Македонија
Битиќи се правда за терањето партиска агенда во работно време: Имам еден час пауза
Денесшната посета на експремиерот Димитар Ковачевски и сѐ уште актуелниот вицепремиер за економси прашања, Фатмир Битиќи, на компанијата „Лапласт – М“, е дел од партиските активности на СДСМ. Вака Ковачевски објасни зошто се појавува на настани заедно со вицепремиерот во текот на работното време.
На прашањето во која улога е дојден во посета на компанијата Лапласт-М, Ковачевски одговори дека е дојден како претседател на СДСМ, исто како и другите претседатели на партии кои одат во посета на компании, општини.
Експремиерот појасни дека Битиќи во посета на компанијата е дојден како потпретседател на СДСМ, а не како вицепремиер за економски прашања.
„Битиќи е потпретседател на Влада и потпретседател на СДСМ. Тоа е успех за еден човек. Нормално е дека сакаме да ги посетиме компаниите коишто за прв пат имаа можност да добијат поддршка на инвестициите кои тие ги прават“, кажа Ковачевски.
Во однос на забелешката дека работното време во Владата на Битиќи е од 8 часот и 30 минути, а тој се појавува на партиски настан во 11 часот, Ковачевски рече: „Така де, тука му е работното време, да ги посети фирмите“.
За партиската посета на „Лапласт – М“ се оправда и вицепремиерот Битиќи.
„Кога е работното време има време за пауза и време за одмор. Денеска не знаете дали користам ден од одмор или користам време на пауза, која е вообичаено саат време во денот. Јас работам за граѓаните, ова се моите сограѓани“, се правдаше Битиќи.
Ковачевси по оставката од функцијата премиер, во јавноста продолжи да се појавува со речиси исто темпо како во периодот пред оставката, а посетите на кои го следат камери вели дека се дел од партиска агенда.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Евроинтеграцијата е дијалог, а не диктат: Сиљановска-Давкова се обрати на Парискиот мировен форум
Претседателката Гордана Сиљановска-Давкова во рамки на учеството на осмиот Париски мировен форум, се обрати на сесијата посветена на младите и европската перспектива на Балканот.
Таа укажа на суштинската важност на регионалната соработка и повика на разбирање и дијалог потенцирајќи дека евроинтеграцијата не може да биде диктат, туку е дијалог.
„Регионалната соработка за мене е неверојатно важна. Не може да избегаме од регионот, тој ни е судбина, ова важи не само за нас кои се уште чекаме да станеме кандидати или да ги завршат некои држави преговорите со ЕУ, но и за оние коишто веќе се во ЕУ, а припаѓаат на нашиот регион“, изјави таа по завршувањето на сесијата, со којашто модерираше Мишел Дикло од „Институтот Монтејн“.
На сесијата таа говореше и за безбедносната состојба во Европа поради која не смееме да бидеме оставени во геополитички вакуум и го реафирмираше ставот дека проширувањето на Унијата е безбедносно, а не само прашање на проширување.
„Она што е чудно е што во 2019 година беа сменети правилата на играта среде игра, што е невообичаено ни за спортски натпревари, ниту пак во политички преговори, бидејќи беше воведена нова методологија“, вели Сиљановска-Давкова во изјавата.
Според неа од интерес за регионалната стабилност, регионалната демократија, но и за Европската Унија е, да гледа на регионот како на систем на врзани садови и да направи храбар чекор како оној во 2004 година, односно да покаже иновативност во креирањето на конечни решенија за т.н. Западен Балкан, како неразделен дел од Европа.
Македонија
„Вреди“: Ноќ што испиша историја, Филхармонијата го воздигнува името на земјата во Виена
Вчера бевме сведоци на голем културен успех на нашата земја, историскиот концерт на Филхармонија на Македонија во Златната сала на Музикферајн во Виена, една од најпрестижните сцени за класична музика во светот.
Овој концерт, кој се одржа во величествена и емотивна атмосфера, го демонстрираше високото уметничко ниво и професионализам на нашата филхармонија, која со своите брилијантни интерпретации на делата на композиторите Бете Илин, Сони Петровски, Смокварски и Дворжак, го воздигна името на нашата држава и нашата култура во срцето на Европа, велат од „Вреди“.
„Вреди“ изразува посебна благодарност до директорот на Филхармонијата, Мустафа Имери, за визионерското управување, посветеноста и напорната работа што ја претворија Филхармонијата во примерна институција за успех и меѓународна културна соработка.
Посебна благодарност им упатуваме на Министерството за култура и туризам, предводено од министерот Зоран Љутков, државниот секретар Марија Ѓоргова, амбасадорот на Република Северна Македонија во Виена, Освит Росоклија и националниот координатор за интеркултурализам, Абаз Селмани, за нивната поддршка во реализацијата на овој важен национален проект.
Ова е пример за тоа како преку институционална соработка, професионализам и почитување на уметноста, нашата земја може достојно да се претстави пред светот“.
Културата, како што додаваат, е мостот што нè обединува и го зајакнува нашиот идентитет, а овој концерт во Виена беше јасен доказ дека Северна Македонија знае да го зборува јазикот на уметноста достоинствено и со светска класа.
„Вреди“ изразува благодарност до сите уметници, членови на оркестарот, диригентот Јерухам Шаровски, солистите Ана и Игор Дурловски и сите оние што придонесоа за оваа незаборавна вечер што ќе остане како златна страница во историјата на нашата култура.
Македонија
Димитриевски најави нови паркинзи, зелени површини и детски катчиња на повеќе локации во Куманово
Комплексот згради и просторот околу него на булеварот „Октомвриска револуција“ ќе добие сосема нов изглед многу скоро во наредниот период. Ова го вети кандидатот за градоначалник на Куманово и лидер на Движењето ЗНАМ – За наша Македонија, Максим Димитриевски. Тој најави низа проекти насочени кон уредувањето на јавниот простор, подобрување на инфраструктурата и зачувување на зеленилото во тој дел од градот.
„Во следниот период сите партерни содржини околу вашите згради ќе бидат уредени, воедно ќе бидат и проширени сите постоечки паркинг простори, уредно обележани, како составен дел од втората зона за паркирање, а која ќе ги опфати и месните заедници „Панче Пешев“ и „БС Гојчо“ што ќе биде целосно бесплатна за сите што се со место на живеење на оваа адреса“, нагласи Димитриевски.
Посебен акцент во своето обраќање, Димитриевски стави на зачувувањето на зелените површини и спречувањето на прекумерната урбанизација. „Сите зелени површини вклучувајќи го и „Ореов лад“, ќе бидат задржани со акцент дека нема да се дозволи урбанизација на тој потег. На таа локација ќе се изгради нова детска градинка и дополнително нови зелени површини, рече Димитриевски.
Истовремено, најави дека кај локалитетот Табакана ќе се отстранат времените градби и ќе се направи нов паркинг простор, детско катче и повеќе зелени површини. Ист ќе биде пристапот и за просторот кај „Скара кај Жмара“, каде ќе се изгради и спортско-рекреативен комплекс и ново место за игра на најмладите, како и за комплексот К4 каде ќе никнат ново катче за најмалите, нови зелени површини и проширен паркинг простор.
Затоа, потенцираше тој, ќе се отворат нови градежни зони каде инвеститорите ќе може да градат, а градот да се шири надвор, бидејќи урбаниот развој на Куманово мора да биде балансиран меѓу изградбата и зачувувањето на просторот за живот.
Упати и повик до граѓаните за масовен одѕив на 2 ноември на вториот круг од изборите. „Ве повикувам масовно да излезете в недела и да ја дадете вашата поддршка за мене – вашиот кандидат Максим Димитриевски, затоа што Куманово заслужува континуитет и да продолжи да расте и да се развива“, порача Димитриевски.

