Македонија
(Видео) Костовски до СДСМ: Вие ја создадовте олигархијата во Македонија, го осиромашивте народот и ја клекнавте државата на колена

Дарко Костовски, пратеник од ВМРО-ДПМНЕ денеска на вториот ден од собраниската седница за избор на нов владин кабинет, пратениците од СДСМ им порача дека секогаш кога тие биле на власт забрзано со деструктивни политики ја разнебитуваат Република Македонија како на национален така и на економски аспект.
„Пред нас е избор на влада која системски која како по книга ги урива темелите на Република Македонија, во последните три години со засилено темпо, но и многу порано т.е секогаш кога биле на власт во Македонија луѓето од СДСМ. По редоследот на нештата се плашам дека во период пред нас уште повеќе ќе забрзате со деструктивните системски политики за разнебитување на Македонија, како на национален така на економски правен одбранбен аспект“, вели Костовски.
Костовски истакна дека СДСМ ја создаде олигархијата во државата, создавајќи класно раслојување со крадење на сиромашниот народ, а богатење само на неколкумина.
„Од ДУИ не очекувам нешто посебно да се грижи за македонската држава. Во политиката сакам да сум реален и да се водам по природни принципи, но она што е многу пострашно е тоа што уште помалку е природно СДСМ да се грижи за Македонија“, рече тој.
„Вие ја создадовте олигархијата во Македонија. Вие успеавте да го создадете првото сериозно класно раслојување со крадење на така сиромашниот народ и трупање на богатство само кај неколкумина. Успеавте да ја спроведете најлошата транзиција во овој дел на Европа“, изјави Костовски.
Костовски порача дека елитата има свое име наречено СДСМ, како и дека во изминатите три години од главниот град направиле криминален град.
„Во Македонија елитата има свое име тоа е СДСМ“, рече Костовски и додаде:
„Луј Витон социјалдемократски бренд не оди левичар со овој светски бренд но едноставно во случајот ви прилега. Во изминатите три години Скопје го направивте како филм со Алфонсо Капоне, рекет, криминал, изнуди и еден куп нерешени улични филмски, меѓу автомобилски престрелки, кои не само пукачите туку во опасност ги доведуваат и случајните минувачи“.
Костовски нагласи дека во владата на СДСМ ќе има министри кои што сметаат дека македонскиот револуционер Гоце Делчев е Бугарин како и дека има министри кои што се поклонуваат пред обележја на УЧК, додавајќи дека ја клекнале Македонската држава на колена и го понижиле македонскиот народ.
„Во оваа влада ќе имаме министер за правда кој што смета дека Делчев е Бугарин. Но, вас тоа не ви смета, вие не познавате односно не почитувате никој што со жртва ја одбранил Македонија. Па имате изградено свој стил, истите да ги понижувате“, вели тој.
„Во оваа влада ќе имаме министер кој што системски ја уништува македонската гордост, најнепосредните бранители на македонскиот унитарен карактер, практично и на македонската држава, батаљонот за специјални намени Волци. Добро знае Шекеринска што зборува. Но, затоа одговорната за одбрана на државата се поклонува пред обележија пред УЧК, да бидам прецизен немам ништо против УЧК, јас сум воспитан борбата да ја сфаќам многу витешки , но имам против Македонците кои што се поклонуваат пред вакви обележја, само поради една причина заради македонските жртви“, додаде Костовски.
„Екипо Луј Витон го сменивте името на Македонија, ги пуштивте убијците на децата од Смилковско, пукачката екипа од Диво Насеље во затвор ја третирате како во хотел, убиецот на младиот Никола Христовски го осудивте на три срамни години затвор, ја клекнавте Македонија на колена, го пониживте македонскиот народ, но еден ден тој ќе ви пресмета“, вели Костовски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Денес се евидентирани вкупно 22 пожари на отворен простор

На територијата на државава денеска до 18 часот се евидентирани вкупно 22 пожари на отворен простор, од кои 14 се активни, а по четири се под контлола и изгаснати.
Како што информираат од Центарот за управување со кризи (ЦУК), активни пожари има: во Општина Василево, Радовиш и Берово – с. Нивичино, планината Голем Готен и Малешевските планини (нискостеблеста шума, смрека, грмушки, ниска вегетација); Општина Прилеп 1 – с. Бешиште, Бешишки Рид, крак према с. Градешница и границата со Р. Грција (мешана шума); Општина Прилеп 2 – активен кракот кон с. Дрен, проширен кон с. Галиште (Кавадарци), додека делот помеѓу Царевиќ и Смолани е под контрола (мешана шума и ниска вегетација); Општина Македонски Брод – помеѓу с. Црешево, Локвица и Крапа (деградирана дабова шума, грмушки, ниска вегетација); Општина Желино – меѓу с. Церово и Групчин (нискостеблеста и деградирана шума); Општина Струмица – с. Баница и нас. Софилар (висока трева); Општина Петровец – с. Средно Коњаре, кај реката Пчиња (ниска вегетација и ниска шума); Општина Крива Паланка – с. Нерав (висока борова шума); Општина Старо Нагоричане и Куманово – с. Облавце кон с. Бењаковце (ниска вегетација); Општина Старо Нагоричане 2 – с. Руѓинце (ниска вегетација); Општина Куманово – нас. Бедиње (ниска вегетација); Општина Гази Баба – с. Трубарево (ниска вегетација); Општина Зелениково – с. Гумалево (ниска и мешана вегетација); и Општина Василево 2 – с. Сушево (ниска вегетација).
Под контрола се ставени пожарите во Македонски Брод 1 – с. Грешница (мешана шума и сува трева); Македонски Брод 2 – с. Латово (ниска вегетација и деградирана шума); Карбинци – с. Јунузлија (шума); и Штип – помеѓу с. Драгоево и Селце (нискостеблеста шума, прнар и сува трева);.
Изгаснати се пожарите во Струмица – м.в. Три Води (ниска вегетација и мешана шума); Василево – с. Василево (ниска вегетација); Струга – с. Калишта (ниска вегетација и ѓубриште); и Шуто Оризари – ул. Брсјачка Буна (дива депонија).
Македонија
Родителите на загинатите деца во „Пулс“ прашуваат до каде е постапката за полициските службеници за пожарот

Родителите на загинатите деца во пожарот во кочанската дискотека „Пулс“ на денешниот 16. Марш на ангелите пред зградата на Полициската станица во Кочани побараа одговор од ОЈО ГОК, кое ја води постапка за над 20 те полициски службеници од ОВР Кочани и СВР-Штип, до каде е истрагата за нив и формирање на обвинителен предлог.
-Сакаме да ги прашаме до каде е постапката на ОЈО ГОК или чекат одмори, да си одведат нивните деца на одмор, на вода, а ние на нашите деца врз гробовите да им фрламе вода за да ги освежеме. Блазе си им, нека им служи на чест, оти развлекуваат само, вели мајка на загинато момче.
На денешниот Марш на ангелите главната порака им беше „Слушнето го гласот на оние што повеќе не можат да зборуваат“. Родителите и семејствата на загинатите деца што учествуваа на протестниот марш се револтирани што нивниот настан денеска имаше убедливо најслаб одѕив. Револтирано им се „заблагодарија“ на поддршката на граѓаните и семејствата кои имаат настрадано деца, а денеска не учествуваа на маршот кој почна во 18.05 часот од Паркот на револуцијата, а заврши пред зградата на Судот и Обвинителството во Кочани.
Една од мајките пред зградата на Општина Кочани истакна дека на денешен ден се случи катастрофалниот земјотрес во Скопје, кој однесе голем број на човечки животи и направи материјални штета. Посочи дека на денешниот Марш на ангелите им одаваат почит на загинатите во земјотресот во Скопје во 1963 година, но истовреме се сеќаваат и на оние кои помогнале да се обнови градот Скопје.
Македонија
МВР во Охрид покажа вежба на спасување на вода и евакуација на патници од опожарен пловен објект

Со показна вежба на спасување на вода и евакуација на патници од опожарен пловен објект, како и со презентација на дел од опремата, возилата и другите материјално технички средства што ги користат полициските службеници при извршувањето на секојдневните задачи, попладнево во Охрид беше реализирана активноста на МВР насловена „До Вас, за Вас“.
Активноста е осмислена со цел приближување на полицијата до граѓаните, во рамки на концептот „Комјунити полисинг- Работа во заедницата“, подигнување на јавната свест за зголемена јавната безбедност во заедницата, спроведување едукативни и интерактивни активности со граѓаните поврзани со превенција и сузбивање на разните форми на криминал…
Министерот за внатрешни работи, Панче Тошковски, кој ги следеше активностите истакна дека со полициските службеници од повеќе оддели во рамки на МВР се презентираат активностите што ги преземаат, средствата што ги користи службата, начинот на спроведување на полициските активности и сите дејствија што се преземаат во рамки на редовното полициско работење.
– Еден од поводите за посетата на Охрид денеска е и заедничката соработка што ја имаме со српските полициски службеници во Охрид. Имаме четворица колеги од Србија кои во летниот период се заедно со нашите полицајци патролираат, си помагаат во рамки на сите дејствија што треба да бидат преземени, а се во делот на српските туристи. Ова е една убава прилика да поразговараме со нив за тоа како ги обавуваат нивните службени задачи тука, рече Тошковски.
Тој уште додаде дека македонската полиција е тука за граѓаните, да им обезбеди мирен престој во туристичките центри.
– Безбедносната сеостојба во Охрид е стабилна, а туристите можат да уживаат во преубавите туристички центри…Во рамки на летната сезона СВР – Охрид е потпомогната со полициски службеници од други центри. Така што и оваа година ќе бидеме подготвени да ги преземени сите дејствија и да одговориме на сите предизвици, рече тој.