Инспекциските служби на Агенцијата за храна и ветеринарство вчера попладне спровеле вонреден инспекциски надзор во ЈУ Зоолошка градина на Град Скопје по добиената информација од Министерството за внатрешни работи (МВР) и медиумите дека таму нелегално се заклани десетина коњи, чие месо ќе се користи за исхрана на дивите животни.

„Со контролата утврдено е дека во објект кланица со комора во Зоолошката градина, кој не е одобрен од Агенцијата за храна и ветеринарство, заклани се десет копитари, без соодветна документација, односно со непознат здравствен статус, неидентификувани и нерегистрирани и без соодветен документ за движење иако тие на Зоолошката градина ѝ се отстапени на чување во соодветни услови од страна на Управата за извршување санкции при КПУ- КПД ‘Идризово’“, соопштија од Агенција за храна и ветеринарство.

Од таму информираат дека „во депото затекнати се и две живи животни, во фрижидерите во склоп на кланичниот објект најдени се мрши од закланите животни во вкупна количина од 1.286 килограми и 100 замрзнати пилиња. Бидејќи месото од закланите копитари потекнува од неидентификувани и нерегистрирани животни со непознат здравствен статус, кои се заклани во неодобрен објект, Агенцијата за храна и ветеринарство издаде решение и нареди нештетно уништување на небезбедното месо на депонијата „Дрисла“.

„За сторените прекршоци, против правното лице ЈУ Зоолошка градина на Град Скопје и одговорното лице во него, Агенцијата за храна и ветеринарство ќе изрече соодветни казни во согласност со Законот за ветеринарното јавно здравство, Законот за безбедност на храната, Законот за заштита и благосостојба на животните и Законот за идентификација и регистрација на животните“, соопштија од АХВ.