Македонија
(Видео) Заев: СДСМ останува локомотива за напредокот на македонската држава
Со задоволство сакам да соопштам дека денеска СДСМ одржа успешен 26. Конгрес, а веднаш потоа и прва седница на новоизбраниот Централен одбор на партијата, изјави на вечерашната прес-конференција, претседателот на СДСМ, Зоран Заев.
Тој нагласи дека Социјалдемократскиот сојуз е како локомотива за напредокот на македонската држава и гарант за исправниот колосек кој, како што рече, води до подобра иднина за граѓаните.
„Денес СДСМ покажа силно, одлучно, вредно, социјалдемократско единство – СДСМ повторно покажа одговорност и државничко однесување. Тимот што победува не се менува, туку самиот го надградува и унапредува победничкиот менталитет. Таквата особина ја имаат државотворните партии како СДСМ“, истакна Заев.
Тој потврди дека на 26. Конгрес на партијата е избрана новата заменик-претседателка на СДСМ.
„Тоа е нашата другарка, Сања Лукаревска. Со нејзиниот избор, испраќаме уште една силна и недвосмислена порака: СДСМ е партија која гради човечки капацитети, родово рамноправна партија, која ги препознава и вреднува и младоста и квалитетот. Сања е еден од најсилните поддржувачи и спроведувачи на концептот Парите кај граѓаните, но и на редот и дисциплината во фискалните политики“, нагласи партискиот лидер.
Тој посочи дека новиот состав на Централниот одбор е освежен, однсно 2/3 од него се нови лица кои досега не биле членови на највисокиот орган на партијата, а остантите 1/3 веќе биле членови.
„Од 120 членови во новиот Централен одбор 60 се жени, 60 мажи – целосна родова еднаквост. Млади се 45 членови, што е застапеност од над 37,5 проценти, досега највисоко и кај нас во СДСМ и во било која друга партија во Северна Македонија. Подмладен значи и подобар СДСМ, прв во промените, прв во вредностите, носител на новото време. Младите се движечка сила на секоја партија, на секое општество“, порача Заев.
Тој нагласи дека меѓу членовите на ЦО има Македонци, но и припадници на албанската, турската, ромската, бошњачката, српската и влашката етничка заедница.
Заев информира дека Централниот Одбор денеска ја одржал и својата конститутивна седница.
„На седницата беа избрани претседавач на ЦО, членови на ИО на СДСМ, генерален секретар, организационен секретар, секретар за меѓународна соработка, како и четири потпретседатели на партијата. За претседавач на ЦО е избран Перо Костадинов, актуелниот градоначалник на Валандово. За членови на ИО се избрани: Ана Данева Маркова, Стефан Богоев, Нина Фити, Димитар Ковачевски, Милена Стефановиќ, Костадин Костадинов, Адријана Будимир, Благоја Бочварски, Рената Јајоска, Петре Шилегов, Софија Пејкова, Мухамед Зеќири, Мелиса Ценовска Серафимовска, Никица Бачовски, Тања Томиќ, Дарко Каевски, Јована Тренческа и Васко Ковачевски. Од 18 члена 9 се жени, 6 доаѓаат од младите редови на СДСМ“, истакна претседателот на социјалдемократите.
Заев потврди дека за генерален секретар на партијата е реизбран Љупчо Николовски.
„Партијата е во полн погон, а Љупчо ќе обезбеди уште позасилено дејствување на СДСМ како модерна, динамична, организирана, европска партија. И уште еднаш ја потврдуваме заложбата за уштепозасилена борба против корупцијата и криминалот, за ред, правда и дисциплина на сите полиња“, нагласи тој.
За потпретседатели на СДСМ, Централниот одбор ги избрал: Фатмир Битиќи, Мила Царовска, Оливер Спасовски и Венко Филипче, а организационен секретар назначен е Мартин Попов.
За секретар за меѓународна соработка избран е Бојан Маричиќ.
„Добивме нова свежина, нов полет кои заедно со искуството ќе придонесе за уште подобро функционирање на партијата во интерес на државата и граѓаните. Од 18 члена во ИО само 5 се од стариот состав, од четворица потпретседатели, двајца се нови“, нагласи Заев.
Претседателот на СДСМ подвлече дека заедно со новиот Централен одбор, Надзорен одбор, Извршниот одбор, но и со целото раководство, партијата и натаму ќе остане прва во промените.
„Сега заедно почнуваме ново четиригодишно поглавје, со јасно зацртани цели, пат на кој повторно ќе одиме заедно, храбро и одлучно. Тоа e патот напред за кој добро знаеме дека можеме да го пробиваме“, истакна Заев.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Стоилковиќ – Месаровиќ: Заедничка цел стабилен и економски поврзан регион
Заменик-претседателот на Владата на РС Македонија и министер за односи меѓу заедниците, Иван Стоилковиќ, денеска во Белград оствари работна средба со потпретседателката на Владата и министерка за економија на Р Србија, Адријана Месаровиќ.
На средбата се разговараше за повеќе теми, имајќи го предвид заедничкиот интерес на двете земји за натамошно унапредување и продлабочување на економската соработка, поттикнување на заеднички инвестициони проекти, како и за заеднички настап на трети пазари, во пресрет на македонско-српскиот бизнис форум кој ќе се одржи во Скопје на 3 декември.
„Бидејќи наша заедничка цел е интензивирање на економската соработка и зголемување на надворешнотрговската размена, денеска остварив мошне конструктивен состанок со потпретседателката на Владата на Р Србија, г-ѓа Адријана Месаровиќ. Бројките веќе покажуваат дека оваа година, и покрај сите предизвици, економската размена ќе биде поголема од минатата, имајќи предвид дека за првите девет месеци е остварена размена од повеќе од 1,1 милијарда евра, додека во 2024 година таа изнесуваше 1,4 милијарда евра“, истакна по средбата Стоилковиќ.
Тој додаде дека посетата претставува уште една потврда на континуираниот дијалог и партнерството меѓу двете земји, насочени кон стабилен, економски поврзан и европски ориентиран регион на Западен Балкан.
„Стопанствениците бараат соработка и нашата цел е да излеземе во пресрет на нивните барања и дополнително да ги поврземе. Со поддршка на претседателот на Владата на РС Македонија, г. Христијан Мицкоски, на 3 декември во Скопје ќе организираме голем Бизнис форум на кој ќе разговараме за понатамошно унапредување на соработката, пласман на македонските и српските производи на пазарите на двете држави, за што постојат сериозни потенцијали. Владата на Христијан Мицкоски води одговорна политика која носи конкретни резултати – стабилен економски раст, отворање на нови пазари и зајакнување на регионалната стабилност и поврзаност. Благодарение на таквите политики, нашите стопанственици ќе имаат сè повеќе можности за пласман на своите производи и услуги на други пазари“, изјави Стоилковиќ.
Средбата потврди дека меѓусебната соработка меѓу РС Македонија и Р Србија продолжува да се развива во духот на партнерство, доверба и заеднички интереси на економскиот и регионалниот план.
Македонија
Утре ведро и студено претпладне, преку денот сончево
Времето утре, наутро ќе биде ведро и студено, а во текот на денот сончево со мала до умерена локална облачност. Ќе дува слаб ветер од северозападен правец. Минималната температура ќе биде во интервал од -3 до 5, а максималната ќе достигне од 14 до 20 степени.
Во Скопје ќе биде сончево со мала до умерена облачност и со слаб северен ветер. Минималната температура ќе се спушти до 2, а максималната ќе достигне до 16 степени.
Во наредните денови Сседува период на стабилно и суво време со постудени утра и со услови за утринска магла по одделни котлини. Во текот на денот ќе преовладува сончево време со мала до умерена облачност. Дневните температури ќе бидат без значителна промена.
Македонија
Дел од корисниците на Центар утре без вода
Дел од корисниците на Центар, поради дефект, утре ќе останат без вода.
„Од ЈП Водовод и Канализација добивме известување дека на ден 13.11.2025 година, четврток, поради уличен дефект на ул. 8 -ма Ударна Бригада 39, прекинато водоснабдување ќе имаат корисниците на дел од истата улица,вклучително и објектот на Амбасадата на Италија. Водоснабдувањето ќе биде прекинато од 08:30 часот до завршување со санација на дефектот.(општина Центар)“, информира РЦУК.

