брендови и висока професионалност во областа што ја работи.

АСОМ исто така одбива да верува дека поради политичко популистички цели, дејноста свесно сака да се претстави како незаконска или нелегална. Според АСОМ, Владата со измените во законот на широка врата дава „пас“ за нелегални диви обложувачници.

„Ако вие како Влада навистина сакате добар закон, сè уште има можност да го сторите тоа – во Собранието преку поднесување амандмани. Нашата држава како земја аспирант за членство во Европската Унија треба ги искористи позитивните практики на европското законодавство. Повторно ќе ја потсетиме Владата дека веќе постојниот Закон за игрите на среќа е направен врз база на европските закони. За крај, веруваме во добрите намери и даваме уште една шанса да седнеме на маса и заеднички да донесеме подобар закон. Ве повикуваме да отворите дебата, да повикате експерти и да направиме анализа за тоа какви измени би ги постигнале целите, кои верувајте дека се заеднички. Но, овој закон, во оваа форма, тоа не го постигнува и ние ќе ги преземеме сите правни механизми и законски можности да го спречиме неговото носење“, завршува АСОМ во писмото до Владата.