Македонија
(Видео) Борисов на средбата со Заев: Убеден сум дека Радев ќе ви каже дека ништо не може да се направи
Поранешниот премиер на Бугарија и актуелен претседател на партијата ГЕРБ, Бојко Борисов, на средбата со премиерот, Зоран Заев, рече дека не верува оти денеска во Софија ќе биде постигнат некаков договор.
„Денес ќе имате многу состаноци. Убеден сум затоа што ги познавам луѓето што ќе ги сретнете, особено Радев, дека тие ќе ви кажат оти без парламент ништо не може да се стори. Сегашната привремена влада ги има сите права и може да преговара со вас. Нов договор ако не го сакаат нашиот. Но, тие ќе бегаат од одговорноста како и секогаш. Во исто време евро-атлантските партнери лажат дека се за членство на Северна Македонија во ЕУ“, рече Борисов.
Според Борисов, ако не се најде решение меѓу двете земји, ќе се мразат генерации млади Бугари и Македонци.
„Ако не најдеме решение, генерации Бугари и Македонци ќе се мразат едни со други“, рече тој.
Сепак, Борисов изрази надеж дека привремениот кабинет на претседателот Румен Радев ќе ја стави одлуката за европската интеграција на Северна Македонија на следната седница.
Заев, придружуван од вицепремиерот Никола Димитров и од министерот за надворешни работи, Бујар Османи, денеска е во посета на Софија. Како што соопштија од Владата, целта на посетата е интензивирање на напорите за наоѓање решенија за отворените прашања и за деблокада на европската интеграција на Македонија.
Посетата на Софија почна со средбата со Борисов.
„Нашите народи се многу блиски и насочени на соработка, нема да дозволиме да се развива омраза меѓу младите. Работната агенда во Софија ја почнавме со раководството на ГЕРБ и мојот пријател Бојко Борисов со кого изразивме желба како континуитет на претходните позитивни искуства со нова динамика да продолжи поддршката на евроинтеграциските процеси на Северна Македонија и на Западен Балкан“, напиша Заев на „Фејсбук“ по средбата.
Тој додава дека Софија има особено значење за македонската интеграција бидејќи таму биле поставени контурите на договорот од Преспа за време на ЕУ-самитот за Западен Балкан во 2018 година.
„Како чекор кон градење пријателството и доверба, добредојдена е идејата за организирање форум меѓу младите, подмладоците и младинските организации од двете земји за да разговараат за заедничката иднината. Тоа е наша обврска како политички лидери – да бараме решенија за младите и нивната иднина“, напиша Заев.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Камчев: Реконструкција на водоводната мрежа и изградба на модерни забавни паркови за децата во Валандово
Ви благодарам на поддршката којашто ја добивме во првиот круг. На 2 ноември одиме на голема победа за Валандово, за целата општина, за сите населени места, истакна Ѓоко Камчев, кандидат за градоначалник на општина Валандово од редовите на ВМРО-ДПМНЕ, кој се обрати од денешниот настан одржан во Валандово.
Камчев истакна дека во наредните 4 години ќе се реализираат важни проекти кои ќе го подобрат животот на граѓаните во Валандово. Тој најави реконструкција на водоводната мрежа во сите населени места како и изградба на забавни паркови за децата во сите населени места.
„Ќе имаме можност да ја реализираме програмата, да го реализираме она што го ветуваме уште пред првиот круг, да ја реконструираме водоводната мрежа во сите населени места, да изградиме модерни забавни паркови за децата во сите населени места, да направиме еден вистински развој на општината, да ја придвижиме економијата“, вели Камчев.
Камчев им се заблагодари на граѓаните за постигнатиот резултат во првиот круг и ги повика во вториот круг масовно да излезат на гласање и да го заокружат бројот 9 за развој на општина Валандово.
Македонија
Богдановиќ: Герасимовски ги пушти низ вода сите што од СДСМ гласаа за него во првиот круг
Герасимовски ги пушти низ вода сите што од СДСМ гласаа за него во прв круг, објави поранешниот градоначалник на Општина Центар, Саша Богдановиќ.

„Чекам денес да се јават сите душегрижници кои коси кубеа за Горан како голем сдсмовец. Истите ги пушти низ вода а посебно подржувачите, членовите и симпатизерите на СДСМ во Центар. Ги пушти низ вода сите што од СДСМ гласаа за него во прв круг. Не е ни чудо и претходно менуваше партии. А тоа го покажуваат и бројките за листата за Град Скопје и кандидатот Каја Шукова.
Од машинерија направи моторкултиватор. И тоа само со единствена негова цел и интерес“, објави Богдановиќ.
Македонија
Министерството за здравство со итни мерки поради зголемениот ризик за здравјето на луѓето од отпадот во Скопје
Министерството за здравство усвои препораки и мерки во врска со актуелната состојба со отпадот во Скопје.
Препораки до населението:
Да се одржува лична хигиена (користење на ракавици, маска, миење раце, користење дезинфициенс за раце после фрлање на отпад);
Совесно одлагање на отпадот (во контејнерите, кабастиот отпад на соодветен начин а не во контејнерите и сл.)
Внимателно ракување, селектирање, собирање и фрлање на отпадот:
Затварање на капаците на кантите при фрлање на отпадот;
Да се избегнува физички незаштитен контакт со отпадот;
Да се избегнува стагнирана (застоена) вода и исцедок од отпадот;
Внимание при излегување со домашни миленици да не дојдат во допир со отпадот и исцедок од истиот;
Да не се фрла отпад надвор од одбележаните места за собирање на истиот;
Да не се фрла отпад на нелегални депонии;
Заштита и намалување на штетната изложеност на сите работници кои доаѓаат во контакт со отпадот (опрема за лична заштита).
МЕРКИ
Непосредни, брзи и акутни
Итно и неодложно отстранување на одложениот и расфрлан отпад во и надвор од контејнерите со сите расположиви технички, човечки и финансиски ресурси;
Итна мобилизација за собирање и отстранување на најголемите купишта во населени места со најголема изложеност; приоритет: болници, домови за стари лица, основни и средни училишта, паркови и игралишта;
Итно, вонредно испирање, дератизација, дезинфекција и дезинсекција на местата со расфрлан отпад и контејнерите;
Каде не е можно ова, да се постават физички времени бариери (мрежи) за да се спречи пристапот на глодари и улични животни;
Дислокација на контејнерите – подалеку од почести патики на движење на луѓето и особено подалеку од детски игралишта, училишта, градински или здравствени институции;
Редовен транспорт и празнење на контејнерите (минимум еднаш дневно во погусто населените делови од градот);
Задолжително затворање на капаците на контејнерите;
Итна набавка на потребната опрема особено соодветен број на контејнери (механизација во континуитет);
Заштита и намалување на штетната изложеност на сите работници кои доаѓаат во контакт со отпадот (опрема за лична заштита) вклучително и задолжителна вакцинација; тренинг за правилно ракување и известување за повреди;
Интензивен надзор за заразни заболувања: засилено пријавување со епидемиолошко истражување (фокус на дијареи, случаи на лептоспироза, хоспитализирани пациенти со зоонози и слично);
Едукација на населението за здравствените ризици поврзани со овој проблем и препознавање на симптомите поврзани со истото;
Јавна комуникација: предупредувања и практични совети до граѓаните (лична и колективна хигиена, како да ја чуваат храната, да избегнуваат стагнирана вода, да избегнуваат физички контакт со отпадот или исцедокот, како да пријавуваат нелегални депонии).
Долгорочни мерки
Интегриран систем за управување со комунален отпад (редовно отстранување, навремена набавка на потребна опрема, контејнери и механизација);
Имплементација на систем за управување со цврст отпад преку смалување, повторна употреба, рециклирање и регенерација;
Постојана едукација на населението за примарна селекција на отпадот, во најмала рака на органски и неоргански отпад и совесно одлагање на отпадот (во контејнерите, кабастиот отпад на соодветен начин а не во контејнерите и сл.);
Образовни програми за граѓаните и вклучување на локалните заедници во решавање на проблемот (на пример, механизми наградување за селекција/откуп).
Контролни и регулаторни политики – казнување за несовесно одлагање на отпадот, чести локални инспекции, програми за често и редовно чистење на јавните простори и улици (прво механичко отстранување на отпадот со метење, потоа миење).

