Граѓаните што излегоа на референдум се изјаснија „за“ НАТО и ЕУ, велат од Беса на Африм Гаши.

„По завршување на изборниот процес за референдумот, Движењето Беса е тука да изјави дека овој изборен ден, со мали забелешки, помина на најдобар можен начин и граѓаните имаа можност да ја изразат слободно својата волја. Затоа им честитаме на Државната изборна комисија, на безбедносните органи и на органите на правдата. По овој повод им се заблагодаруваме на сите граѓани што се одѕваа на повикот за референдум потврдувајќи притоа голема граѓанска одговорност и зрелост за значајниот момент во кој се наоѓа државата“, истакнаа од партијата на прес-конференција.

Беса им заблагодари и на сите активисти на Движењето што денеска биле максимално активни давајќи им помош на граѓаните да имаат можност да се изјаснат на овој референдум, а се осврнаа и на Избирачкиот список и на неопходноста од попис во земјата.

„Денес, уште еднаш се потврди тоа што ние како политичка партија, но и како Албанци, сме истакнале дека недостатокот на еден коректен попис на населението ќе остави последици и на Избирачкиот список. Од друга страна, и непрочистувањето на Избирачкиот список, со тоа што просечниот праг е кренат толку горе што беше тешко веројатно дека тој може да се постигне. Во една држава во која службените цифри покажуваат стотици илјади иселеници само во последните 15 години, да се тврди дека 903.000 е 50 отсто од гласачите, беше речиси утопија. Затоа, овој референдум е уште еден патоказ за тоа што треба да направиме како држава и како општество и неопходност за спроведување попис на населението и прочистување на Избирачкиот список“, смета Беса.

Движењето Беса додаде дека партијата останува посветена на евро-атлантската агенда и ќе продолжи да го поддржува овој процес, кој сега ќе се одвива во државните институции, во Собранието и во Владата.