Министерот за социјална политика, демографија и млади, Фатмир Лимани за време на дводневната посета на Турција, заради учество на шестиот Меѓународен самит за жените и правдата, оствари билатерална средба со Министерката за семејство и социјални политики на Република Турција, Махинур Оздемир Ѓокташ.

Средбата на министрите беше можност за разговор на одредени прашања кои се во надлежност на двете министерства, со размена на позитивни искуства кои би значеле подобрување на досегашните политики и пракса.

Двете земји имаат долгогодишна соработка во областите кои ги покриваат, а потврда за тоа се склучените договори за соработка во областа на трудот, социјалната сигурност и вработувањето, како и потпишаната изјава за намера за соработка на полето на социјалната политика, каде што се опфатени прашањата поврзани со социјалните услуги за семејството, жените, децата, старите лица и лицата со попреченост.

Македонија и Турција успешно го спроведуваат Договорот за социјално осигурување, со кој македонските и турски државјани ги остваруваат правата од здравственото осигурување и здравствената заштита, пензиското и инвалидското осигурување, каде се вклучени правото на старосна пензија, правото на инвалидска пензија, правото на семејна пензија, остваруваат право на осигурување во случај на несреќа на работа и професионална болест, право на осигурување во случај на невработеност и додаток за деца, соопштија од кабинетот на Лимани.

Тој истакна дека инвестирањето на Република Турција во Република Северна Македонија е од голема важност, земајќи предвид дека тоа ќе генерира и нови вработувања и подобрување на демографската состојба на државата. На средбата стана збор и за младинските политики кои Министерството ги опфаќа во насока на создавање на можности за младите и нивно задржување во земјата, како и инклузијата на ранливите категории на граѓани, децата, лицата со попреченост, Ромите. Притоа беше нагласена важноста на семејството како основна клетка во општеството и оттука и важноста на политиките кои имаат за цел поддршка на семејствата.

Страните истакнаа заложби за зајакнување на соработката, а тоа ќе се потврди и со потпишување на нов Меморандум за соработка меѓу двата министерства за областите кои се во нивна надлежност.

Кога ДУИ зборува за партизација на правосудниот систем, звучат смешно и жалосно. Тие треба да разберат дека влијанието врз судскиот систем заврши со нивниот крај, велат од коалицијата „Влен“.

Од тука истакнуваат дека албанскиот граѓанин има добра меморија и ги памти случаите кога судии и обвинители се именуваа со телефонски разговори каде се слушаа Али Ахмети, Муса Џафери и Блерим Ќосето Беџети како велат „Со еден обвинител Албанец помалку не се оди во рајот“.

„Посвежи се случаите како тој на Иџет Мемети, кој самиот кажа дека земал мито и ја призна вината. Пордолжуваме понатаму, изборот на Ислам Абази од Зајаз за главен обвинител за гонење на организиран криминал и корупција имаше за цел инсталирање на политичко влијание врз ова обвинителство. И покрај тоа што негираа, фотографиите се сведок кои потврдуваат дека Абази се лизна од замокот на Али Ахмети на чело на Обвинителството за гонење на криминал и корупција. Исто така, народот не го заборава ниту Талат Џафери, кога го почасти својот син – Барлет Џафери, на функцијата обвинител уште пред да дипломира. Затоа, неслучајно довербата во судството е намалена на алармантни бројки, а тоа се случи токму кога во последователни години ДУИ беше дел од власта“, велат од „Влен“.

Се додава дека Северна Македонија 10 години по ред добива негативни оценки од Европската Унија во однос на реформите во правосудството, а во наредниот период „Влен“ нема да го дозволи ова.

„Советот на јавни обвинители е важен дел од правосудниот систем и правдата, за кој Влен активно бара реформски решенија, за да истиот биде независен и да ги исполнува основните вредности на Уставот“, велат од коалицијата.

Тие уверуваат дека ќе ја вратат довербата во судството и ќе ги тргнат канџите на ДУИ од судиите и обвинителите.

Министерството за енергетика, рударство и минерални суровини ја информира јавноста дека успешно се реализира процесот на доделување на ваучери за купување инвертер клими.

Во текот на вчерашниот ден во Центрите за вработување низ државата поделени се над 90% од вредносните ваучери, а во Скопје и Битола каде што доделувањето беше во СЦ „Борис Трајковски“ односно спортска сала „Боро Чурлески“ беа поделени 79% и 64% од предвидените ваучери. Со оглед на бројноста на добитниците на вредносни ваучери од овие два града, како и во Прилеп (во Центарот за вработување) доделувањето на ваучерите е на истите локации и денес. Во моментов на трите локации нема редици и процесот тече во добар ред согласно предвидената динамика, соопштија од ова министерство.

Министерството ги известува сите оние кои сè уште ги немаат подигнато своите ваучери дека истото можат да го сторат од понеделник, па до крај на месец ноември, во просториите на Министерството кое се наоѓа на почетокот на улица Македонија спроти Музеј на Град Скопје.

Министерството, како што велат, останува достапно за сите дополнителни прашања, при што редовни информации за тековните активности се објавуваат на нашата веб-страница и преку отворени телефонски линии.