Македонија
(Видео) ВМРО-ДПМНЕ: Пендаровски велеше дека ако помилуваш криминалци, тогаш им должиш нешто – а тој помилуваше водач на нарко картел одговорен за мафијашки убиства

Стево Пендаровски што и да каже, после тоа си го погазува својот збор, велат од ВМРО-ДПМНЕ.
„Во 2019 година ветуваше дека ако нема правда нема да има мир. Ветуваше дека тие кои што сториле криминал ќе одговараат неселективно. Велеше дека од позицијата претседател нема да му падне на памет да амнестира криминалци. Ај што не си додржа до зборот, туку помилуваше лице, кое според медиумите е лидер на нарко картел во Скопје одговорен за мафијашки убиства и нелегална трговија со дрога. Ако ова не е еден од најтешките облици на криминал, тогаш Стево Пендаровски има реален проблем со перцепцијата“, пишува ВМРО-ДПМНЕ.
Оттаму додаваат „да биде уште потрагично, Пендаровски во време на кампањата, со цел да придобие гласови од граѓаните, уверуваше дека ако помилуваш такви лица тогаш тоа значи дека нешто им должиш или ти помогнале да станеш претседател. Епа господине Пендаровски, дали помилувањето и комуникацијата со нарко босови сте ги правеле затоа што нешто им должите или ви помогнале да бидете избран за претседател?“
„Две недели се криете од јавноста и не давате ни еден одговор. Тоа кое што го објавуваме се ваши изјави и фотографии кои сами сте ги правеле и никој не ве терал со сила. Сте сакале-сте се сликале со нарко босови. Сте сакале-сте амнестирале водач на нарко банда. Тоа е ваш избор и затоа сега е ваша одговорност. Вие немате веќе ни кредибилитет, ни интегритет. Стево Пендаровски го погази достоинството на народот и на Македонија, Затоа е време за промени“, се вели во соопштението.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Сабри Азири: Бујар Османи поминал повеќе од 10 години на власт, но ниту еден ден за Чаир

Сабри Азири, портпарол на изборниот штаб на кандидатот за градоначалник на Општина Чаир од коалицијата „Влен“, Изет Меџити, на прес-конференција зборуваше за политичката кариера на Бујар Османи и отсуството на резултати за граѓаните на Чаир.
Според Азири, Бујар Османи поминал 3.672 дена на високи државни функции, и тоа како министер за здравство (27 јули 2008 – 28 јули 2011) → 1.096 дена, вицепремиер за европски прашања (31 мај 2017 – 30 август 2020) → 1.187 дена, министер за надворешни работи (30 август 2020 – 23 јуни 2024) → 1.389 дена, претседавач со ОБСЕ (1 јануари 2023 – 31 декември 2023) → 365 дена.
Вкупно, 10 години и 22 дена на министерски и извршни позиции, пресмета Влен.
Сепак, во текот на сето тоа време, Азири рече дека Османи ниту еден ден не посветил на чаирчани.
Тој посочи неколку факти кои, според него, ја покажуваат хипокризијата на Османи: Нула дена за чаирчани – два дена со Сергеј Лавров во Скопје. Нула дена за чаирчани – една недела со Никола Груевски во Будимпешта. Нула вработувања за чаирчани – додека сопругата е вработена во АЕК, сестрата во М-НАВ, а бизнисот на братот на Османи напредува.
„Ова е реалниот биланс на Бујар Османи по повеќе од една деценија на власт. Затоа, денес тој нема образ да им ја побара довербата на граѓаните на Чаир“, заклучи Азири.
Македонија
Поранешниот директор на струмички „Комуналец“ пријавен за злоупотреби и бесправна градба

Полицијата во Струмица до Основното јавно обвинителствоподнесе кривична пријава против З.Г. (56) од Струмица – поранешен директор на Јавното претпријатие за комунални дејности „Комуналец“ Струмица, против јавното претпријатие, против Г.Б. (52) од Струмица и против правно лице од Струмица поради постоење на основи на сомнение за сторено кривично дело „бесправно градење“ по член 244-а во врска со член 22 од Кривичниот законик.
Јавното претпријатие, застапувано од З.Г. и правното лице, застапувано од Г.Б., со заеднички дејствија изградиле објект од втора категорија, кој се користел како деловен објект, без издадено одобрение за градење од општина Струмица.
СВР Струмица поднесе кривична пријава против поранешниот директор и поради постоење на основи на сомнение за сторени две кривични дела „злоупотреба на службената положба и овластување“ по член 353 став 1 во врска со член 45 од Кривичниот законик.
Во првиот случај, пријавениот З.Г. склучувал договори за закуп на простор пред објект – настрешница со правно лице од Струмица, која била бесправно изградена на зелена површина. Договорите биле склучувани со непосредна спогодба иако станувало збор за простор за кој согласно Законот за комуналните такси е потребна согласност од општината и наплата на комунална такса. На тој начин била нанесена штета на буџетот на општина Струмица, а ЈПКД „Комуналец“ Струмица остварило финансиска корист во вкупен износ од 847.126 денари.
Во вториот случај, во периодот од 2020 до 2023 година, З.Г. од истото правно лице вршел набавка на храна и угостителски услуги без спроведување на постапка за јавна набавка согласно Законот за јавни набавки, со изговор дека храната била за работници кои работеле прекувремено. Во фактурите нема детално објаснување за набавките, ниту поткрепувачка документација за тоа кои лица користеле оброк и дали работеле ноќе или прекувремено, а претпријатието немало план за работа во смени. Со ваквите дејствија била причинета штета на претпријатието во износ од 307.800 денари.
Македонија
Мисајловски и Хелез на првиот академски час на Воената академија: Академијата е симбол на знаење и лидерство, со високо реноме и квалитетна настава

Денеска (01 октомври), министерот Владо Мисајловски и министерот за одбрана на Босна и Херцеговина, Зукан Хелез кој престојува во официјална посета на земјава присуствуваа и се обратија на првиот академски час на Воената академија, со што и официјално започна новата учебна година за идните офицери.
На новите питомци, министерот Мисајловски им порача да бидат горди што се дел од етаблирана и регионално позната Академија која ги создава идните лидери за македонската Армија и за вооружените сили на неколку земји од регионот.
„Вие сте срцето на татковината, од вас ќе излезат нови генерали, офицери. Гордост е да се види оваа слика со македонската униформа, но и со питомците од пријателски земји кои се заедно со нас“, им порача министерот Мисајловски на питомците. Додаде дека со вклучувањето на питомци од Босна и Херцеговина и Црна Гора, ја развиваме регионалната соработка, а Академијата е симбол за знаење и лидерство. „Бидете силно ангажирани, покажете како се сака татковината зашто вие сте иднината на Армијата“, рече Мисајловски.
Министерот Хелез истакна дека целите – стабилност, мир и членство во евроатлантските структури не се само политички аспирации, туку потреба за нашите народи за сигурност, просперитет и достоинствен живот. „Министерството за одбрана и вооружените сили на Босна и Херцеговина продолжуваат со интензивните реформи, за да бидеме целосно интероперативни со силите на НАТО и во согласност со европските стандарди. Во тој процес, искуствата и поддршката од земјите како вашата кои поминаа низ тие фази за нас се драгоцени“, рече министерот.
На првиот академски час се обрати и деканот на Воената академија, полковникот Ненад Танески на питомците им порача дека „униформата која ја носите е симбол на чест, доверба и служба, кон татковината и кон регионалната безбедност и мир“, укажувајќи дека средбата во ист состав, по четиригодишното образование, кога питомците ќе бидат промовирани во потпоручници, ќе биде најдобрата потврда за заедничкиот успех.