Македонија
(Видео) Заев: Инвестираме во изградба на инфраструктурата, градиме по план за граѓаните и за државата

„Инфраструктурата за една држава значи економски развој, ама значи и социјален стандард и достоинствен живот.Од тоа дали има добар пат за брз превоз на земјоделски производи од село во град, зависи судбината и заработката на земјоделецот. Од тоа дали има добар пат и добар ургентен центар може да зависи животот на некој пациент. А од тоа дали има вода и канализација може да зависи квалитетот на животот на цели семејства.Па дури и од ваков мост како овој позади нас, заради кој сме и тука, зависи безбедноста на граѓаните да си ги извршуваат секојдневните задачи. До него се гледа стариот кој сведочи за годините негрижа на претходната власт“, изјави лидерот на СДСМ, Зоран Заев во Кавадарци.
„Инфраструктурата која ја градиме ќе ни овозможи да се справуваме со кризи како оваа со коронавирус, но и да оставиме добра база за напредок на идните генерации да не почнуваат наново од нула. Кога пред три години ја презедовме одговорноста да ги водиме институциите, не дочека инфраструктурен хаос и негрижа.
Декада криминални политики на ВМРО-ДПМНЕ, парите да се трошат на стиропор, барок и споменици оставија тешки последици врз инфраструктурата, и промашени траси и тунели на кои едвај чаре им се наоѓаше.120 милиони беше финансиската штета само од автопатите Миладиновци – Штип и Кичево – Охрид. Парите на граѓаните ги есапеле како расипници, а не како домаќини. Трошеле како да ќе нема утре“, рече Заев.
Според него, со чесен, домаќински, транспарентен пристап почнавме со надминување на напластените проблеми и влеговме во развој и унапредување на инфраструктурата.
„Резултатите се конкретни и видливи. Денес се гради низ целата држава во сите региони подеднакво. Денес, речиси и да нема општина во државата во која во овие три години не е изграден или не е почнат со изградба некој капитален инфраструктурен проект.
Го решивме проблемот со автопатот Кичево-Охрид и обезбедивме дополнителни финансиски средства за реализација на проектот. Ги решивме наследените проблеми, го завршивме и го пуштивме во употреба автопатот Миладиновци – Штип. Градиме и експресен пат Штип – Радовиш кој треба да биде готов во 2022 година. Го изградивме експресниот пат Штип – Крупиште во должина од 14,3 километри, откако претходно ги решивме проблемите со експропријација, и за некои 10-тина дена би требало да е спремен. Активно се гради експресниот пат Крупиште – Кочани и за помалку од една година Штип и Кочани ќе подобро поврзани. Истиот тој пат ВМРО-ДПМНЕ го пишале во програма дека ќе го завршат. Очигледно е дека и на исток исто како во Битолско не ги знаат патиштата. Ги прошируваме капацитетите на меѓународните коридори, се проширува патната и граничната инфраструктура на клучните премини Ќафасан и Деве Баир“, вели Заев.
Тој додава дека се инвестира и во железницата, сектор кој комплетно беше заборавен од претходната влада на ВМРО-ДПМНЕ.
„Наследивме проблем со изградбата на пругата Битола – Кременица, го решивме и тој проблем и ја изградивме пругата во должина од 16 километри и вкупна вредност од 21 милион евра. Три години градиме по план. За да ни се развиваат селата подеднакво како и градовите, за секое населено место да е подобро поврзано со останатите, за да обезбедиме силен локален економски развој во секоја општина. Комуналната инфраструктура е важна за унапредување на квалитетот за живот на граѓаните и затоа сериозно вложуваме во неа. Низ целата држава, за три години изградивме преку 400 километри водовод и канализација. А во некои населени места за првпат се решава проблемот со вода за пиење.За три години се изградија и се пуштија во употреба пречистителни станици во Гевгелија, Прилеп, Струмица, Радовиш, Кичево и Кочани. По целата земја градиме и ќе продолжиме да градиме пречистителни станици, за да си ги исчистиме реките. Ги чистиме водите кои ни ги напојуваат плодните земјоделски полиња. Првпат по повеќе децении, инвестираме и во колекторскиот систем во Охрид, за да си го зачуваме драгоценото Охридско езеро.
Важна ни е природата, важна ни е животната средина и затоа сме посветени на гасификација на државата, за да имаме почист воздух и здрава животна средина.Во 2019 и 2020 година, и во услови на корона криза, заврши 80% од примарната и секундарната гасификација, проект кој се одолговлекуваше речиси 20 години. . Влегуваме во завршницата на реализацијата на гасоводните магистрали, и продолжуваме додека не донесеме гас во секој дом.
Ова, почитувани е сериозен, чесен и одговорен пристап. Градиме домаќински за сегашните, но и за идните генерации. Градиме за нашите најмали, досега изградени, реконструирани, проширени и опремени се 44 објекти на детски градинки низ целата држава. Инвестираме и во изградба, реконструкција и модернизација на над 30 објекти во јавното здравство, кое денес е главен предводник во борбата со коронавирусот и е буквално најважниот сектор.
Покажавме дека можеме и умееме. По 15 јули ќе покажеме дека можеме уште подобро, можеме уште повеќе.Можеме уште повеќе болници, градинки и училишта. Можеме уште подобро поврзување, на селата со градовите и на земјава со соседите.Градиме 260 км автопати. Градиме 300 км експресни патишта. Градиме 900 км локални патишта. Рехабилитираме повеќе од 1.500 км постоечки патни правци. Гасот како енергенс го носиме до домовите и компаниите. Уште повеќе за почист воздух, уште подобро за пониски сметки за енергија.
Продолжуваме со изградба на нови пречистителни станици, на нови водоводи и канализации. Развојот да го подигне стандардот на највисокото ниво. Градиме модерен нов Клинички центар во Скопје за уште повеќе да го зајакнеме здравствениот систем. Ова е нашата понуда пред граѓаните. Ова се решенија за проблемите, решенија кои го унапредуваат квалитетот на живот на сите граѓани.Граѓаните го препознаваат овој искрен, чесен и домаќински пристап на СДСМ и Коалицијата „Можеме“Затоа, на 15 јули масовно ќе застанат зад нашиот концепт за развој и ќе гласаат за број 3 за СДСМ и Коалицијата „Можеме“ за развојот на инфраструктурата да продолжи уште повеќе“, истакна лидерот на СДСМ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Филипче: СДСМ нуди чесни кандидати за градоначалници, кои се почитувани во заедницата

Претседателот на СДСМ Венко Филипче, на денешната прес-конференција упати критики до премиерот Христијан Мицкоски и неговите насоки околу тоа, како да работат градоначалниците на ВМРО-ДПМНЕ. Резултатите од тоа, вели Филипче, се катастрофално управување со општините од страна на ВМРО-ДПМНЕ. Спротивно на ова, нагласи Филипче, СДСМ нуди чесни кандидати за градоначалници кои се почитувани во заедницата.
„Јас го слушам примерот како дава насоки како да работеле градоначалниците и сметам дека тоа е многу погрешно. Сметам дека тоа доведе Скопје да стане страшно валкан и едноставно неубав град за живеење со нивната градоначалничка, Данела Арсовска, од која понатаму во текот на мандатот се обидоа да се дистанцираат, но јасно е дека не им успеаја диловите, па затоа и се скараа. Јас давам гаранција дека сите градоначалници на СДСМ ќе работат чесно и одговорно, со целосна поддршка и гаранција од мене и од партијата“, изјави Филипче.
Истакна дека СДСМ на претстојните локални избори настапува со постојната коалиција, со најдобрите кандидати кои уживаат кредибилитет во своите средини. Тие се подготвени да излезат пред граѓаните со реални и остварливи програми, големи развојни планови за крупните општини и микро-планови за решавање на секојдневните проблеми во помалите средини.
Во однос на вториот изборен круг, тој најави разговори и со партии од албанскиот блок.
Претседателот на СДСМ изрази жалење што власта не успеа да обезбеди мнозинство за измените на Изборниот законик. По одлуката на Уставниот суд со која беа укинати два члена, остана нерегулирано прашањето за независните листи на кандидати, што може да предизвика хаос и да ги загрози независните кандидати.
„ Ние помогнавме, го прифативме предлогот да се намали бројот на потребни потписи за пријавување на кандидатурите од 1% што го укина Уставниот суд, на 0,5%, што мислиме дека е фер и дека добро го регулира тој простор“, нагласи Филипче.
Тој додаде дека лично ја поддржува волјата на независните и на граѓаните да кандидираат свои кандидати.
„Сметам дека со тоа се зголемува можноста за избор на граѓаните и сметам дека треба да има кандидати. А ние, нормално, ќе се бориме со целиот наш демократски капацитет и со сите демократски инструменти за да ја добиеме довербата на граѓаните“, потенцира Филипче.
Претседателот на СДСМ најави дека СДСМ ќе води позитивна кампања.
„Ние нема да се спуштиме на тоа ниво. Ќе водиме добра, позитивна кампања. Ќе ги промовираме нашите кандидати и нашите добри политики. Ќе бидеме генерално фокусирани на локалните теми, но ќе се задржиме и на дел од централните теми, бидејќи сметаме дека е важно луѓето да знаат за кого гласаат“, истакна Филипче.
Тој потсети дека сите ветувања на ВМРО-ДПМНЕ од 2024 година останаа неисполнети.
„Ништо од тоа не е реализирано. Требаше да имаме подобри услови за преговори со Европа, но тоа не се случи. Албанија и Црна Гора не претекнаа, додека стандардот во Македонија стагнира. Не смееме да дозволиме повторно да се врати политиката на лажни ветувања,“ рече Филипче.
Македонија
(Видео) Филипче: Зад обвинувањата за дестабилизација Мицкоски го крие неуспехот на сопствените политики

„Премиерот подолг период наназад тврди дека јас, заедно со други, подготвувам некакви сценарија за дестабилизација и хаос. Тоа апсолутно не е вистина. До сега, ако навистина имало такви намери, ќе се случеше некаква дестабилизација, со оглед на тоа што премиерот постојано не обвинува за тоа“, рече денеска Венко Филипче претсседателот на СДСМ одговарајќи на новинарско прашање во седиштето на партијата.
Филипче тврдењата на премиерот ги оценува како неуспех од водењето на сопствените политики и немањето капацитет да се води државата.
„Причината е јасна, едноставно, тој нема со што да се пофали. Нема ниту еден успех кој може да го презентира, нема никаква добра политика. Сите гледаме што се случува во економијата – постои криза во буквално секој сектор. Евроинтегративниот процес е целосно заглавен, земјата назадува во поделби и меѓунационални тензии, што е исклучиво резултат на политиката што ја води оваа влада. Нема напредок ниту во образованието, ниту во земјоделството. Сите добри мерки и политики практично престанаа. Премиерот нема што друго да направи, освен да се обидува да создава впечаток дека постојат сценарија за дестабилизација“, изјави Филипче.
Притоа тој повтори дека ниту постои сценариот за дестабилизација, ниту размислуваме да постои. Потенцирајќи дека фокусот на партијата е насочена на борба со сите демократски механизми и инструменти против оваа ненародна и антидржавна власт.
Македонија
(Видео) Лефков: Сопругата на Апасиев фалсификувала биографија, кога лажат за тоа, за што сè ќе го лажат народот?

„Сопругата на Димитар Апасиев, која земала пари од владата на СДС, преку програмата Еразмус+, лажела за својот ангажман на настанот во Грција за кој земала пари“, вели Миле Лефков, пратеник и член на ИК на ВМРО-ДПМНЕ.
„Скандалозно е тоа што во својата биографија, Тамара Јованов Апасиева наведува дека на овој настан во Грција била „лектор и учесник“. Но официјалните документи кажуваат друго – била само учесник, а не и лектор.
Зошто сопругата на Апасиев имала потреба да лаже во својата биографија, и да си препише работи кои не ги правела?
Дали сопругата на Апасиев намерно пишала дека е лектор, за да земе повеќе средства или, пак, тоа го направила неосновано да ја збогати својата биографија?
Зошто сопругата на Апасиев лаже во својата биографија?
Димитар Апасиев кој се претставува за јак правник, треба да каже дали тоа што неговата сопруга лажела во својата биографија е фалсификат или измама?
Исто така, Димитар Апасиев како политичар, кој се бори за гласови треба да каже што се тој и неговата сопруга лажат, кога лажат за една биографија?
Како може народот да му верува на Апасиев, кој пред камери едно зборува, а зад камери трупал европски пари од СДС во џеб?“, прашува Миле Лефков, пратеник и член на ИК на ВМРО-ДПМНЕ.