„Изјавата на Изет Меџити дека Владата ќе вработи 2000 до 3000 партиски кадри на Меџити во државната администрација во најкус рок е скандал без преседан. Масовната партизација на администрацијата пред изборите е јасно договорена со Мицкоски. Прашањето е – дали списоците за вработувања веќе се кај него на маса“, вели Богданка Кузеска, портпаролка на СДСМ.

„Откако Таравари изјави дека прво требало да се решат етничките прашања, па потоа да се зборува за економијата, сега Меџити има нова стратегија – прво да се вдомат партиските кадри, а потоа ќе зборуваме за вработување на квалитетните и способните. Мицкоски во целата оваа ситуација молчи, како и секогаш кога е во криза.

Ова е најголемата отворена најава за партизација на институциите во историјата. Станува збор за класичен партиски клиентелизам – вработување на партиски кадри, луѓе блиски до владејачките партии, без јасни критериуми и без гаранција за квалитет во јавните институции.

Ова е истата практика што ја гледавме за време на режимот на Груевски – полнење на администрацијата со партиски послушници, додека компетентните луѓе остануваат без шанса.

СДСМ прашува:

Според кои критериуми ќе се избираат овие 3000 вработени?

Дали ќе има јавни конкурси или веќе постои список на „подобни“ кандидати?

Дали овој список е веќе на масата на Христијан Мицкоски?

Дали ВМРО-ДПМНЕ молчи затоа што веќе е договорено дека дел од овие вработувања ќе бидат за нивни кадри?

ВМРО-ДПМНЕ, која додека беше во опозиција жестоко зборуваше против партиските вработувања, сега молчи.

Тие некогаш обвинуваа дека администрацијата е презаситена и дека треба да се прават реформи, но денес немаат проблем да ја наполнат со свои кадри. Нови четири министерства, по три заменици министри, и сега – нови 3000 луѓе во администрацијата.

Македонија не губи луѓе затоа што нема 3000 работни места во администрацијата, туку затоа што владее корупција, партиски клиентелизам и недостаток на еднакви шанси. Оние што не припаѓаат на владејачките партии остануваат без можности, а професионалците заминуваат затоа што во оваа држава не се вреднува знаењето, туку партиската лојалност.

СДСМ бара:

Државната комисија за спречување на корупцијата (ДКСК) итно да постапи по оваа изјава.

Итно стопирање на сите моментални вработувања во државната администрација.

Целосна истрага за овој скандал од надлежните институции.

Ова не смее да остане неказнето.

СДСМ ќе се спротивстави на оваа политика и ќе ја брани праведноста и транспарентноста во институциите.

Граѓаните заслужуваат држава во која секој ќе има еднаква можност, а не држава во која работните места се распределуваат според партиски списоци“, изјави Богданка Кузеска, портпаролка на СДСМ.

„Здравството е во тотален хаос, ништо не функционира, нема лекови, нема соодветни услуги, не работат важни центри. Со последната скандалозна одлука на министерот Таравари и ДПМНЕ загрозен е животот на најкритичните пациенти. Таравари наредил да не се праќаат пациенти на КАРИЛ (Клиниката за анестезија, реанимација и интензивно лекување) поради реновирање на болницата“, вели Симона Цветаноски, членка на Извршен одбор на СДСМ.

„Пациентите на кои им е неопходна интензивна нега и најсовремени апарати, на кои животот им зависи од третманот што можат само на КАРИЛ да го обезбедат се оставени сами и без алтернатива.

Оваа скандалозна одлука предизвикува сериозна загриженост, во болниците не постојат одделенија за интензивна нега, ниту доволно ресурси за да се третираат животозагрозувачки пациенти.

А нема ниту најава за алтернатива ниту пак кога ќе се заврши оваа нивна голгота.

Зошто власта не обезбедила соодветни алтернативи за овие пацинти? Зошто не се направил план каде ќе бидат згрижени со соодветен третман?

Министере Таравари хипократовата заклетва не е само теорија, водите сектор од кој зависат животи, а не бизнис интереси.

Цената на вашата неспособост ја плаќаат граѓаните. Недозволиво и да си поигрувате со животи.

За осум месеци го распаднавте здравството. Нема клиника на која нема проблем, нема пациент а кој не е соочен со недостиг на соодтветна терапија или здравстена услуга.

Најтешките онколошки пациенти беа оставени без потребната терапија, цел месец, не функционира ниту единствениот државен ПЕТ-скенер, деца умираат на Клиниката за детски болести.

На здравствениот систем му се случува хуманитарна катастрофа и тоа е последица на целосната неспособност на ДПМНЕ и Таравари да управуваат со секторот здравство.

Мора да има одговорност за ваквиот напад над здравјето и животите на луѓето. Животот на пациентите, посебно на оние во критична состојба, не смее да биде на коцка заради неспособноста и непромислените одлуки на власта“, изјави Симона Цветаноски, членка на Извршен одбор на СДСМ.

„Демократската унија за интеграција (ДУИ) го разоткрива големиот скандал што се случува во Министерството за животна средина, каде што по контрола спроведена од Инспекторатот за администрација е потврдена злоупотреба на службената должност од страна на министерот Изет Меџити и неговиот кабинет“, велат од ДУИ.

„Врз основа на решението на Инспекторатот за администрација со број 11-1653/2024 од 17.01.2025 година, Изет Меџити е целосно лишен од своите надлежности, кои се пренесени на Дирекцијата за животна средина.

Со оваа одлука, новиот директор е задолжен да не испраќа на потпис во кабинетот на Меџити ниту еден документ од клучните сектори на министерството, вклучувајќи го Секторот за природа, води, отпад, животна средина и индустриско загадување.

Овие сектори сочинуваат над 70% од надлежностите на Министерството за животна средина, што го прави овој потег невиден преседан.

Оваа мерка е донесена како резултат на бројни поплаки и пријави од граѓани и компании кои биле условувани од кабинетот на Меџити да даваат мито во замена за административни услуги.

Ова е најјасен доказ за заробеноста на институциите од корупцијата и неспособноста на актуелната влада да обезбеди чиста и функционална администрација.

ДУИ остро ја осудува оваа ситуација и ги повикува правосудните органи веднаш да отворат истрага за одговорните, како и да обезбедат граѓаните и бизнисите повеќе да не бидат жртви на државна уцена и корупција.

ДУИ ќе продолжи да биде гласот на граѓаните и да разоткрива секој обид за злоупотреба на власта од страна на неспособни и корумпирани функционери“, се наведува во соопштението на ДУИ.