Македонија
Бeса бара одговор од Алијанса за Албанците што се случи со трипартиската средба

Јавноста е во oчекување на една опозициска коалиција, која не само што треба да биде победничка на изборите што ќе се одржат на 12 април, туку пред сè треба да претставува промена во пристапот на владеењето и самото владеење, особено кај Албанците, соопшти Беса.
Според партијата, помина скоро еден месец откако Движењето Беса, со одлука на централното раководство, ја прифати понудата на Алијансата за Албанците за трипартиска коалиција и средба.
„Оваа иницијатива не доби завршница, па затоа денес јавно бараме од Алијансата за Албанците да одговори на јавноста за тоа што се случи со трипартиската соработка? Дали овој процес пропаднал или не, бидејќи ние и целокупната јавност мора да ја знаеме вистината и овој одговор треба да го даде Алијансата за Албанците како иницијатор за трипартиска коалиција.
Имајќи ги предвид овие принципи, Движењето Беса покажа политичка зрелост и толеранција со единствена причина да не ја убие надежта на граѓаните кои со огромна поддршка ги поддржуваат политиките на албанската опозиција од 2016 година или, кажано на друг начин, сакаат да ги казнат погрешните политики на ДУИ“, се вели во соопштението во кое се додава:
„Сакаме да ја информираме јавноста и граѓаните дека дојдовме до точката каде што се сомневаме дека се злоупотребува нашата искреност, коректност и транспарентноста и тоа што е најлошо од целата оваа долготрајна ситуација е што поддржувачите на албанската опозицијата по секоја цена сакаат да се создаде победничка опција што ќе ја испрати ДУИ во опозиција и кај Албанците да се врати надежта со поинакво владеење по 12 април“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Притвор за уште едно лице од групата која е под истрага за злосторничко здружување, даночно затајување и перење пари

Управата за финансиска полиција информира дека во текот на вчерашниот ден, 28.08.2025 година, на граничниот премин „Долно Блаце“, при обид за влез во РСМ, е лишен од слобода С.А., државјанин на Р.Косово, за кој постои основано сомнение дека сторил кривично дело „Злосторничко здружување“ (чл.394 ст.2) и кривично дело „Даночно затајување“ (чл.279 ст.3).
Од страна на овластени службени лица од Управата за финансиска полиција, лицето веднаш било превземено и изведено пред судија на претходна постапка од каде му била определена мерка притвор во времетраење од 30 дена, по што истиот е спроведен во КПУ Куманово.
Притворањето, појаснуваат надлежните, е продолжение на акцијата од 25 август, кога беа притворени седум лица, како резултат на сложена предистражна постапка спроведена од страна на Управата за финансиска полиција, под раководство и во координација со надлежен јавен обвинител од ОЈО ГОКК, во рамки на која беа превземени низа мерки и активности и беше обезбеден обемен доказен материјал, што резултираше со поднесување на кривична пријава против 13 физички лица и 10 правни лица, за сторени кривични дела: злосторничко здружување, даночно затајување, даночна измама и перење пари и други приноси од казниво дело, со што е предизвикана огромна штета на државниот буџет во висина од над 430 милиони денари.
Македонија
Обвинение за насилство за таткото кој повреди 15-годишни деца на фудбалскиот натпревар во Штип

Основното јавно обвинителство Штип поднесе Обвинителен предлог против едно лице за кривично дело – Насилство од член 386 став 4 во врска со став 3 и став 1 од Кривичниот законик.
На 24 август, на фудбалскиот стадион “Бело Брдо“ во Штип, за време на фудбалскиот натпревар помеѓу пионерските екипи на фудбалските клубови “Брегалница“ од Штип и “Шкупи“ од Скопје, обвинетиот со грубо насилство ја загрозил сигурноста на оштетените две 15-годишни деца, кои биле играчи во тимот на ФК “Брегалница“.
На децата им нанел телесни повреди, а кај оштетените, останатата присутна публика и во јавноста предизвикал чувство на несигурност, загрозување и страв.
Настанот се случил во 89-тата минута од натпреварот, која судијата поради прекршок (фаул) доделил втор жолт картон со што го исклучил од игра синот на обвинетиот, кој играл за „Шкупи“. Незадоволен од одлуката, најпрво синот се однесувал неспортски и со тупаници и со удар со нога се обидел да се пресмета со еден од фудбалерите на „Брегалница“. Тогаш на теренот влегол таткото и со тупаници и клоци започнал да ги удира двете деца, нанесувајќи им телесни повреди. На игралиштето влегле и други лица од публиката, кои спречиле натамошна ескалација на настанот.
Јавниот обвинител до Основниот суд во Штип достави и предлог за продолжување на претходно определената мерка притвор за обвинетиот.
Македонија
Тројца повредни во пожарот во дискотеката „Пулс“ сè уште се во болница: еден во Истанбул, двајца во „Систина“

Тројца повредени во пожарот во дискотеката „Пулс“, при што загинаа 62 лица, веќе шести месец се на болничко лекување. Директорот на Фондот за здравствено осигурување, Сашо Клековски, рече дека еден од нив е во Истанбул, а двајца се во скопската болница „Аџибадем Систина“.
„Ме радува да спомнам дека за неколку дена бројот на повредени што се хоспитализирани се намали на тројца. Двајца пациенти се пуштени на домашно лекување, еден пациент од Истанбул се врати на 27 август и тој е на домашно лекување и еден пациент од Клиниката за пластична хирургија исто така е пуштен на домашно лекување. Во моментот на лекување во болнички услови останува еден повреден во Истанбул и двајца повредени во ‘Аџибадем Систина’. За жал, двајца сè уште се во тешка, но не критична состојба. Се надевам дека и таму борбата ќе биде успешна и ќе излезат закрепнати“, рече директорот Клековски денес при посетата на болницата во Кочани.
Освен тројцата, кои се на болничко лекување, двајца пациенти сè уште имаат потреба од повремени интервенции оти имаат отворени рани и тие се третираат во Кочани, а Фондот ги покрива контролите за шестмина повредени во болницата „Пирогов“ во Софија, Бугарија, настрана од физикалните терапии, кои редовно се вршат во кочанската болница.
Клековски извести дека пластичен хирург од Белгија направил процена на повредите кај пациентите со изгореници на лицето, вратот и на дланките.
„Имавме чест, дојде познат пластичен хирург од Белгија, кој правеше процена на повредените со изгореници на лицето, на вратот и на дланките. Тоа се осумнаесеттемина повредени со најсензитивни повреди за кои ќе треба подолготраен третман понатаму. Ние сме тука, ќе ја продолжиме поддршката и ќе направиме сè што е потребно повредените да излезат живи, здрави и убави“, рече директорот Клековски и уште еднаш потенцира дека закрепнувањето на повредените е борба на долги патеки.
Директорката на кочанската болница, Катерина Паниќ-Мирчовска, рече дека сè уште е рано за естетски зафати кај повредените, но доколку се неопходни зафати на функционалните делови, како што прстите и вратот, можни се корекции доколку има такви предлози. Паниќ-Мирчовска вели дека силиконските маски направени со 3Д-скениранње и печатење веќе се изработени и во наредниот период ќе ги добијат повредените со лузни на лицето и вратот, а за шест месеци повторно ќе прават набавка на нова компресивна облека.