Македонија
(Видео) Арсовски: Струмица стана како дивиот запад, а МВР молчи за инцидентите

МВР и Оливер Спасовски 24 часа молчат за инцидентите во Струмица, град кој стана како дивиот запад, изјави на прес-конференција портпаролот на ВМРО-ДПМНЕ, Димче Арсовски.
„Вчера се случи брутална тепачка во центарот на Струмица, која беше документирана со видео запис и од онашто можеше да го види јавноста е згрозувачко. Струмица од мирен град, стана див запад, небезбеден град, каде што ордите кои се чувствуваат блиски до Заеви можат да нападнат или пак да се степаат кого сакаат. Имено, МВР веќе 24 часа молчи и не излегува со детали, а целата јавност веќе ги знае деталите и ги пишува“, изјави Арсовски.
Како што рече, тепачката се случила само стотина метри од полициската станица, во центарот на градот, а наликувала на обид за убиство. На видеото се гледа дека и деца сведочат на истата тепачка, вели Арсовски.
Половина час претходно имало друга ситуација пришто дошло до напад со разни предмети и ладно оружје кон граѓани кои јавно се јавија на социјалните мрежи. Повторно и во таа ситуација, полицијата на Оливер Спасовски ја немало никаде да ги заштити граѓаните, обвини Арсовски.
„Она што ја интересира јавноста е следното. Според пишувањата на медиумите, едно од вмешаните лица било обезбедувањето на Зоран Заев, а МВР сеуште молчи и нема одговор дали е или не е вмешано истото лице за кое се пишуваше? Дали обезбедувањето на Заев ја искористило силата и влијанието да учествува во брутални тепачки кон граѓани? Зошто СДСМ и МВР молчат дали е вмешан или не е вмешан во оваа брутална тепачка обезбедувањето на Заев и дали можеби се обидуваат да сокријат и заштитат некого?“, праша Арсовски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Муцунски за отворањето генерален конзулат во Корча: Време е да им се доближиме на Македонците во Албанија

Министерот за надворешни работи и надворешна трговија, Тимчо Муцунски, попладнево преку социјалните мрежи информираше дека Владата на денешната седница донела одлука за отворање Генерален конзулат во Корча, Република Албанија.
„Грижата за Македонците во Албанија не ја покажуваме со зборови, туку со конкретни дела. Македонците од Мала Преспа, Подградец, Голо Брдо и Гора се предалеку од Тирана, време е да им се доближиме“, истакна Муцунски.
Тој појасни дека со оваа одлука, македонските државјани кои живеат во овие области ќе добијат побрз и полесен пристап до конзуларни услуги, како и поддршка за културни, образовни и економски врски.
„Целиме кон посилна грижа за интересите на нашите граѓани. Брз, достапен и квалитетен сервис. Ова се конкретни чекори, не празни зборови“, подвлече Муцунски.
Според појаснетото од неговиот кабинет, генералниот конзулат ќе има јурисдикција врз подрачјата Корча, Мала Преспа, Подградец, Голо Брдо и Гора, и ќе работи во целосна координација со Амбасадата во Тирана. „Неговите клучни надлежности ќе опфаќаат обезбедување конзуларни услуги, економска и културна промоција, како и унапредување на билатералната соработка во поширокиот регион“.
Македонија
УЈП со повик за исполнување на ДДВ обврските: евидентирана е загрижувачка состојба

Управата за јавни приходи информира дека заклучно со 25 јули 2025 година евидентирана е загрижувачка состојба во однос на исполнувањето на обврските поврзани со данокот на додадена вредност (ДДВ).
„Според последните податоци: не се поднесени ДДВ-пријави од 142 месечни и 2.134 тримесечни обврзници. Пријавен, но неплатен ДДВ-долг е евидентиран кај 1.326 месечни и 7.748 тримесечни обврзници.
Директорката на Управата за јавни приходи, Елена Петрова, со порака: „Непочитувањето на законскиот рок е сериозен прекршок. Сите обврзници кои не поднеле ДДВ-пријава или не го платиле ДДВ-долгот се повикуваат итно да постапат согласно законските прописи. Даночната дисциплина не е избор, туку законска обврска и одговорност на секој граѓанин и компанија, темел за функционална држава.“
Управата за јавни приходи, како што додаваат во информацијата, веќе доставила персонализирани известувања до сите ДДВ-обврзници кои имаат пријавен, а ненаплатен долг за соодветниот даночен период.
„Преку координирано постапување и интензивна комуникација со даночните обврзници и со сметководителите, се спроведува целосен сет активности и мерки — со цел да се избегнат блокади на сметки и дополнителни трошоци за присилна наплата. За секој ден на задоцнување, се пресметува камата во износ од 0,03% од преостанатиот долг. По доставата на опомените, управата ќе пристапи кон присилна наплата кај сите обврзници кои нема да го подмират долгот доброволно. Со цел навремено информирање и исполнување на обврските, како и обезбедување солидна даночна историја, УЈП останува во постојана комуникација со сите релевантни страни“.
Македонија
Владата донесе одлука за промена на таблиците на службените возила и отворање на конзулат во Корча

Владата на денешната 97 седница донесе одлука сите државни институции да ги променат регистарските таблици на службените возила со новите таблици со боја најдоцна до 15 септември 2025 година. Оваа одлука е во насока на уште едно реализирано ветување пред граѓаните со цел поголема отчетност, транспарентност и ставање крај на злоупотребите кои со биле пракса во минатото, соопшти владината служба.
Дополнително, Владата на предлог на Министерството за надворешни работи и надворешна трговија донесе одлука за отворање на генерален конзулат во Корча со јурисдикција во целиот регион. „Граѓаните мора да имаат брз и ефикасен сервис и услуги, поддршка за културни, образовни и економски врски.
Владата продолжува со конкретни мерки и политики кои имаат за цел да ја потврдат вистинската грижа за подобрување на стандардот и враќање на довербата на граѓаните во институциите“.