11 часа по објавувањето на мојата кандидатура за градоначалничка на општина Центар, полицајци затропаа на мојата врата, објави поранешната претседателка на Државната комисија за спречување на корупцијата (ДКСК) и актуелна независна кандидатка за градоначалник на општина Центар, Билјана Ивановска.

Таа објави дека синоќа полицајци ја побарале дома за да ѝ врачат кривична пријава, но таа не била дома.

„Синоќа, во 20.30 ч двајца полицајци ме побарале да ми врачат кривична пријава, но јас не бев дома. Утринава, веднаш појдов да ја подигнам поканата од ОЈО Скопје за да видам за што станува збор. Ме повикуваат на разговор на 19 август. Јас немам што да кријам, имам чиста совест и не се плашам од никакви закани и ниски удари и притисоци. Мојата цел е достоинствен живот во Центар и нашата битка заедно со ‘Независни заедно’ е отпор против воспоставените антивредности на коруцпија и клиентелизам, кои нè доведоа до оваа ситуација. Ние со вашата поддршка ќе ја вратиме моќта кај граѓаните и нивното достоинство затоа што институциите треба да ни служам нам, а не на центрите чиј интерес е профитот. Јас навреме ќе ве информирам за ситуацијата во врска со оваа кривична пријава, но, секако, адреса на информирање е и Обвнителството како е надлежна институција“, напиша Ивановска.

Во врска со пријавата против Ивановска, Обвинителството соопшти:

„Јавен обвинител од Основното јавно обвинителство Скопје постапува по приватна кривична пријава поднесена на 18.2.2025 година и презема дејства за да ги провери наводите. Како едно од дејствата е испитување на наведеното лице, кое во периодот на кој се однесува пријавата била претседателка на ДКСК. Поканата за испитување од Обвинителството е испратена на 25.7.2025 година и на ниеден начин не може да се доведе во релација со политичките активности на поканетата“.

Охридското Езеро се порибува со речиси милион единки охридска пастрмка, најави министерот за земјоделство, шумарство и водостопанство, Цветан Трипуновски.

„Денеска се наоѓам во Хидробиолошкиот завод – Охрид, поводот е порибување на Охридското Езеро во согласност со договорот што го склучивме во Министерството со Хидробиолошкиот завод – Охрид и со Институтот за сточарство и рибарство во согласност со програмата од 2024 година. Обврската е да се пориби Охридското Езеро со минимум 400.000 единки охридска пастрмка, кои се одгледани во Хидробиолошкиот завод – Охрид, и 200.000 единки од Институтот за сточарство и рибарство“, рече министерот.

Тој истакна дека е информиран од Хидробиолошкиот завод – Охрид дека иако минимумот беше 400.000 единки, сепак се одгледани 620.000 единки, со кои ќе биде порибено езерото во наредниот период. Од Институтот за сточарство и рибарство информираа дека од минимум 200.000 единки одгледани се приближно 350.000 единки охридска пастрмка.

„Ова е показател дека по шест години застој, продолжуваме со порибување на она што претставува наше најголемо богатство, а тоа е охридската пастрмка“, истакна министерот Трипуновски.

„Имаме зголемување на средствата во однос на програмата за рибарство и аквакултура. Договорите за в година склучени со Хидробиолошкиот завод – Охрид се од 3,3 милиони денари, а со Институтот за сточарство и рибарство изнесуваат 1,7 милион денари. Вкупниот број риби што треба да бидат одгледани од страна на Хидробиолошкиот завод – Охрид се речиси 1,1 милион единки со просечна тежина од 3 грама, а Институтот за сточарство и рибарство има обврска да одгледа приближно 570.000 единки“, додаде министерот Трипуновски.

Тој посочи дека в година Охридското Езеро ќе се пориби со над 1,6 милион единки.

Тимовите на Државниот пазарен инспекторат од денес на терен ги контролираат правните субјекти дали се придржуваат до одредбите на владината одлука со која ги задолжи трговците да ги намалат цените на училишниот прибор за најмалку 10% во трговија на големо и 15% во трговија на мало, а која ќе важи од денес до 15 септември.

„Согласно одредбите на Одлуката, правните субјекти се должни покрај новата намалена цена на производите да ја објават и старата цена која важела на 01.06.2025 година, цена која се зема како базична и на која се утврдува намалувањето. Потоа, пред влезот во продажниот објект или на друго истакнато место треба да биде јасно и видливо истакнат плакат со формат од најмалку А3, кој ќе содржи натпис ,,Помалку трошоци, повеќе за тебе”, како и натпис: ПОПУСТ НА УЧИЛИШЕН ПРИБОР, од најмалку 15%.“, соопшти инспекторатот.

Тимовите на Државниот пазарен инспекторат во наредниот период ќе ги контролираат правните субјекти на целата територија на државата и ќе постапуваат согласно Законот за трговија и Законот за заштита на потрошувачите, каде казните се движат од 800 до 10.000 евра во зависност од големината на субјектот, а за целосно не почитување на одлуката предвидена е мерка – привремена забрана за вршење на дејност од 15 дена.

ДПИ апелкира до трговците да се придржуваат до одредбите на владината Одлука.