Македонија
Велковски: Срамота е да се каже дека 5% е зголемување на пензиите

Пет процентни поени на пензиите не претставува покачување, туку усогласување на трошоците за живот за сите приматели на пензии во Македонија, вели техничкиот министер за труд и социјална правда, Ѓоко Велковски.
„Процентот за жал е многу мал и срамота е да се каже дека 5% е зголемување на пензиите како некои други што потенцираат. Јас ова го нарекувам усогласување, бидејќи 5% на она што најголемиот дел од пензионерите го примаат како пензија ќе биде буквално едно одење до продавница и назад со неколку производи во нивната кеса“, вели техничкиот Велковски.
Според него, неопходна е промена на методологијата за пресметување на процентните поени како би се намалила преголемата разлика помеѓу оние граѓаните коишто земаат минимална пензија и оние со високи пензии. Тој дополнува дека покрај усогласување на пензиите, потребни се системски мерки во делот на примателите на социјална помош и регулирање на минималната плата согласно реалните месечни трошоци на граѓаните.
„22% стапка на граѓани кои живеат под нивото на сиромаштија во Македонија всушност го докажува и она што го говорам од првиот ден дека над 600.000 граѓани, жители на Македонија живеат под работ на сиромаштијата. Тоа значи дека живеат со помалку од 100 денари. Денеска да издржи еден човек во текот на денот со 100 денари претставува беда и сиромаштија. Не може никој да го побие овој факт дека е тоа така бидејќи е потврдено со релевантни статистички податоци како и од експертите“, истакнува тој.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Дел од Карпош денеска без вода

Регионалниот центар за управување со кризи на Град Скопје, по добиеното известување од ЈП Водовод и канализација, информира дека, денеска поради санирање појавен дефект на водоводна мрежа со пречник Ф-1 цол на ул. Копенхагенска, крстосница со ул. Стокхолмска во населба Тафталиџе, прекинато водоснабдување ќе имаат корисниците од улиците: Копенхагенска, Стокхолмска, Софиска, Његошева, Гаврил Лесновски и Петар Драганов во општина Карпош.
Водоснабдувањето ќе биде прекинато од 11:30 часот до завршување на интервенцијата.
Македонија
Аеродром, Сопиште и Зелениково денеска без струја

Регионалниот центар за управување со кризи на Град Скопје, по добиеното известување од ЕВН, информира дека поради планирани зафати во електро дистрибутивната мрежа, денеска, без напојување со електрична енергија ќе останат:
· од 08:00 до 15:00 часот, корисниците од дел од с. Долно Лисиче, општина Аеродром;
· во истиот термин од 08:00 до 15:00 часот, корисниците од објектите во околината на зградата на Алкалоид на ул. 3 -та Македонска Бригада., општина Аеродром;
· од 09:00 до 12:00 часот, корисниците од дел од с. Горно Соње, поточно улиците со бр. 10 и бр. 12, општина Сопиште;
· од 09:00 до 16:00 часот, корисниците од селата: Дејковец и Добрино, општина Зелениково.
Македонија
Променливо облачно со повремени врнежи од дожд и со ретка појава на грмежи

Времето денеска ќе биде променливо облачно со повремени локални врнежи од дожд и со ретка појава на грмежи. Ќе дува слаб до умерен северен ветер Минималната температура ќе биде во интервал од 4 до 10, а максималната ќе достигне од 11 до 18 степени.
Во Скопје, променливо облачно со повремен дожд и со услови за ретки грмежи. Ќе дува слаб до умерен ветер од северен правец. Минималната температура ќе се спушти до 9, а максималната ќе достигне до 15 степени.
Времето во наредните денови
Продолжува периодот на променливо облачно време со повремени врнежи од дожд. Денеска и во четврток ќе има изолирана појава, а од петок на повеќе места ќе биде нестабилно со пороен дожд и грмежи. Од недела температурите ќе бидат во опаѓање.