Пет лица се приведени, а запленета е дрога во вкупна проценета вредност од околу 800.000 евра, соопшти полицијата.

Марихуаната била одгледувана во фирма за производство на канабис за медицински цели во Битола, и покрај тоа што Владата минатата година им ја одзела дозволата.

„По добиени информации дека во правен субјект за производство на канабис во медицински цели во Битола се врши производство на марихуана, и покрај донесената одлука и решение од страна на Владата на РСМ на 25.5.2021 за одземање на дозвола за одгледување  канабис за медицински цели, објавена во ‘Службен весник’ бр.121 од 3.6.2021, на предлог на Министерството за здравство, поради постапувања спротивни на Законот за контрола на опојни дроги и психотропни супстанции, кои биле констатирани при вонредна контрола извршена на 10.4.2021 од страна на Комисијата за оценување на исполнетост на условите за одгледување канабис за медицински цели во содејство со МВР, обезбедена е наредба за претрес од Основен суд Битола“, информираа о МВР.

При извршениот претрес, во една од просториите затекнати се две женски лица во момент на обработка и пакување на сув цвет од канабис, додека во други простории на фабриката е пронајдена голема количина на сув цвет од канабис, соопшти портпаролот на МВР Сузана Прањиќ-Талевска.

Во координација со Јавен обвинител од Основното јавно обвинителство Битола, пронајдената дрога е спакувана во 67 вреќи во вкупна тежина од околу 250 килограми. Петте лица се приведени во полициска станица, а по комплетирање на целокупната документација против сите инволвирани лица во нелегално производство на наркотична дрога марихуана ќе биде поднесена кривична пријава.