Премиерот на Република Северна Македонија, Зоран Заев, ја почна официјалната посета на Романија со средба со романската премиерка, Виорика Данчила. Таа соопшти дека во Романија се почнати процедурите за ратификација на протоколот за пристап на нашата држава во НАТО, што е изгласано во Домот на пратениците. Во изјавата за медиуми таа рече дека очекува брзо заокружување на тој процес и дека земјава што побргу ќе биде 30. членка на НАТО.

Романската премиерка Данчила ја реафирмира позицијата за продолжување на проширувањето на ЕУ врз индивидуални заслуги за земјите од Западен Балкан. Таа изјави дека очекува дека во јуни ќе бидат потврдени политиките на проширување на ЕУ и охрабри нашата земја да продолжи со исполнување на реформските аргументи. Премиерката Данчила јавно му честита на премиерот Заев за неговиот придонес преку храброста и енергијата во големите процеси за нашата држава, што смета дека е инспирација за целиот регион, соопшти Владата.

Во изјавите за медиумите премиерот Заев рече дека носи искрени поздрави од граѓаните на нашата држава и од Владата.

„Во нивно и во мое име ви се заблагодарувам за вчерашната ратификација на протоколот за пристап во НАТО во Домот на пратениците на романскиот парламент и за сета ваша поддршка во процесот на НАТО-интеграциите на нашата држава. Особено ми е драго што сме во официјална посета на Букурешт и што посетата се поклопува со една важна фаза во ратификацијата на протоколот за влез во НАТО од страна на пријателска Република Романија. Пред 11 години, токму овде во Букурешт, беше пропуштена историската можност за влез на нашата држава во алијансата. Денес, на темелите на минатото изградивме иднина. Северна Македонија е на атлантскиот пат. Пријатели, благодариме“, порача Заев.

Освен за НАТО-интеграциите, премиерот Заев се заблагодари и за поддршката во европскиот пат на земјава. „Благодариме и што Република Романија за време на претседавањето со Советот на Европската Унија го одржува фокусот на проширувањето и ги мотивира заложбите на сите земји членки на ЕУ да ја поддржат земјава во европските аспирации. Без задршка, ќе ги пренесам очекувањата на Владата и на граѓаните на нашата држава, по отворените НАТО-перспективи, во јуни да ја потврдиме одлуката за почеток на преговорите со ЕУ“, рече премиерот Заев.

Тој објасни дека земјава е во процес на суштински реформи, дека има свест за важноста од имплементацијата на донесените закони и потребата да испорачаме резултати во клучните реформски области водејќи се од европските принципи и вредности. Дека направивме пресврт во политичката клима во државата, а ја поставивме земјава на јасен демократски пат како едно општество за сите во државата.

„Презедовме храбри и внимателни политички чекори со кои ги постигнавме договорите, прво со нашиот сосед, Република Бугарија, а потоа и со нашиот сосед Република Грција. Договорот од Преспа, што го реализиравме, денес е пример дека се можни решенија на најчувствителните билатерални политички прашања“, нагласи премиерот Заев. Тој додаде дека е значајно што со премиерката Данчила е постигната согласност за унапредување на економската соработка и можноста за одржување бизнис-форум.

„Интересот на инвеститорите за вложувања во нашата земја расте. А како две пријателски земји, кои немаат отворени политички прашања, имаме можност да се посветиме на економијата, она што е во директен интерес за граѓаните на нашите држави. Тоа ќе го направиме и со договорот меѓу двете влади за соработка во образованието, науката, културата, медиумите, младите и спортот, што е во завршна фаза за ратификација во нашето Собрание“, наведе премиерот Заев.

Таа упати честитки за отворените НАТО-интеграции и за крупните политички чекори направени за кус временски период и рече дека Романија сака да ја види земјава како еднаква членка на НАТО.
На билатералната средба упатени се честитки за целиот прогрес на нашата земја за НАТО со надеж дека европскиот пат ќе биде реалност и дека тоа би бил најсреќниот момент од работата на романското претседателство. На состанокот се разговараше и за поконкретни иницијативи во меѓусебната соработка во областите на енергетиката и одбраната.

Средбата на ниво на делегациите беше реализирана на високо владино ниво. Од страна на Романија, освен премиерката, беа и министрите за надворешни работи, за одбрана, за дијаспора. Премиерот Заев, пак, е придружуван од заменик-претседателот на Владата за европски прашања, Бујар Османи, и заменик-министерот за надворешни работи, Андреј Жерновски. Попладнево предвидени се средби на премиерот Заев и делегацијата со претседателот на Домот на пратениците, Ливиу Драгнеа, како и со заменик-претседателот на Сенатот на Романија, Јулијан Клаудиу Манда.