Македонија
(Видео) Арсовски: 23 надворешни советници на Заев го чинат народот 246.000 евра годишно

Дваесет и три надворешни советници на Заев го чинат народот 246.000 евра годишно, обвини портпаролот на ВМРО-ДПМНЕ, Димче Арсовски.
„Ништо не може да го испере луксузот на Зоран Заев и неговите советници во кабинетот во Владата. Над 20.000 евра секој месец одат за нето-плати на советниците на Зоран Заев, кои се 23, за кои никој ништо од граѓаните не знае што работат и за што ги трошат парите на граѓаните. Тоа се над 240.000 евра годишно, кои граѓаните ги даваат за советите на тие 23 што му ги даваат на Заев, а резултатот од тие совети е катастрофален, како што може да видиме изминатите три години. Или тие не знаат да го советуваат и му се лоша кадровска политика, што е поверојатно, или Зоран Заев нема капацитет да разбере што го советуваат и да ја води државата, што во пракса се покажа дека е точно“, рече тој.
Арсовски вели дека Љубе Бошковски рекол дека на сопствен трошок имал средби со потенцијални инвеститори, а во Република Македонија, вели Арсовски, за жал и за волја на вистината, нема ниту една единствена инвестиција донесено во изминатите три години.
„Ако навистина на свој трошок има средби г. Бошковски, кој му е советник на Зоран Заев, со потенцијални инвеститори, имајќи го на ум резултатот изминативе три години, каде што ни една инвестиција не е влезена, лично јас топло би му препорачал да не си ги троши сопствените пари бидејќи не може една инвестиција да донесе што, пак, е резултат дека Македонија воопшто не е привлечна за инвеститори“, рече Арсовски.
Ниту еднаш, додаде тој, не слушнавме изминативе три години што работат овие 23 советници на Заев и што го имаат советувано.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
За еден месец, 80 лица се сретнаа со министерот за здравство Алиу преку „Отворен кабинет”

Во изминатиот месец 80 граѓани преку алатката „Отворен кабинет“ се сретнаа со министерот за здравство Азир Алиу.
Барањата, предлозите и сугестиите на граѓаните се предмет на системско постапување во рамки на Министерството за здравство, односно тие се анализираат и проследуваат за натамошно постапување, велат од Министерството.
„До овој момент одговорено е и постапено е по 29 отсто од барањата, за еден дел потребни се системски унапредувања кои веќе се иницирани, додека за останатиот дел формирани се комисии за поефикасно постапување“, се наведува во соопштението.
За потсетување, министерот Алиу во текот на утрешниот ден е на терен во Штип, во рамки на иницијативата „Мобилен кабинет“, каде од 12 до 14 часот ќе има средба со граѓани во просториите на Клиничката болница-Штип и сите заинтересирани граѓани ќе имаат можност директно да ги споделат своите искуства, проблеми или предлози поврзани со здравствениот систем.
За учество на овие средби потребна е претходна пријава преку платформата „Отворен кабинет“, која е достапна преку интернет страницата на Министерство за здравство: https://zdravstvo.gov.mk/
Македонија
Шукова: Идејата за железница покрај кејот на Вардар е исклучително погрешна

Идејата за железница покрај кејот на Вардар е исклучително погрешна, смета Каја Шукова од СДСМ, која е кандидат за градоначалник на Скопје. Според неа, тоа е последното нешто што му треба на Скопје.
Како што вели Шукова, кејот на Вардар е едно од ретките места што им преостануваат на граѓаните за мир и рекреација од хаосот на секојдневието во градот.
„Да се уништи тој простор со шини и бучава би било културен и еколошки вандализам. Граѓаните на Скопје заслужуваат уреден кеј со велосипедски и трим-патеки, урбана опрема, зеленило и чист воздух. Тоа е визијата што ќе ја бранам, кејот како градска оаза за спортување, пешачење, семејни прошетки и живот. Што му треба на Скопје? Сериозен, ефикасен и еколошки јавен транспорт. Наместо да се фрлаат нереални идеи, кои звучат добро на хартија, а се катастрофа во реалноста, ќе предложиме нов, модерен систем на јавен превоз, кој ќе биде брз, достапен, чист и одржлив. Ќе го дигнеме јавниот превоз од пепелта во која ВМРО-ДПМНЕ го остави да тоне четири години. Моја заложба како кандидатка за градоначалничка е јасна – Скопје ќе биде град за луѓето. Град на велосипедисти, мајки со деца, спортисти, рекреативци, ученици, пензионери“, објави Шукова на „Фејсбук“.
Македонија
Затворот во Куманово без вода, вицепремиерот Фетаи вети решение

Затворот во Куманово подолго време се соочува со недостиг од вода за пиење, а вицепремиерот задолжен за политики за добро владеење, Арбен Фетаи, вети решение.
„Вицепремиерот Фетаи ги сослуша предизвиците со кои се соочува оваа институција, која подолг период се справува со недостиг на вода за пиење – проблем за кој тој ќе се обиде да најде решение што е можно побргу“, соопштија од неговиот кабинет по посетата на затворот.
Фетаи го оценил затворот во Куманово како пример за добро менаџирање под новото раководство.
Се разговарало и за можноста за зајакнување на здравствената поддршка за осудените лица, особено во делот на менталното здравје, во соработка со Министерството за здравство.
„Пенитенцијарниот систем е една од клучните столбови на правната држава и ние сме посветени на негово подобрување и развој во согласност со европските стандарди“, рече Фетаи.