Разрешувањето на министерот за европски прашања, Орхан Муртезани, не е реформа. Тоа е политичка шминка. Обид да се создаде впечаток дека нешто се менува, додека суштински, ништо не се менува.Проблемот е во владата како целина, во нејзината неспособност, недостиг на визија и бегање од одговорност, се менува Муртезани ама изолацијата од ЕУ останува, рече потпреседателката на СДСМ, Јована Тренчевска, на денешната собраниска седница.

Таа нагласи дека додека Муртезани се жртвува за јавноста, неспособните министри остануваат на своите функции и продолжуваат да ја губат довербата на граѓаните.

„Ова е класичен пример на политички театар: една жртва за да се сочува системот на неуспех. Дека за неуспехот на патот кон европските интеграции е виновен еден човек, а не Владата која нема капацитет да спроведе реформи, нема храброст да преземе одговорност, нема контрола врз институциите, нема резултати во економијата, здравството, образованието, социјалната заштита, во подобрувањето на животниот стандард на граѓаните“, објасни Тренчевска.

Потпретседателката на СДСМ појасни дека причината за застојот во европските интеграции не е личноста на Муртезани, туку недоволниот капацитет и резултати на Владата како целина и немањето желба за реформи и продолжување на европскиот пат.

„Исто е кој е министер, нема никаква разлика. Шемата е криминални тендери за профити. Без ралзика кој е министер. Овие решенија се само извршители“, рече потпретседателката на СДСМ, Јована Тренчевска.

Во просториите на Министерството за јавна администрација денеска се одржа предновогодишен брифинг со претставници на медиумите, на кој министерот за јавна администрација, Горан Минчев, ги презентираше клучните резултати од работата на Министерството во текот на 2025 година, како и приоритетите и реформските активности што следуваат во наредниот период.

Брифингот беше можност за отворен дијалог, поставување прашања и размена на мислења во однос на процесите на реформа на јавната администрација.

Министерот Минчев истакна дека 2025 година претставува година на важни и системски промени, кои имаат за цел изградба на професионална, ефикасна и департизирана јавна администрација, во согласност со европските стандарди.

„Наша обврска кон граѓаните и кон јавноста е да бидеме прецизни и одговорни, и за сработеното и за тоа што следува. 2025 година беше година на суштински, а не козметички реформи во јавната администрација,“ нагласи министерот Минчев во своето обраќање.

На брифингот беа презентирани клучните законски и институционални реформи, меѓу кои донесувањето на системските закони од областа на јавната администрација, унапредувањето на управувањето со човечките ресурси, јакнењето на капацитетите на административните службеници, дигитализацијата и подобрувањето на транспарентноста и отчетноста на институциите.

На крајот од брифингот, министерот им се заблагодари на медиумските претставници за нивниот интерес, професионалност и континуирано следење на реформските процеси, посакувајќи успешна нова година и продолжување на соработката и отворениот дијалог и во 2026 година.

Претседателката Гордана Сиљановска-Давкова по повод големиот христијански празник Христовото раѓање – Божиќ, упати честитка до д-р Киро Стојанов, Скопски бискуп и Епарх Струмичко-скопски и до сите верници кои го прославуваат Божиќ според Грегоријанскиот календар.

„Со особено задоволство, на сите верници кои го прославуваат Божиќ според Грегоријанскиот календар, срдечно Ви го честитам денот на Христовото раѓање – Божиќ.

Нека овие светли празнични денови Ви донесат добро здравје, духовен мир и радост, исполнувајќи ги Вашите домови со спокој, љубов и топлина. Божиќ, како еден од највозвишените христијански празници, нè потсетува на вечните вредности: солидарноста, човечноста и надежта, коишто ги зближуваат луѓето и ја зајакнуваат вербата во подобра иднина.

Во овие зимски денови, божиќните празници нека бидат поттик за чинење добри дела и взаемно почитување. Да даруваме насмевки, да негуваме човечка блискост и да бидеме носители на ведрина и позитивна мисла во секојдневието, споделувајќи радост со сите околу нас. Честит Божиќ!“, пишува во честитката.