Од денеска до 30 ноември, со мотото „Тестирај. Лекувај. Превенирај“, се одржува Европската недела на тестирање за ХИВ, кон која петти пат се приклучува и здружението ХЕРА – Асоцијација за здравствена едукација и истражување.

ХЕРА е само една од над 600 организации од 53 европски држави што учествуваат во активностите на Европската недела на ХИВ-тестирање, со цел да ја подигнат свеста за придобивките од тестирањето за ХИВ. На тој начин информациите за превенција на ХИВ стануваат подостапни, повеќе луѓе може да го дознаат својот ХИВ-статус и да добијат пристап до терапија, грижа и поддршка.

Денес, се претпоставува дека секое четврто лице во Европа што има ХИВ не си го знае својот ХИВ-позитивен статус. Половина, пак, од луѓето што живеат со ХИВ се дијагностицирани доцна, со што се доцни со пристапот до терапија, грижа и поддршка.

Терапијата за ХИВ, која денес е достапна, овозможува луѓето да живеат квалитетно и долго доколку се дијагностицирани навремено. Луѓето што живеат со овој вирус имаат речиси изедначен животен век со лицата што немаат ХИВ доколку добиле навремен третман. Редовното земање на терапијата е и еден од најефективните начини на превенција на вирусот бидејќи луѓето што редовно примаат терапија, имаат ниво на вирусот што не се детектира, со што целосно се спречува преносот за ХИВ по сексуален начин, дури и доколку не се користи заштита, односно кондом. Затоа е толку важно навременото тестирање.

Во рамките на годинешната Европска недела на тестирање за ХИВ, во Младинскиот центар на ХЕРА „Сакам да знам“ на Водно, ќе биде достапно бесплатно и доверливо тестирање и советување за ХИВ со брзи тестови, секој ден. од денеска до 30 ноември. од 17 до 21 часот. Од здружението ги охрабруваат граѓаните да го посетат центарот и да направат ХИВ-тест. За подетаљни информации, може да се јават на телефонскиот број 02/3176 950.

Дополнително, ХЕРА ќе спроведе кампања на социјалните медиуми, која ја поддржаа и јавни личности од земјата. Европската недела на тестирање за ХИВ се одржува во ноември, кој се одбележува како месец на машкото здравје, па со оваа кампања потсетуваме дека тестирањето за ХИВ е особено важно и е дел и од грижата за машкото здравје.

Дали треба да направат ХИВ-тест и други информации поврзани со ризикот од пренос и заштитата од ХИВ, граѓаните може да дознаат и на мобилната андроид-апликација „ХИВ-тест“. Преку неа може да се информираат за сите локации во земјата каде што може да се направи бесплатно и доверливо тестирање и советување за ХИВ. Апликацијата може бесплатно да се преземе на „Гугл плеј“.