Македонија
(Видео) Заев: Мицкоски пред бегството на Груевски се сретнал со Вучиќ и Орбан

Македонскиот премиер, Зоран Заев, изјави во интервју за сараевската „Н1“ дека актуелниот лидер на опозицијата, Христијан Мицкоски, пред бегството на Никола Груевски се состанал со српскиот претседател, Александар Вучиќ, и унгарскиот премиер, Виктор Орбан.
„Тој бил кај нив. Тоа е јавно објавено и притоа не е јасно за што разговарале. Остана тајна. Груевски побегна од Македонија преку Албанија, каде што го пречекало унгарско дипломатско возило по што ја минал границата со Црна Гора. Таму го чекале други унгарски дипломати, а потоа ја преминал границата со Србија и на крајот стигнал во Унгарија“, изјави Заев.
Додаде дека сѐ ќе биде објавено кога ќе заврши истрагата што се води во Македонија.
„Уверен сум дека Груевски ќе ја издржи казната за злоупотреби во Македонија“, рече Заев.
Тој не очекува заедно со грчкиот премиер, Алексис Ципрас, да биде добитник за Нобеловата награда за мир бидејќи вели дека има поважни работи од овој договор.
„За мене е голема чест што сум номиниран за оваа награда“, рече Заев и додаде дека номинацијата ја смета за афирмација на Македонија.
Заев во интервјуто заклучи дека историјата не смее да биде пречка кон иднината. Негира дека Грција побарала од Македонија да се отстранат спомениците, туку тие ќе бидат означени како европско богатство.
Повтори дека благодарение на договорите со Македонија и Бугарија, Македонија добила трајни сојузници.
„Кога станав премиер, Македонија беше во кавга со сите наши соседи, а веќе денес немаме отворени билатерални прашања со соседите, остана само прашањето за црквата, но и за тоа веќе се преземаат одредени чекори“, изјави премиерот Зоран Заев во интервјуто.
Раскажа и како изгледа двојазична седница на македонската Влада.
„Ставате слушалки и зборувате. Кога сака да каже поента и мисли дека подобро ќе се изрази на својот јазик, тогаш говори на албански. Тоа кажува дека не го остварувал своето право. Кога го добива правото што му следува, тогаш who cares. Луѓето се практични“, вели Заев.
Во емисијата тој истакна дека официјален став на Македонија е желбата за позитивно решение помеѓу Белград и Приштина, кое нуди траен мир, развој и напредок кон ЕУ.
„Не знаеме што договараат. Поминав низ тежок процес во преговорите со Грција. Не им е лесно на претседателите Александар Вучиќ и Хашим Тачи. Ги охрабрувам да најдат решение“, рече Заев.
Додаде дека регионот треба да соработува.
„Кога одш на патување во Сараево или Белград, можеш да спиеш каде сакаш. Никој не те чепка, само братство и единство. Ние на подрачјето на поранешната Југославија сме братски народи. Јас тоа го почитувам. Ја сакав Југославија и сонувам да бидеме сите заедно. Тоа ќе бидеме во Европската Унија“, рече Заев.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Времето денеска ќе биде сончево и многу топло, од утре засилен северен ветер, пороен дожд и грмежи

Времето денеска ќе биде сончево и многу топло со мала до умерена локална облачност. Ќе дува слаб до умерен ветер од јужен правец. Минималните температури ќе се движат од 11 до 19, а максималните од 26 до 38 степени.
Во Скопје, сончево и многу топло со мала до умерена облачност. Ќе дува слаб со умерен ветер од јужен правец. Минималната температура ќе биде 17, а максималната ќе достигне 38 степени.
УХМР информира дека од утре времето ќе биде сончево со мала до умерена облачност. Ќе дува умерен до засилен северен ветер, а дневната температура ќе опадне за 3 до 5 степени. Во попладневните часови ќе има услови за локална појава на нестабилност со пороен дожд и грмежи.
Македонија
Земјотресот на Света Гора почувствуван и во Македонија

Силниот земјотрес на Света Гора почувствуван и во југоисточниот дел на Македонија.
„Телеметриската сеизмолошка мрежа на Република Северна Македонија, на сеизмолошките станици инсталирани ширум нашата територија, одржувани од Сеизмолошката опсерваторија при Природно-математичкиот факултет во Скопје, денес 7 јуни 2025 година регистрираа серија на земјотреси чии епицентри потекнуваат од соседна Република Грција.
Според досегашните податоци со кои располага опсерваторијата, почувствуван е земјотресот во 14 часот и 46 минути чиј епицентар се наоѓа 290 km југоисточно од Скопје, со Рихтерова локална магнитуда M L 5.2.
Земјотресот беше почувствуван во југоисточниот дел на Републиката со интензитет од III степени според Европската макросеизмичка скала“, известија од Сеизмолошката опсерваторија.
Македонија
АХВ го одбележа 7 Јуни – Светски ден на безбедна храна

Aгенцијата за храна и ветеринарство и оваа година се приклучи и ја поддржува глобалната иницијатива и го одбележа 7 јуни, Светски ден на безбедна храна. Со едукативен и спортско рекреативен настан наменет за граѓаните и децата, денес, во паркот Авионче во скопската населба Ново Лисиче на присутните им беа поделени едукативни флаери за безбедноста на храната, а за најмалите се одржаа спортско-рекреативни игри преку кои се афирмираше безбедноста на храната и нејзиното значење.
На 10 јуни, во вторник, со поддршка и во соработка со Европската агенција за безбедност на храната – ЕФСА, Агенцијата за храна и ветеринарство ќе одржи настан за подигнување на јавната свест за безбедноста на храната на која ќе учествуваат реномирани претстставници од EFSA, од научните и други институции поврзани со прашпања кои се однесуваат на производството на храна и нејзината безбедност.
Годинашното мото на Светскиот ден на безбедна храна – 7 јуни е „Науката во акција“ и тоа денес не потсетува на важноста на науката како основна алка од синџирот на безбедна храна. Едноставно, тоа е дел без кој не се може и кој ги создава основите за креирање на политиките за безбедност на храната од страна на институциите, како што е и Агенцијата за храна и ветеринарство.
Преку едукативниот спортско рекреативен настан кој се одржа денес и настанот кој во соработка со EFSA ќе се одржи во вторник, АХВ и годинава активно работи на подигнување на свеста на граѓаните за важноста на безбедноста на храната и за превенирање и управување со ризиците со цел унапредување на нивното здравје.