Македонија
Битиќи – Бектеши: Поддржавме 919 компании со 100 милиони евра
Вицепремиерот задолжен за економски прашања, координација на економските ресори и инвестиции, Фатмир Битиќи, и министерот за економија, Крешник Бектеши, на заедничка прес-конференција ги презентираа податоците за исплатата на државна помош по Законот за финансиска поддршка на инвестициите.
Државната помош по ЗФПИ е дел од планот за економски раст, воведен во 2017 година преку кој Владата им дава помош и поддршка на домашните компании за развој и нови инвестиции, а со тоа и за нови вработувања и е наменет за поддршка на развој и зголемување на конкурентноста на домашните компании.
„Во моментот целото портфолио во мојот кабинет е од 919 компании, кои во овие шест години имаат инвестирано над 500 милиони евра, а имаме исплатено 100 милиони евра финансиска поддршка кон нив“, рече Битиќи.
Вицепремиерот Битиќи додаде дека преку оваа поддршка Владата ги јакне довербата и партнерскиот однос помеѓу стопанството и институциите.
„Оваа година исплативме рекордна сума финансиска поддршка кон компаниите. 39,6 милиони евра се исплатени кон 513 компании, кои во 2022 година реализирале вкупни инвестиции од 153,3 милиони евра. Од почетокот на мандатот има неколку работи за кои постојано работам, некои од тие е и рамномерниот регионален развој. Затоа што за мене, нееднаквоста, која има најголем негативен импакт, е нееднаквост поради исклученост. Сметам дека инклузивноста и дадената шанса е единствениот соодветен одговор, како и позитивната дискриминација, додека не се поправи направената штета. Затоа во 2021 година направивме измена во законот, која предвидува поголема исплата на помош за оние компании од помалку развиените региони“, рече Битиќи.
Оваа година имаме најголема регионална распределба на средствата од која било година претходно. 70 отсто од поддржаните компании, како и исплатени средства, се кон компании надвор од Скопскиот Регион“, рече Битиќи.
Вицепремиерот Битиќи во неговото обраќање посочи дека годинава посети голем број од компаниите што ги поддржуваме преку овој закон за да можеме да разговараме и да слушнеме кои се нивните вистински потреби, за да можеме да одговориме на правилниот начин.
„Токму поради тоа исплатата ја направивме во две транши бидејќи сакавме да ги охрабриме и поддржиме компаниите што инвестираа и се развиваа и во време на криза. Да им овозможиме нова ликвидност. Но, и да обезбедиме сигурност за нивните вработени, но и можност на отворање нови работни места. Ова сметам дека успешно го реализиравме затоа што компаниите тоа и го потврдуваат. Во овие шест години успеавме да ја зголемиме државната поддршка кон компаниите за 12,7 пати, од 3,1 милиони евра на првата исплата во 2018 година на 39,6 милиони евра оваа година, што во споредба со нула државна помош кон домашните компании во 2017 година е веќе споредба што нема потреба и да ја правиме“, рече Битиќи.
Министерот за економија, Крешник Бектеши, рече дека во 2017 година со усвојување на планот за економски раст, Владата почна да им доделува финансиска поддршка на домашните инвеститори, а бројката од 919 поддржани компании до сега значи дека политиките даваат резултати и Владата со оваа мерка им помогна на домашните инвеститори да ја зголемат својата конкурентност на светските пазари, како и бројот на вработени.
„Со тоа покажавме како Влада дека не правиме разлика помеѓу домашни и странски инвеститори, односно транспарентно финансиска поддршка добиваат сите компании што реализираат инвестиции. Со измена на Законот за финансиска поддршка за инвестициите отворивме можност за дополнителна поддршка за компаниите што инвестираат во помалку развиените региони, што значи дека рамномерниот развој на целата држава е наш приоритет и ќе продолжиме да даваме поддршка за тие на кои најмногу им е потребна, што на крајот ќе има бенефит целата економија. Со воведување на механизмот за дополнителна поддршка за инвестиции на нашите граѓани што живеат во дијаспората дополнително го зголемивме опфатот на компании што инвестираат во земјавт“, рече министерот Бектеши.
Министерот посочи дека веќе се работат измени на Законот за финансиска поддршка на инвестициите, со кои ќе се зголеми опфатот и на секторите што ќе бидат поддржани.
„На последната седница на Владата беше донесен и новиот закон за индустриски зелени зони, што значи дека и индустриските зони, основани од општините во државата, ќе може да добијат поддршка за развој на инфраструктура и подобрување на условите за работа на инвеститорите“, истакна министерот Бектеши.
Владата, како што рече министерот, е целосно посветена на домашните компании со цел да се креираат добро платени работни места во целата држава, а со тоа и подобрување на стандардот на граѓаните.
„Честитки за сите компании што во изминатите шест години беа упорни и ги реализираа своите инвестиции, а ние ги следевме во нивниот раст и развој“, рече министерот Бектеши.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Пендаровски ја напушти Вила Водно, им се заблагодари на граѓаните и соработниците
Експретседателот на државата, Стево Пендаровски, чијшто мандат заврши денес, преку социјалните мрежи упати благодарност до граѓаните и своите соработници.
„Благодарност до сите граѓани за укажаната доверба и на сите соработници со кои заеднички работевме во изминатите пет години“, напиша Пендаровски.
Претходно тој во Вила Водно ја пречека новата претседателка Гордана Силјановска-Давкова, пришто свечено и’ ја предаде функцијата, а и’ ja честита и победата.
Пендаровски беше петтиот претседател од осамостојувањето на државата, а функцијата ја презеде во 2019 година од дотогашниот претседател, Ѓорге Иванов.
По престанокот на функцијата, на секој претседател му следат низа на доживотни бенефиции. Според Законот за правата на претседателот и неговото семејство по престанок на функцијата, претседателот има право на пензија чиј износ е еднаков со износот на платата што ја прима претседателот на државата, има право на канцелариски простор и најмногу три соработници. Има и право на лично обезбедување, како и право на користење службено возило и возач.
Пендаровски неодамна изјави дека по завршувањето на мандатот нема да бара претседателска пензија, ниту пак средства за отворање на канцеларија, туку ќе се врати на работното место професор.
Македонија
ДУИ велат дека Силјановска го прекршила Уставот, за „Влен“ тоа што заклетвата е потпишана со уставното име значи дека ја прифатила реалноста
Шефот на пратеничката група на ДУИ Арбер Адеми рече дека претседателката, Гордана Силјановска Давкова, го прекршила Уставот при положувањето на нејзината заклетва со тоа што не ја спомена Северна Македонија. И’ замери на Силјановска-Давковска и што повикала на единство, а спомнала само двајца лидери на партии, додека тоа што во нејзиното обраќање се осврна на жените во политиката, за Адеми личело како говор за Осми март.
„Силјановска го згази Уставот уште на прва реченица неспоменувајќи Република, ниту Република Северна Македонија, со сите импликации кои ги има тоа“, изјави Адеми, кој очекувал новата претседателка да се осврне во обраќањето на евроинтеграцискиот процес на земјата и нејзините предизвици, членството во НАТО, меѓуетничките односи, договорите со Грција и Бугарија.
Оцени дека создала криза меѓу Македонија и Грција уште во првото обраќање, а рече и дека кога веќе споменувала жени кои и честитале, ја изоставила честитката од претседателката на Косово, Вјоса Османи.
Реагираа и од колицијата на албаснкиот политички блок во земјата „Вреди“ (Влен). Од тука пак, изразија загриженост, коментирајќи дека емоциите од кампањата влијаат на рационалноста. Велат дека имаат разбирање за чувствата на македонскиот народ, но нема втора шанса за прв впечаток за новата шефица на државата.
Од неа, како што додава „Влен“, се очекува да биде пример за почитување на Уставот, особено со оглед на тоа што станува збор за професорка по Уставно право.
„Не ни треба отворање на старите рани. Добро е што Силјановска ја потпиша заклетвата со уставното име, што сепак е знак дека реалноста де факто е прифатена од неа“, велат од „Влен“.
Претходно денес, новоизбраната претседателка Гордана Силјановска-Давкова, положи заклетва за претседател во која го употреби името Македонија, што предизвика реакции во Грција, а грчката амбасадорка демонстративно ја напушти пленарната сала во Собранието. Грчкото МНР излезе со остра реакција, коментирајќи дека се прекршува договорот од Преспа. ЕУ повика на почитување на договорите кои, како што велат, се неопходни за продолжување по патот во Европската Унија.
Македонија
За Шарл Мишел е разочарувачки што Давкова не кажала Северна Македонија за време на заклетвата
Претседателот на Европскиот совет, Шарл Мишел, вели дека е многу разочарувачки што новата претседателка на Северна Македонија, Гордана Силјановска-Давкова, не го употребила уставното име на државата при денешната свечена заклетва.
„Многу е разочарувачки што новиот претседател на Северна Македонија не го употреби уставното име на државата при денешната свечена заклетва. ЕУ потсетува на важноста од континуирано спроведување на правно обврзувачките договори, вклучувајќи го и договорот од Преспа со Грција“, напиша Мишел на социјалната мрежа „Икс“, кој претходно во друг пост упати честитка до Давкова и нагласи дека иднината на Северна Македонија и Западен Балкан е во ЕУ.
Very disappointing that the new President of North Macedonia @gogamkd did not use the constitutional name of the country during today’s oath ceremony.
The EU recalls the importance of continued implementation of legally binding agreements, including Prespa agreement with Greece.— Charles Michel (@CharlesMichel) May 12, 2024
Слична беше и реакцијата на претседателката на Европската комисија Урсула Фон дер Лајен, која преку објава на социјалната мрежа „Икс“ порача дека почитувањето на Договорот од Преспа е обврзувачки за земјата да го продолжи патот кон Европската Унија.
Претходно денес, новоизбраната претседателка Гордана Силјановска-Давкова, положи заклетва за претседател во која го употреби името Македонија, што предизвика реакции во Грција, а грчката амбасадорка демонстративно ја напушти пленарната сала во Собранието. Грчкото МНР излезе со остра реакција, коментирајќи дека се прекршува договорот од Преспа.