„Пред 2 години ја затекнав Општина Пробиштип со долг од 2 реална буџети и досега вративме 80 милиони денари, а поради огромниот долг, реализиравме многу проекти по пат на донации“, истакна на трибината со мото „На прав пат“ градоначалникот на Пробиштип, Драган Анастасов, кој додаде дека исплатен е долгот од 55 илјади евра за пожарникарите, а в година ќе се набави нова опрема за противпожарната станица.

Тој најави дека со изградба на клучката до експресниот пат набргу од Пробиштип до Скопје ќе се патува за 45-50 минути. Анастасов соопшти дека во изминатите две години се реконструирани низа улици во Пробиштип, но и во општината.

„Со изградба на пет занимални во градинката во центарот на Пробиштип целосно ќе го решиме прашањето со згрижување на предучилишните деца во градинка, а веќе во градинка е преадаптиран дел од ОУ ‘Никола Карев’, во населбата Калниште, за да може таму да се згрижат децата“, рече Анастасов.

Со донација од 600 илјади евра од Владата и уште толку од Словенија, Пробиштип повеќе нема проблем со водоснабдувањето и обезбеди техничка вода за претпријатијата, рече Анастасов, додавајќи дека во тек е реконструкција на киносалата, односно културниот дом.

„Крилото на Здравствениот дом ‘Нада Михајлова’, кое не е во функција, го адаптираме во државен дом за стари лица, со мала партиципација за сите граѓани на државата“, истакна Анастасов најавувајќи дека во Здравствениот дом ‘Нада Михајлова“ ќе се смени системот на греење и ќе биде прва јавна институција со греење на гас.

Од проектите за заштита на животната средина, Анастасов го најави рекултивирањето на старата јаловишна депонија, на која ќе се изградат фотоволтаични системи и Пробиштип ќе биде прв град кој најголемото жариште за болести ќе го претвори во можност за приход.

„За заштита на животната средина, Општината субвенционира 100 семејства за клима-уреди, но и врши контрола на сите претпријатија и на рудникот колку загадуваат“, истакна Анастасов.