Македонија
Без струја делови на Центар, Ѓорче Петров и Студеничани

Од „ЕВН Македонија“ АД е добиено известување дека поради технички зафати во дистрибутивната електромрежа, без електрична енергија ќе останат делови на Центар, Ѓорче Петров и Студеничани.
Па така, од 8:30 до 16 часот струја ќе немаат корисниците од дел од ул. Димитар Пандилов, поточно објектите од бр. 10 до бр.33 (општина Центар), од 9 до 12 часот, корисниците од дел од ул. 106 во с. Ново Село (општина Ѓорче Петров), од 9 до 13 часот, корисниците од дел од ул. Црногорска кај бр. 28 и бр. 30 (општина Ѓорче Петров).
Од 9 до 14:30 часот, струја ќе немаат и корисниците од Базен Сарај, Хотел Сарај и Емо Сарај, дел од с.Сарај кај Џамија ул.Ѓорче Петров објекти кај „Кристина Дамил“ ул.1 под ул.3 и с.Крушопек (општина Сарај и општина Ѓорче Петров), од 9 до 15 часот, корисниците од дел од с. Батинци ул.4,6 и 7 (општина Студеничани), а од 9:30 до 15 часот, корисниците од селата кон Солунска Глава, Алдинци, Мала Река, принцес Мала Река, воени и полициски објекти на Солунска Глава (општина Студеничани).
„ЕВН Македонија“ известува дека поради поставување на нисконапонски електричен кабел, ќе се смени режимот на сообраќај на ул. Ферид Бајрам и бул. Христијан Тодоровски Карпош во Скопје. Временскиот режим на сообраќај ќе се воведе во периодот од 8:00 до 16:00 часот на ден 8.11.2018 (четврток), 9.11.2018 (петок), 10.11.2018 (сабота), 12.11.2018 (понеделник) и 13.11.2018 (вторник).
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Припадниците на Командата за операции го одбележаа 17 октомври-Денот на единицата

Припадниците на Командата за операции (КО), денес, 17 октомври, во касарната ,,Боро Менков“ во Куманово со воена свеченост го одбележаа Денот на единицата.
На свеченоста, на најголемата команда на оперативно рамниште во Армијата, пред присутните се обратија министерот за одбрана, Владо Мисајловски, началникот на Генералштабот, генерал-мајор Сашко Лафчиски и командантот на КО, бригаден генерал Мирче Ѓоргоски.
Во своето обраќање, генералот Лафчиски истакна дека Командата за операции претставува столб на Армијата, потенцирајќи ја нејзината примарна мисија непрекинато да ги подготвува конвенционалните копнени и воздухопловни сили за одбрана и заштита на територијалниот интегритет и независноста на татковината. Навраќајќи се на подготвеноста на КО, генералот истакна „Подготвеноста на вашите потчинети единици се должи на тоа што непрекинато ги обучувате и извежбувате. Вие се грижите постојано да ги држите вашите единици во состојба на највисока психофизичка, морална и ситуациона подготвеност, преку учество на голем број вежби и обуки во земјата и странство“ .
Министерот Мисајловски рече дека „припадниците на Командата секојдневно покажуваат професионалност, мотивираност и посветеност“, додавајќи дека најголем дел од припадниците на Команданта го зајакнуваат источното крило на Алијансата во мултинационалните сили во Романија, Бугарија и Латвија и вклучени се во справувањето со последиците од елементарните непогоди во земјава.
„Оваа одговорност вие ја исполнувате во целост, оправдувајќи ја нашата целосна доверба, а ние постоиме за да ви ги овозможиме најдобрите услови и најмодерната опрема“, рече министерот. Информираше дека одбранбениот буџет ќе продолжи да расте.
“Продолжуваме следната година и наредните години со уште позасилено темпо да обезбедуваме повеќе средства и да обезбедуваме многу проекти за модернизација за сите вас”, заклучи министерот.
Во рамките на свеченоста за најдобра единица беше прогласен Извидувачко-разузнавачкиот баталјон. Дополнително, на припадниците на командата кои покажале особени резултати во работењето им беа доделени стимулативни мерки, а беа врачени и признанија на цивилните институции и организации со кои соработува командата. Соодветни признанија, како благодарност за нивниот придонес кон Армијата во текот на службата, им беа доделени и на припадниците на единицата кои во изминатиот период ги исполниле законските услови за пензионирање.
Македонија
Меџити: Чаир почна нова ера на развој

Денес, на последниот ден од кампањата за локалните избори на 19 октомври, кандидатот за градоначалник на Општина Чаир од коалицијата ВЛЕН, Изет Меџити, пред граѓаните презентираше целосен преглед на својата програмска понуда.
Меџити ги претстави стратешките проекти за трансформација на Чаир во, како што кажа, модерна и развиена општина, со акцент на урбаната инфраструктура, квалитетното образование, заштитата на животната средина, социјалната инклузија и економското зајакнување.
Тој нагласи дека новата ера во Чаир веќе започна и дека оваа нова визија ќе се гради врз конкретни дела, институционална поддршка и чесно партнерство со граѓаните.
„Од моментот кога дојдовме на власт започнавме нова ера на инвестиции. Го вративме достоинството на Чаир и го преобразуваме во една модерна, функционална и развиена општина, со големи вложувања во инфраструктура и во секој друг сектор“, рече Меџити.
Додаде дека предвидените проекти го претвараат Чаир во модел на развој, благосостојба и заедничко живеење.
„Градиме Чаир кој чекори со ритамот на развојот, кој им служи на луѓето и кој е гордоста на Скопје. Затоа што Чаир е нашиот дом. И заедно, со работа, посветеност и љубов кон ова место, ќе го направиме Чаир шампион на развојот, гордоста и победата. Почитувани чаирчани, ви благодарам од срце за големата поддршка, за довербата и за вашата посветеност на секој чекор од оваа кампања. Ви благодарам што ми ги отворивте вратите на вашите домови, што дојдовте на нашите собири со ентузијазам, што нé послушавте со срце и нé поддржавте. Нашата сила сте вие, граѓаните на Чаир, кои ја водите промената“, рече Меџити.
Македонија
Османи: Историски избори се пред нас, 19 октомври е референдум за иднината на Чаир

Овие избори се историски во Чаир, ова е референдум за иднината на Чаир, но и референдум за достоинството на граѓаните, истакна кандидатот за градоначалник на Општина Чаир, Бујар Османи, на денешната прес-конференција, последната пред завршувањето на кампањата. Тој порача дека изборите во недела на 19-ти октомври се историски момент за општината и за достоинството на граѓаните.
„На овие избори има само две страни. Од една страна се граѓаните на Чаир, народот кој чесно работи, скромно живее и ја сака општината. Сите вие кои сакате ред, почит и грижа за општината која ја заслужувате. Од друга страна се оние кои ја узурпираа општината за себе. Кои 20 години ја користеа за сопствено богатење, кои 20 години нудат празни ветувања пред избори а потоа продолжуваат со иста песна, корупција, неред и работа само за себе“, истакна Османи.
Според Османи, токму затоа на Чаир по 19 октомври ќе му се случи земјотрес од промените што граѓаните секој ден ги бараат.
„Тоа не се далечни ветувања, туку конкретни обврски што ќе ги реализира веднаш по преземањето на функцијата. Ова не се ветувања за некоја иднина, ова се конкретни обврски кои ги преземам доколку ми ја доверите довербата. Но, ова не е само битка за подобра општина, ова е битка за достоинството на граѓаните“, нагласи Османи.
Во своето обраќање, тој остро предупреди на политичките и општествените процеси што, како што рече, го загрозуваат европскиот курс на државата.
„Денес гледаме како ‘српскиот свет’ продира во државата, како нашата заедница се турка на маргините, како европскиот сон се оддалечува. Чаир не смее да стане симбол на пораз. Чаир мора да биде бастион на достоинството“, изјави Османи.
Тој порача дека гласањето во недела, на 19-ти октомври има значење што оди подалеку од локалните избори.
„Вашиот глас е повеќе од локален избор. Вашиот глас е порака дека граѓаните стојат исправени, дека нема назадување, дека Чаир е срцето на нашата сила. Чаир е нашата гордост и граѓаните нема не дозволуваат никој да им гази по гордоста“, порача Османи.
Во завршницата, тој се осврна на неговиот противкандидат, нагласувајќи дека граѓаните имаат јасен избор меѓу минатото и иднината.
„Мојот противник имаше 20 години. 20 години и што добивме? Урбан хаос, дивоградби, стагнација. Ако за 20 години не донесе ред, нема да донесе ниту за 4. Чаир има избор, или да остане заробен во минатото или да отвори врата кон иднината“, истакна Османи.
Тој ја заврши пораката со повик до граѓаните да не останат рамнодушни на изборите на 19-ти октомври.
„Знам дека многумина сте разочарани и велите ‘сите се исти’. Но тоа не е вистина. Разликата е во тоа дали ќе останете дома и ќе дозволите други да одлучуваат за вас, или ќе излезете и ќе ја земете иднината на Чаир во свои раце“, потенцираше Османи.