Ако Талат Џафери и директорот на „Службен весник“, Мартин Костовски, го објават договорот без потпис на Иванов, ќе се соочат со затвор, изјави денеска пред судот Димче Арсовски, портпарол на ВМРО-ДПМНЕ.

„Џафери и Костовски најавувајќи дека ќе ги објават во ‘Службениот весник’ без потпис од претседателот Иванов законите за ратификација на срамниот договор помеѓу Република Македонија и Грција, како и законот за јазици, ќе го прекршат најсрамно законот и Уставот. На Џафери и Костовски, доколку го направат истото за едниот закон, им се заканува затворска казна од најмалку 5 и пол години за злоупотреба на службената должност и самовластие, а исто така толкава затворска казна им се заканува и за другиот закон доколку го објават во ‘Службениот весник’ без потпис од претседателот Иванов“, рече Арсовски.

Тој рече дека доколку доколку дојде до тоа, двајцата не само што ќе бидат оспорени пред Уставниот суд туку тие и ќе се соочат со затворска казна од најмалку 11 години по човек.

„Да ги потсетиме Костовски и Џафери дека кривичното дело што е сторено никогаш не застарува.Државните и јавните функционери се избрани да го почитуваат законот и да работат според него. Во спротивно, ние ќе ги искористиме сите правни можности и мерки да бидат истите соодветно казнети“, рече портпаролот на ВМРО-ДПМНЕ.