Во врска со прашањата за промените во составот на пратеничките групи, претседателот на Собранието, Африм Гаши, денес бил официјално известен за промените во составот и раководната структура на пратеничката група на „Вреди“.

„Во согласност со известувањето: пратеникот Беким Ќоку е назначен за координатор на пратеничката група на ВЛЕН. Заменици-координатори се пратениците Мерита Колчи Коџаџику и Аднан Азизи“, соопштија од Собранието.

Сегашниот состав на Пратеничката група на „Вреди“ е: Африм Гаши, Аднан Азизи, Беким Ќоку, Калтрина Беќири, Имерлије Салиу, Саранда Имери, Фериде Хаџиу, Мерита Колчи Коџаџику и Беким Сали.

Досегашен координатор на пратеничката група „Вреди“ беше Халил Снопче, кој доаѓа од крилото на Алијансата на Албанците, предводено од Арбен Таравари.

Претходно, пратеничката група беше составена од 14 пратеници.

По излегувањето на Алијансата за Албанците на Арбен Таравари од Владата и од коалицијата „Вреди“ сите места отстапени на албанскиот владин партнер остануваат за коалицијата „Вреди“. Министерот за животна средина Изет Меџити вели веќе се подготвуваат за кадровските измени.

„Првин треба да ја констатираме оставката на Таравари. Она што е битно, сите позиции што ги има Алијансата за Албанците ќе останат во рамките на ‘Вреди’. Ќе направиме анализа, ќе ги дадеме најдобрите и најподготвени за тие позиции“, рече министерот Меџити денес при посетата на Чаир, каде што почнаа градежни работи за нов водоводен и канализациски систем на улицата Дижонска и нејзините краци.

Најавата за оставка само од Таравари, за Меџити е доказ дека Таравари сам ја донел одлуката да не остане во „Вреди“ и да излезе од Владата.

„Тоа што самиот најавува оставка, но не и за другите функционери, покажува и докажува дека има донесено одлука, која не кореспондира со членството и со структурите на партијата. Има видливи поделби и веќе ги гледаме. Секојдневно има разни размислувања, непочитување на одлуката на претседателот, несфатлива им е одлуката, затоа веќе е видлива поделбата во Алијансата за Албанците“, рече министерот Меџити.

Меџити очекува прелевање на членството од Алијансата за Албанците во „Вреди“ оти одлуката на Таравари се покажало дека е од лични побуди.

Додека се распаѓа владината коалиција, граѓаните се оставени сами на себе – цените растат, стандардот опаѓа, економската состојба е катастрофална, обвини потпретседателката на СДСМ, Кристина Костова.

„Животот е сѐ поскап, а платите не мрдаат. Маслото за јадење, млекото, лебот, јајцата – основните прехранбени производи – сѐ е поскапено. Пакување од 10 јајца, е веќе 113 денари, маслото за јадење над 90 денари, килограм брашно 49 денари, јогурт 87 денари, покачени се цените на млекото, сирењето. На пазарите исто така има посапувања на овошјето и зеленчукот. Црешите веќе станаа луксуз. Последните податоци за потрошувачката кошничка се поразителни, зголемена е за 836 денари за еден месец. Веќе три минимални плати се потребни за да може да се преживее“, рече таа.

Според неа, една просечно македонско семејство со две деца не можат да ги покријат основните трошоци во месецот, платите не стигнуваат од први до први.

„Како да се покрие храна, струја, вода, школо, лекови? Нема со што да се плати рата за кредит или кирија. Народот се мачи како да истурка месец за месец, додека власта се гоштева со манго, папаја, октоподи. Ова не се статистики, ова е суровата реалност на луѓето во Македонија. На пензионерите кои бројат денови до следната пензија. На младите семејства кои веќе не можат да си дозволат ни основни работи. На самохраните родители кои се борат со скапотијата. На сите оние што се трудат чесно да работат, а не можат да живеат пристојно“, рече Костова.

Таа додаде дека животот во Македонија никогаш не бил поскап, а Владата нема решение за високите цени.

„Премиерот не знаел дека цените биле поскапени, па ќе чекал, да видел какви ќе биле анализите, па ќе реагирале. Ова не е само несериозно, ова е директно признание за промашените владини политики и тотална негрижа за стандардот на луѓето. СДСМ со месеци наназад алармира и предлага конкретни решенија кои власта упорно ги одбива: Укинување ДДВ за храна, зголемување на минималната плата на најмалку 500 евра, зголемување на платите во приватниот сектор и поддршка за домаќинствата со најниски приходи“, рече Костова.