Законот за употреба на јазиците, кој вчера го донесе Собранието, е сериозен придонес во градењето на концептот едно општество за сите граѓани, изјави денеска премиерот, Зоран Заев.

Како што истакна премиерот во обраќањето, се работи за наша и европска вредност, која ја добила поддршката од мнозинството граѓани на последните парламентарни избори, но и на локалните избори.

„Таа вредност, Македонија – земја на сите граѓани, е концепт и патоказ за нашата иднина. Се определивме за политики што ја градат Република Македонија како граѓанска држава на сите што живеат во неа: Македонци, Албанци, Турци, Срби, Власи, Роми, Бошњаци и сите други заедници“, истакнува Заев.

Како што рече премиерот, законот за употреба на јазиците е целосно во согласност со Уставот и амандманот 5, кои се донесени пред 17 години. Тој воедно додаде дека никој не e и не може да биде над Уставот.

„Со унапредувањето на правата за употреба на јазиците не губи никој, туку се овозможуваат услови за подобра комуникација меѓу граѓаните и институциите. Непречената комуникација на граѓаните е цивилизациска придобивка. Истовремено, овој закон целосно ја гарантира соодветната употреба на македонскиот јазик“, рече Заев.

Тој воедно додаде дека сега е време да се отфрлат политиките на поделби, раздор и конфликт, кои, како што велам, се во спротивност со нашите и европските вредности.

„Наша должност и одговорност треба да бидат интересите на сите граѓани, без исклучок. Нема разумно оправдување во блокадата на политичките процеси и на политичките институции, како што е Собранието. Наместо тоа, време е сите ние, политичарите, да ја преземеме одговорноста што им ја ветивме на граѓаните и да ги заокружиме реформските процеси во Република Македонија“, истакна премиерот во своето обраќање.