Прочистувањето во судството ќе го вршат луѓе на СДСМ и Заев за криминалот да остане неказнет, обвини Стефан Андоновски, член на ИК на ВМРО-ДПМНЕ.

Според него, реформите на правосудството се добри само на хартија, а во пракса продолжува, како што рече, партискиот камшик на СДСМ за обвинителството и судството, за заштита на криминалот, за заштита на сваровски и трас трас судиите кои денес се најверни слуги на Зоран Заев.

„Сето она кое до сега се случи, а се преставува како прочистување во судството всушност е ветер и магла, одвлекување на вниманието за да остане неказнет криминалот. Со новите методологии се воспоставува нов метод за избор на послушни обвинители и судии, кои ќе работат само под политички диктат. СДСМ и Зоран Заев продолжуваат со директно мешање во судските реформи. Тие одлучуваат за членовите на Советот за реформи, и тие ги избираат луѓето кои потоа им одговараат само ним“, рече Андоновски.

Тој вели дека во Советот кој ќе избира подобни судии и обвинители има лица кои никогаш во животот не работеле како судии, ама затоа, додаде Андоновски, имаат фамилијарно високи партиски функции во СДСМ или се предложени од претседателот Стево Пендаровски.

Според Андоновски во Советот има и сопруги на поранешни контроверзни функционери од СДСМ, како и на локален партиски функционер од Струмица и близок пријател и соработник на Зоран Заев и лица против кои постоеле истраги за проневери на стотици илјади евра со барања за притвор.

„На својата прес конференција, Маричиќ и самиот призна дека токму тие учествуваат, читај: ги диктираат, методологиите и начините на прочистување на судии и обвинители. Тоа значи дека ќе се избираат подобните, кои ќе треба да им служат на желбите на власта. На овој начин Маричиќ и Заев удираат директно врз независноста на судскиот систем, кој останува предмет на политичко мешање од најсрамен вид“, рече Андоновски.