Македонија
(Видео) Заев: Со СДСМ македонската иднина е сигурна, безбедна, извесна

„Чест ми е што денеска, од мојата, од нашата македонска Струмица ја почнуваме кампањата на коалицијата ‘Можеме’, предводена од СДСМ. Поради заштитата на јавното здравје, ќе водиме една поинаква кампања и ќе ги повикаме сите граѓани да ги слушнат нашите решенија и да излезат на овие избори кои се особено важни за народот и државата да добијат легитимни и целосно функционални институции“, изјави лидерот на СДСМ, Зоран Заев, на стартот на изборната кампања.
„Во изминатите три години државата ја ставивме на правиот пат, на патот кој води напред, во НАТО, во ЕУ, патот кој носи јасен напредок и подобар живот. Од економија во минус каква што наследивме, денес имаме стабилна, развојна економија со постојани стапки на раст. Економија во која платите растат во сите сектори, а невработеноста се намалува. Имаме македонска економија која стои исправено пред налетот на кризата која ја предизвика коронавирусот. Со брзи, одмерени и економски мерки спасивме илјадници работни места, ја помагаме приватната потрошувачка и куповната моќ на граѓаните со пониски примања. Тоа овозможува шанса за брза и ефикасна трансформација на нашата економија. Затоа, сега е време за нови иницијативи, за нови потфати и успеси на кои се обврзуваме“, рече тој.
Заев додаде дека имаат план, модел, за успешно справување со последиците на корона-кризата, за уште посилен економски раст, уште поодговорни институции, како и мерки кои носат ред, правда и дисциплина.
„Градиме држава за достоинствен живот за сите. Инвестираме во македонското здравство, за уште поголема грижа за здравјето на граѓаните. Создаваме земја на слободни и одговорни луѓе, држава која ги решава проблемите на ефикасен и праведен начин. Држава која обезбедува почитување на законите и неселективна казнивост за криминалот. Остваривме врвен стратешки интерес, влеговме во НАТО. Почнуваме преговори за членство во ЕУ. Сега знаеме, сигурни сме дека го можеме тоа. Тоа носи сигурна иднина за сите нас и за сите наши деца и гарантиран брз економски развој. Со СДСМ, македонската иднина е сигурна, безбедна, извесна.
И нема кој не знае дека од другата страна е ВМРО-ДПМНЕ, предводена од Христијан Мицкоски, партија без став за ниту едно важно прашање, партија која не успеа да се промени и која и секој ден претставува опасност за државата“, додаде тој.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Почувствуван земјотрес во Македонија

Телеметриската сеизмолошка мрежа на Република Северна Македонија, на сеизмолошките станици инсталирани ширум нашата територија, одржувани од Сеизмолошката опсерваторија при Природно-математичкиот факултет во Скопје, попладнево во 16 часот и 14 минути регистрираше земјотрес чиј епицентар потекнува од епицентралното подрачје Тетово-Гостивар, 39 км западно од Скопје, со Рихтерова локална магнитуда, ML2.7.
Според досегашните податоци со кои располага опсерваторијата, земјотресот е почувствуван во Тетово, Гостивар и блиската околина со интензитет од III степени според Европската макросеизмичка скала.
Македонија
МНР: Амбасадата во Прага е во координација со семејството на Чифлиганец за пренeсување на телото во Македонија

Министерството за надворешни работи и надворешна трговија информира дека на 2 август 2025 година, до македонската амбасада во Прага била доставена информација за тешка сообраќајна несреќа во која бил повреден македонскиот државјанин Душко Чифлиганец. Тој управувал мотор кога дошло до незгодата, по што со тешки повреди бил пренесен во болница.
На 3 август, семејството го известило дипломатско-конзуларното претставништво дека Чифлиганец им подлегнал на повредите.
Како што соопштија од МНР, Амбасадата во Прага е во континуирана комуникација со семејството со цел завршување на сите неопходни формалности и организација за пренос на телото во Македонија.
Македонија
Изгаснат пожарот кај Липково, гори на две локации

До 12 часот активни се два пожари на отворен простор, еден пожар е под контрола, а еден е изгаснат.
Активните пожари се наоѓаат во село Богомила во општина Чашка, каде гори мешана шума, како и во село Грешница во општина Македонски Брод, во деградирана нискостеблеста шума, соопшти ЦУК.
Пожарот кој е под контрола е во село Стровија во општина Долнени, зад местото викано Гајдарец-Клепало, во нискостеблеста шума.
Пожарот што е изгаснат се наоѓа во село Слупчане во општина Липково, каде горела ниска вегетација.