„Од денеска ќе почнеме со разоткривање на сомнителните и криминални зделки на градоначалниците што функционираа од СДСМ во претходниот мандат. Нашите новоизбрани градоначалници изминатиов период деноноќно работеа на средување на хаосот што го оставија зад себе кадрите на СДСМ, а воедно и во насока на работа за добросостојба на граѓаните. Верувајте дека имаше многу хаос“, истакна на денешната прес-конференција портаролот на ВМРО-ДПМНЕ, Димче Арсовски.

На самиот почеток тој се осврна на Општина Гази Баба. Истакна дека ова е општина каде што Општината работела за поединци во времето на СДСМ, парите на граѓаните завршувале нерационално во џебови кај луѓе што, најверојатно, биле блиски до градоначалникот, а градоначалникот бил соучесник во целата ситуацијата на испумпување пари на граѓаните, практично без него ова не би можело да се случи што денеска ќе го презентирам.

Арсовски претстави три договори пред граѓаните поврзани со уличното осветление во Гази Баба, каде што 2 од нив се за одржување и реконструкција на уличното осветление, а 1 е за изградба на нови линии за улично осветление.

Договори и тендер што ги спровел претходниот градоначалник Борис Георгиевски, кој што беше од редовите на СДСМ. Имено, тендерот за оваа намена е објавен и спроведен, односно спроведен на 19 мај 2021 година, каде што е донесена одлука за тендерот да го добие фирмата економски оператор ЕЛЕКТРОМИКИЦА ДООЕЛ од општина Илинден. Имено, во периодот од 20 мај 2021 до 30 август 2021 година се исцрпени овие три договори, односно за само 103 дена во висина од 11 милиони денари, од кои 7 милиони денари за одржување на уличното осветление, а 4 милиони денари за поставување нови линии на улично осветление.

Арсовски додаде дека дневно, во согласност со овие договори, со кои се исцрпени за 103 дена 11 милиони денари, додека траела реализацијата, се трошеле 106.796 денари, што практично е неизводливо и јавно запраша како е можно да се изработат за 103 дена овие три договори во висина од 11 милиони денари?

„Еве ова е начинот на испумпување на парите на граѓаните или, што би рекле, класично перење пари“, изјави Арсовски.

Во согласност со овие информации и јавно достапни документи на интернет-страницата за јавни набавки, Арсовски ги повика антикорупционерите да се разбудат и да не спијат, ја повика Општината и новиот градоначалник да направат ревизија, како и Јавното обвинителство по допрен глас да отвори случај или овие јавно достапни документи да ги прегледа, па потоа да побара документи од Општината доколку имаат да им достави.

Криминалот што СДСМ го метастизира во целата држава мора да заврши и да биде санкционирован, додаде Арсовски.