Македонија
(Видео) Заев и Сугарески на увид во градежните работи на патот Битола – Демир Хисар
Премиерот Зоран Заев и министерот за транспорт и врски, Горан Сугарески, заедно со градоначалниците од регионот, денеска извршија увид на градежните работи кои се вршат при рехабилитацијата на регионалниот пат Битола-Демир Хисар.
„Еден ден пред големиот национален празник Илинден, имаме задоволство да го посетиме овој регион каде имаме повеќе активности. Рано наутро имавме настан каде доделивме персонализирани платежни картички за набавка исклучиво на ‘Еуродизел’ гориво за земјоделска механизација, со кои државата субвенционира 30 проценти од трошокот за гориво, за поттикнување и окрупнување на земјоделските производители. Заедно со министерот за транспорт и врски, Сугарески, сме тука за да видиме како напредуваат градежните работи за рехабилитација на регионалниот пат Битола – Демир Хисар”, рече премиерот Заев при увидот на патниот правец во должина од 10 км и ширина од 6.4 м, кој се возобновува со средства обезбедени од Светска банка во износ од 1.5 милиони евра.
Истовремено премиерот Заев спомена дека Владата продолжува со капиталните инвестиции и поддршки, како што беше и денешниот настан во Општината Битола, каде заедно со министерот за земјоделство, шумарство и водостопанство, Трајан Димковски, присуствуваа на доделување на 11 решенија за реализација на капитални проекти, во висина од 101.797.260 денари, преку Програмата за рурален развој.
„По денешниот увид во градежните работи на регионалниот пат Битола – Демир Хисар, слободно можам да кажам дека сме доста задоволни со тоа како тече рехабилитацијата. Досега се асфалтирани 7 километри, се работи на последните 3 километри и очекуваме во првата половина на месец август рехабилитацијата да биде завршена”, истакна министерот Сугарески подвлекувајќи дека Владата интензивно работи на остварување на еден од врвните приоритети, а тоа е изградба на квалитетна, модерна и функционална патна инфраструктура низ целата држава.
Премиерот Заев и министерот Сугарески најавија дека за следниот период е предвидена рехабилитација на дополнителни 12 километри на овој правец, а исто така предвидена е и рехабилитација на регионалниот пат Прилеп-Тополчани-Битола и државниот пат Битола – Меџитлија, каде се работи на дополнителни 40 километри патна мрежа во Битола и околината во текот на оваа и следната година.
Владините претставници го истакнаа значењето на развојот на овој регион, потенцирајќи дека изградбата на добра патна мрежа во Пелагонија не само што ќе ја олесни и унапреди работата на веќе постоечките компании, туку и ќе создаде услови за привлекување на нови инвестиции и економски раст.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Филипче: ВМРО-ДПМНЕ сака да ја врати Македонија во времето на страв и уцени
ВМРО-ДПМНЕ сака повторно да ја врати Македонија во времето на страв, на уцени и притисоци, но граѓаните нема да потклекнат, рече претседателот на СДСМ, Венко Филипче, на вечерашниот собир во Конче во поддршка на кандидатот за градоначалник од СДСМ, Благој Илиев.
Тој остро ги осуди притисоците врз граѓаните во текот на кампањата, потенцирајќи дека власта на ВМРО-ДПМНЕ се обидува да ги заплаши луѓето преку институциите.
„Со полиција, финансиска полиција, шумска полиција, преку социјалните служби, прават притисок врз граѓаните. Сакаат да потсетат на времето кога сите живеевме во страв и уцени. Но тоа време заврши. Луѓето сакаат нормален живот, без притисоци, без закани, без поткуп,“ рече тој.
Филипче повика на масовна излезност во недела и поддршка за кандидатот на СДСМ, Благој Илиев.
„Да излеземе во огромен број во недела и да го заокружиме бројот 5 за Благој Илиев, човекот кој работи за вас, не за себе. За Конче да продолжи да се развива“, рече Филипче.
Тој кажа дека градоначалниците од СДСМ реализирале 90 до 100 проценти од ветеното.
„Нема општина во која СДСМ има градоначалник, а да ветената програма не е завршена 90 или 100 проценти“, рече Филипче.
Тој истакна дека граѓаните најдобро ја чувствуваат разликата кога општините ги водат луѓе кои работат чесно и посветено во интерес на сите.
„Многу добро знаете како Благојче работеше во минатиот мандат, како се однесуваше додека беше градоначалник, дека вратата му беше секогаш отворена и дека работеше за доброто на општината и на вас, граѓаните“, порача Филипче.
Претседателот на СДСМ во своето обраќање нагласи дека токму оваа разлика меѓу одговорно и неодговорно владеење се гледа насекаде низ државата.
„Нема општина во држава во која што има градоначалник од ВМРО-ДПМНЕ, а да програмата е завршена повеќе од 20 проценти. Како да се натпреваруваат кој помалку ќе работи за граѓаните“, рече Филипче.
Македонија
Претседателката на ЛДП, Моника Зајкова, со поддршка на Горан Герасимовски за втор градоначалнички мандат
Претседателката на ЛДП Моника Зајкова, денеска даде поддршка за втор градоначалнички мандат на Горан Герасимовски, којшто воедно е и актуелен градоначалник на Општина Центар.
Таа, потенцира дека сега е моментот да се изберат резултати, одговорност и отчетност, а не празни ветувања, токму затоа ја дава поддршката на Горан Герасимовски, кој, според Зајкова, ја препознава граѓанската визија, има искуство и е подготвен да работи посветено за доброто на заедницата.
„Одејќи накај Собрание (бидејќи работиме на новиот Предлог- закон за комунална полиција), наидов на предизборните активности на кандидатот за градоначалник на општината во која живеам. Водејќи се од визијата дека на граѓаните им се потребни искусни луѓе кои испорачуваат резултати, а не изговори, упатувам особен повик до сите граѓани кои во првиот круг гласаа за кандидати кои не влегоа во вториот круг: Поддржете кандидат кој ги разбира вашите потреби, кој со своето искуство и посветеност ќе испорача повеќе резултати и веднаш ќе започне со работа – со завршување на започнатите проекти и реализација на нови решенија во интерес на сите нас. Затоа давам поддршка за луѓе како Горан – кои ја препознаваат граѓанската визија, имаат искуство и се подготвени да работат посветено за доброто на заедницата. Сега е моментот да избереме резултати, одговорност и отчетност, а не празни ветувања“, напиша Зајкова, на својата објава на Фејсбук.
Македонија
Утре сончево време со температура до 21 степен
Времето утре наутро ќе биде постудено со услови за појава на магла по одделни котлини и речни долини. Преку денот времето ќе биде сончево со мала до умерена локална облачност. Ќе дува слаб ветер од јужен правец, информира УХМР.
Минималната температура ќе биде во интервал од -3 до 4, а максималната ќе достигне од 16 до 21 степен.
Во Скопје, утрото постудено, во делови од котлината магливо. Преку денот времето ќе биде сончево со мала до умерена облачност. Ќе дува слаб југоисточен ветер. Минималната температура ќе се спушти до 2, а максималната ќе достигне до 18 степени.
Под влијание на висок воздушен притисок следува период на стабилно и суво време со постудени утра, а дневната температура ќе биде во пораст, особено во деновите од викендот. Претпладне по одделни котлини и речни долини ќе има услови за појава на магла

