Македонија
(Видео) Заев го повика претседателот да донесе одлука за вонредна состојба

Претседателот на СДСМ, Зоран Заев, ја поздрави одлуката на Владата да побара вонредна состојба и го повика претседателот на државата да ја донесе одлуката за вонредна состојба.
„Се справуваме со еден од најголемите глобални предизвици, да го заштитиме здравјето и сигурноста на граѓаните во време на пандемија и ширење на коронавирусот. Во време кога целосно сме посветени и се бориме со широкораспространетиот вирус, пристигна и многу важна вест за иднината на нашата држава и врвен стратешки приоритет: Северна Македонија е веќе 30-та земја членка на НАТО!
Во вонредни околности Сенатот на Шпанија првпат гласаше од далечина, телематски само за нас, и без ниту еден глас против го ратификува протоколот за пристапување на Република Северна Македонија во НАТО. Со овој пријателски чин завршен е процесот на ратификации на протоколот во сите земји членки на алијансата во неверојатно тешки услови.
Испишавме историја за нашата држава и сите наши граѓани во тешко време кога сме фокусирани на заштита на здравјето и сигурноста на граѓаните. Успеавме да го оствариме тридеценискиот сон на многу генерации и покрај сите предизвици со кои денеска се соочуваме затоа сите се гордееме на овој историски успех. Ги остваривме заложбите на претходните генерации, ја обезбедивме сегашноста и ги загарантиравме сигурната и стабилната иднина на генерациите што доаѓаат по нас. Ова е верификација на вистинските државнички политики во изминатите 2,5 години. Уште од првиот ден од мандатот моравме да ѝ се посветиме на нашата земја и да ја вратиме на патот на интеграциите во ЕУ и НАТО. Сега темелите се поставени и продолжуваме напред, да градиме безбедна, стабилна, развиена земја, како основен услов за да може и економски посилно да се развива, за подобар живот на сите наши граѓани.
НАТО значи безбедни граници, стабилност и сигурност. Но, НАТО е и пазар од 4 милијарди евра годишно. НАТО е повеќе инвестиции, нови работни места, повеќе пари, повисок животен стандард за сите граѓани. Станавме дел од НАТО, на ред е вториот стратешки приоритет – членството во ЕУ“, рече Заев.
Според него, покажавме дека можеме да се соочиме со предизвиците. Сега е време сите заедно да се фокусираме на новиот предизвик, да го заштитиме здравјето на сите граѓани и заедно да се избориме со коронавирусот.
„Солидарноста и заедништвото се најсилното оружје за справување со каква било опасност. Затоа е исклучително важно да ги следиме и доследно да ги почитуваме мерките и препораките од надлежните институции. На тој начин да помогнеме во заштита на здравјето и спречување на коронавирусот. Уште еднаш ја поздравувам одлуката на Владата да побара воведување вонредна состојба.
Имајќи ја предвид сериозноста на ситуацијата, воведувањето вонредна состојба ќе придонесе за брзо и ефикасно да се спроведуваат мерките за заштита на здравјето на граѓаните, но истовремено и за економските мерки за помош кон стопанството и граѓаните.
Уште еднаш сакам да им се заблагодарам и да им оддадам јавно признание и почит на сите што учествуваат во борбата против овој вирус, здравствените работници, полициските службеници, припадниците на Армијата, службениците, институциите и медиумите. Државнички и одговорно е да бидеме единствени во дејствувањето, маката да ја споделиме, заедно сме посилни и секој граѓанин е важен. Граѓаните и нивното здравје да продолжат да ни бидат пред сѐ и заеднички да дејствуваме, да се издигнеме уште повеќе и ќе успееме во заедничката борба против овој вирус“, додаде тој.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Паника во Катланово и Петровец поради голем пожар, Ангелов смирува дека нема опасност да се запали бензинската

Попладново пожар изби и помеѓу Катланово и Петровец. Директорот на Дирекцијата за заштита и спасување Стојанче Ангелов вечерва во видео-изјава посочи дека пожарот е пресечен и не претставува закана за бензинската пумпа која е во близина.
„Пожарот кој што изби помеѓу Катланово и Петровец во близина на безинската пумпа е делумно локализиран, односно е пресечен и не претставува опасност за блиската бензинска пумпа. Се движи кон село Чифлик, а на негово ставање под контрола работат скопските пожарникари. Рано наутро ќе се упати и ер-трактор, а ќе упатиме и неколку возила. Се работи за непријатен пожар кој се наоѓа на непристапно место, но верувам дека утре пожарникарите ќе го стават под целосна контрола. Видлив е од автопатот и предизвикува вознемиреност, но граѓаните да не се плашат бидејќи не може да ја зафати бензинската пумпа“, изјави Ангелов.
Македонија
До 18 часот вкупно 29 пожари на отворен простор, гори уште на 14 места

До 18 часот вкупно 29 пожари на отворен простор, од нив 14 активни, четири под контрола и 11 изгаснати.
Како што информираат од ЦУК активни пожари има во Општина Василево, Радовиш и Берово – с. Нивичино (планината Голем Готен и Малешевските планини – нискостеблеста шума, смрека, грмушки и ниска вегетација), Општина Прилеп – с. Бешиште, Бешишки Рид, кон с. Градешница (опш. Новаци) и кон границата со Р. Грција (мешана шума), Прилеп и Кавадарци – помеѓу с. Царевиќ, Смолани, Радобил, Дрен, Галиште и Трстеник (мешана шума и ниска вегетација), Македонски Брод – помеѓу с. Црешево, Локвица и Крапа (деградирана дабова шума и грмушки, Желино – помеѓу с. Церово и Групчин (нискостеблеста и деградирана шума),Крива Паланка – с. Нерав (висока борова шума), Старо Нагоричане и Куманово – с. Облавце, Бељаковце, Довезенце, Орах и Ругинце (ниска вегетација), Битола – с. Велушина (ниска вегетација), Битола 2 – с. Миџитлија (ниска вегетација), Кичево – с. Горно Трско (ниска вегетација и ниска шума), Македонска Каменица – с. Косевица (борова шума), Струга – с. Ново Село и с. Делогожда (ниска вегетација и стрниште), Штип – помеѓу с. Драгоево и Селце (нискостеблеста шума, прнар и сува трева),Петровец – с. Ржаничино (ниска вегетација).
Пожарите кај Македонски Брод 1 – с. Грешница, Македонски Брод 2 – с. Латово, Карбинци – с. Јунузлија и кај Петровец – с. Средно Коњаре кај р. Пчиња се ставени под контрола.
Македонија
Алиу ветува 205 милиони евра за болници кои инспирираат доверба, а не страв

Верувам дека здравството е повеќе од систем. Тоа е нераскинливо морално ветувањето што си го даваме едни на други: дека кога најмногу ни треба, ќе има некој тука за нас“, порачува во видео обраќање министерот за здравство, Азир Алиу.
Тој нагласува дека тоа ветување денес има потреба да се врати во системот, но без импровизирани одлуки, туку со јасна визија. Без носталгија, со податоци и храброст.
-Визијата станува реалност со голем прв чекор: 205 милиони евра за болници кои инспирираат доверба, а не страв, вели министерот Алиу, додавајќи дека во Штип ќе се гради модерна клиничка установа и Факултет за медицина за идните генерации лекари.
-Во Тетово, болницата ќе добие современа медицинска опрема и два нови објекти, со што ќе прерасне во симбол на грижа и достоинство. Во Кичево, каде што болницата остана нереализирано ветување од минатиот век, од темел ќе градиме нова, светла, топла и достојна за секој од вас, вели министерот Алиу.
Тој истакнува дека ова е само почеток, бидејќи хоризонтот на неговата визија е многу подалеку.
-Да изградиме модерно, хумано и дигитализирано здравство. Ние не сме тука да чекориме по патеки од минатото кои не водат никаде, ние сме овде да градиме доверба за идните генерации. И заедно со вас, ќе ја направиме оваа визија реалност, порачува министерот за здравство, Азир Алиу во неговото видео обраќање.