Бројот на новозаболени од грип се намалува во споредба со минатата недела, но ако се спореди со истата недела изминатите 14 сезони, бројот на новозаболени е рекорден. Директорката на Институтот за јавно здравје, Марија Андоновска, попладнево соопшти дека изминатава недела е регистриран уште еден смртен случај на заболен од грип.

„Во текот на деветтата недела во 2025 година, од 24.2 до 2.3. се пријавени 2.569 случаи на групни пријави за заболени од грип и заболувања слични на грип, што е за 15,4 проценти помалку во споредба со претходната недела кога бројот на регистрирани случаи беше 3.035. Во однос на бројот на пријавени лица оваа недела, во споредба со деветтата недела од минатата сезона кога бројот бил 641, тој е зголемен четирипати, а во споредба со деветтата недела во последните 14 сезони зголемен е 38,4 проценти“, рече директорката Андоновска.

Од новозаболените, 1.465 лица се на возраст од 15 до 64 години, 550 се деца на возраст од 5 до 14 години, 297 пријавени случаи се деца од 0 до 4 години и 257 лица на возраст над 65 години. Заболените најмногу се пријавени во Скопје – 515 лица, Битола – 236, Куманово – 203.

Анализите покажуваат многу висока активност на вирусот во Дебар, Кратово и во Свети Николе.

Во оваа сезона вкупна бројка на заболени од грип и болести слични на грип е 19.944, бројка што во споредба со минатата сезона е 49 проценти повисока. За цела сезона досега се регистрирани четири смртни случаи, од кои четвртиот е регистриран последнава недела.

„Во последниот случај се работи за жена со коморбидитети со возраст над 65 години. Се лекувала на Клиниката за пулмонални заболувања“, рече директорката Андоновска.

Остануваат препораките за лицата што ќе почувствуваат симптоми на грип да не излегуваат од дома, а особено да не бидат во контакт со деца или со лица што  имаат коморбидитети.

Во продолжение на напорите за подобрување на условите за образование, градоначалникот Александар Стојкоски изврши увид во тековните активности за реновирање на подовите во основните училишта на територијата на општината. Во фокусот на вниманието беа подрачното училиште на ООУ „Димитар Поп Георгиев-Беровски“ и ООУ „Мирче Ацев“, каде што се реализираше замена на оштетените подови.

Вкупно 2.465 квадратни метри подови ќе бидат обновени во сите училишни објекти, со цел да се осигураат подобри и побезбедни услови за учениците и наставниот кадар. Оваа иницијатива е дел од поширокиот план за модернизација на образовната инфраструктура, која има за цел да ги подобри условите за престој и работа во сите училишта на територијата на општината.

-Образованието е приоритет, а наша должност е да обезбедиме квалитетни и безбедни услови за нашите ученици. Со овие активности, ја осигураме иднината на нашите деца и истакнуваме дека инвестициите во образование се најдобриот можен избор за една заедница“, истакна Стојкоски.

Општината останува посветена на продолжување на ваквите проекти, со цел да се осигура дека секој ученик ќе има пристап до модерни и инспиративни училишни простории.

„Денеска, СДСМ го отвора првиот од серијата скандали поврзани со тендерите на градоначалниците од ВМРО-ДПМНЕ. Ќе изнесеме низа одатоци и сомнежи за длабока корупција, сонежи за матни тендери во речиси сите општини предводени од ВМРО-ДПМНЕ. Дури и со пари од унгарскиот кредит. Во фокусот се милионските тендери што завршуваат кај едни исти фирми. Дури и фирми со сомнително минато, кои биле гонети токму за злоупотреби и местење тендери, а кои последно земаат пари, и тоа од унгарскиот кредит“, вели Богданка Кузеска, портпаролка на СДСМ.

„Дали е тоа поентата на унгарскиот кредит и каде завршуваат овие пари? Денеска го отвораме првиот скандал поврзан со компанија, која, верувале или не, работи на 50-ина јавни набавки во општини што ги води ВМРО-ДПМНЕ. Да биде скандалот поголем, компанијата претходно, во 2020 година, е осомничена токму за местење тендери во јавните набавки, погодете каде – во општина Зелениково предводена од ВМРО-ДПМНЕ. Станува збор за фирмата ИЗОЛАЦИЈА Дамјан Силјановски и др. ДОО увоз-извоз Скопје, во четири години добила 50-ина тендери вредни 10 милиони евра, речиси сите од општини под контрола на ВМРО-ДПМНЕ“, посочува Кузеска.

Додава дека само во последните 3 месеци истата фирма добила три тендери со пет договори во неколку скопски општини, сите предводени од градоначалници на ВМРО-ДПМНЕ.

„Оваа фирма веќе била гонета за местење тендери во 2020 година кога Управата за финансиска полиција поднела кривична пријава против поранешниот градоначалник на Зелениково и шест други лица. До денес, таа е омилената фирма на градоначалниците на ВМРО-ДПМНЕ која контуниирано со години добива тендери. Само за пример добила 13 тендери во Општина Гази Баба, 9 во Кавадарци, а во последните месеци ги освојува и тендерите во Бутел, Кисела Вода и Аеродром. Последните тендери кои ги добила се финансирани од унгарскиот кредит, кој граѓаните ќе го враќаат со високи камати. Индикативно е што понудената цена и постигнатата цена се во речиси сите случаи исти, односно нема пад на цените. Дали однапред се знаеле условите?“ истакнува Кузеска и прашува:

„Дали градоначалниците на ВМРО-ДПМНЕ им овозможиле ексклузивен пристап до информациите? Клучно е каде завршуваат парите од унгарскиот кредит? Парите од овој кредит не се бесплатни – тие се враќаат од буџетот, односно од парите на граѓаните и тоа со камата:

Jавноста има право да знае:

● Дали ова е механизам за финансирање на партиските структури на ВМРО-ДПМНЕ?

● Дали парите завршуваат директно во „белата палата“?

● Дали граѓаните плаќаат огромни камати за унгарските кредити за власта да си ги дели со коруптивни тендери?

Ова не смее да остане само скандал за кој ќе зборуваме денес. Очекуваме надлежните институции да реагираат веднаш!

Очекуваме одговори од градоначалниците на ВМРО-ДПМНЕ

Ова е само почеток – во наредните денови ќе следуваат нови информации и нови скандали“, завршува Кузеска.