Македонија
(Видео) Зајкова: Свртете се во салата и погледнете колку колеги мажи има присутни

Секој 8 Март е симбол за подарок цвет како израз на почит кон жените, но исто така и потсетник за нашата упорна борба за економска, политичка и социјална рамноправност со мажите. Важно е да разбереме дека треба да работиме заедно секој ден, за да се осигури дека жените се чувствуваат важни, издигнати и почитувани секој ден, а оваа година им порачувам на сите мажи и жени секој ден да биде 8 Март, потенцира денеска во Собранието претседателката на Либерално-демократската партија (ЛДП) и пратеничка, Моника Зајкова.
-Свртете се во салата и погледнете колку колеги мажи има присутни! Да не дозволиме само еден ден во годината жените да се чувствуваат важни, издигнати и почитувани, а останатите 364 дена предмет на вербално и физичко насилство. Трнливиот пат кој што сме го поминале низ историјата е доказ за нашата сила, упорност и истрајност. Своевиден потсетник дека можеме да издејствуваме промени и дека сме способни да ги надминеме разликите за доброто на нашата држава. Во моментов, во нашето општество постои поделеност на леви, десни и централни партии, но жените се тие коишто треба да ги надминат разликите и да работат заедно за доброто на граѓаните, а не само да ја следат партиската идеологија, на што за жал се повеќе сведочиме. Покажавме дека знаеме како да бидеме храбри, одлучни и добри лидерки, додаде таа.
Зајкова истакна дека борбата против родово насилство и дискриминација се уште трае и бара нашата посветеност и труд за нејзино целосно сузбивање, а според неа важно е сите заедно да работиме на мотивирањето и поттикнувањето на учеството на жените во бизнис заедницата, како и на изедначување на нивните плати со мажите.
-Со влегувањето во политиката, сакав да послужам како пример за младите жени и да им покажам дека можеме да придонесеме многу за општеството. Борбата за родова еднаквост е борба на сите нас. Таа ќе продолжи додека секоја жена не биде еднакво почитувана и вреднувана како интелектуално развиено битие, а не само за исполнување на квотата- жена, рече Зајкова.
Таа исто така испрати порака дека треба да работиме на едукацијата, да ги учиме децата дека и жените можат да бидат војници и мажите шминкери и да придонесеме кон рушење на закоравените стереотипи дека има поделба на „машки” и „женски” професии, да го ослободиме нашето општество од оковите на патријархалното општество и да започнеме да го негуваме духот на либерализмот и зајакнување на моќта на индивидуата.
Ова обраќање на претседателката на ЛДП, Моника Зајкова, служи како силен потсетник на значењето на Меѓународниот ден на жената и потребата од континуирана борба за родова еднаквост.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Фото) Спречени обиди за криумчарење лекови и медицински материјали

Царинската управа извести за спречени обиди за криумчарење лекови, стоматолошки материјали, очила со диоптер, поголема количина цигари, мотоцикл, УПС уреди за напојување со електрична енергија и друга стока во текот на изминатите денови/
· Спречен обид за криумчарење лекови на граничен премин Деве Баир. Запленети се пет парчиња ампули Genotropin GoQuick од 12 mg што се употребуваат при недостаток на хормонот за раст, 50 вијали Dysport, раствор за инјектирање, коишто се употребуваат при цервикална дистонија и други медицински цели, чиј внес во државата подлежи на посебни дозволи од надлежни институции и истиот е строго регулиран. До сторителот од страна на Секторот за контрола и истраги е поднесена кривична пријава. Случајот го открија царинските службеници на влез во државата на граничен премин Деве Баир при контрола на автобус кој сообраќал на линија Македонија – Турција – Македонија. При тоа во торбата на возачот покрај лековите, пронајдени се и 20 кутии со 170 кг мед, 177 парчиња чоколада, три килограми чај, како и над 40 парчиња фармерки со ознаки на заштитени марки.
Мобилен тим заплени над илјада парчиња стоматолошки материјали меѓу коишто, прибор за импланти, материјали за изработка на круни и мостови, материјал за пломбирање заби, средства за белење заби, стоматолошка гума и други стоматолошки материјали. Истите се откриени на влез во државата на граничен премин Богородица при контрола на автомобил со кој патувал македонски државјанин. Сторителот, инаку македонски државјанин, без да ја пријави стоката чиј внес е строго регулиран и подлежи на посебни дозволи, сакал да ја криумчари во државата. Против него е поведена соодветна постапка, извести Царинската управа.
· Запленети над 600 парчиња очила со диоптер за кои увозник не поседувал дозвола за увоз. Случајот е откриен во царинска испостава Гевгелија при контрола на разна стока со потекло од Кина којашто била пријавена за увозно царинење.
Службата за мобилен скенер на граничен премин Табановце спречи и обиди за криумчарење на УПС уреди што се користат за непрекинато напојување со електрична енергија. Истото е откриено при скенирање на камион како и извршена контрола, при што во кабината се откриени две парчиња УПС уреди „Делта МХ“. Во друг случај при контрола на камион со бугарски регистарски таблички запленети се и околу 300 парчиња облека, коишто биле скриени на различни места во возилото.
Македонец се обидел преку граничен премин Табановце нелегално да внесе шест илјади евра, како и поголема количина облека, но и обувки, чанти и паричници коишто сакал да ги шверцува без за нив да плати давачки. Во истото е спречен од царинските службеници кои поради сомневање го застанаа автомобилот со кој патувал за детална контрола при што е пронајдена непријавената стока. Патникот со себе носел 16 илјади евра, при што согласно Законот за девизно работење вратени му се десет илјади евра, а останатите се запленети. Покрај тоа во багажниот простор во неколку торби е пронајдена и останатата непријавена стока, меѓу која околу 100 парчиња облека, седум пара обувки, две чанти и два паричници, при што истата е запленета. Против него ќе биде поднесена соодветна пријава.
Царинските службеници на граничниот премин Табановце спречија и обид за шверц на мотоцикл за крос, пронајден во автомобил со германски регистарски таблички со кој патувал македонски државјанин. При контроли на граничниот премин откриени се и обиди за шверц на 20 парчиња каиши за затегнување стока печатач, над 70 парчиња облека, делови од уреди и друга стока што патниците не ги пријавиле на влез во државата, со цел избегнување плаќање давачки.
На граничниот премин Табановце е откриен и случај на прекршочно дело каде патник се обидел нелегално да внесе над две илјади парчиња разни предмети со религиозен карактер (дрвени крстови, плетени бројаници, бројаници од монистри и метални и дрвени приврзоци). Случајот е откриен при контрола на автобус кој сообраќал на релација Белград-Уранополис, при што во торбата на патникот е откриена непријавената стока.
· При контрола на три камиони и еден автомобил на влез во државата на граничниот премин Богородица се запленети 58 штеки цигари. Возачите на камионите ги скриле штеките на цигари на различни места, под душекот на креветот, во преградата за алат, но и во филтерот за воздух. Во сите случаи на контрола, царинските службеници успешно ги открија намерите на возачите, при што се спречени во обидите за криумчарење на цигари. Од почетокот на годинава до сега севкупно на ниво на цела царинарница Гевгелија запленети се 700 штеки цигари.
· Над дванаесет парчиња употребувани делови за возила, како и нова пумпа за кочење за товарни возила, се пронајдени во багажникот на автомобил со косовски регистарски таблички, со кој косовски државјанин се пријави за влез во државата на граничниот премин Дојран. Против патникот ќе биде поведена соодветна постапка, се наведува во соопштението на Царинската управа.
Македонија
Новоименуваниот амбасадор на Австралија на средба со претседателот на ЗЕЛС, Ѓорѓиевски

Градоначалникот на Општина Кисела Вода и Претседател на ЗЕЛС, Орце Ѓорѓиевски, вчера оствари средба со новоименуваниот, вонреден и ополномоштен амбасадор на Комонвелтот Австралија, со седиште во Белград, Питер Џорџ Трасвел. Средбата се реализираше по предавањето на акредитивните писма на амбасадорот на Претседателката Гордана Сиљановска-Давкова и неговата средба со државниот врв.
Разговорот, кој се одвиваше во конструктивен дух, претставуваше можност за размена на информации и воспоставување на понатамошна соработка. Градоначалникот Ѓорѓиевски ја претстави Општина Кисела Вода како една од најбрзо развивачките урбани средини во државата, при што го запозна амбасадорот Трасвел со развојните политики, инфраструктурните инвестиции и плановите за економски раст, со посебен акцент на индустриските зони и поволностите што општината ги нуди за привлекување странски инвестиции, извести општина Кисела Вода.
Амбасадорот Трасвел пројави особен интерес за економските потенцијали на општината, при што се разговараше за можностите за зголемување на соработката, особено имајќи ја предвид бројната македонска дијаспора во Австралија, која, како што беше истакнато, претставува значаен мост за идни партнерства и инвестиции.
Во разговорот беше отворена и темата за природниот прираст и демографските предизвици, при што градоначалникот Ѓорѓиевски ги презентираше активните мерки на Општина Кисела Вода насочени кон спречување на миграцијата и задржување на младите. Посебно беа истакнати покачувањето на вредноста на ваучерот за новороденче, кој сега изнесува 12.000 денари, како и мерката за ослободување од комунална такса за изградба на индивидуални куќи за млади лица. Овие мерки, како што нагласи Ѓорѓиевски, претставуваат важен дел од стратегијата за демографска обнова.
Амбасадорот Трасвел пројави особен интерес и за процесот на дигитализација, преку кој Општина Кисела Вода се позиционираше како лидер во регионот. Ѓорѓиевски истакна дека дигитализацијата придонесува за зголемена транспарентност, ефикасност на административните процеси и значително намалување на можностите за корупција. Во таа насока, беше посочено дека се работи на воведување нови дигитални услуги, со цел понатамошно олеснување на секојдневието на граѓаните и подобрување на деловната клима.
Двајцата соговорници изразија подготвеност за идни комуникации и соработка, со цел унапредување на односите меѓу локалната самоуправа и австралиските институции, со фокус на економски развој, дигитална трансформација и поддршка за младите, соопшти општина Кисела Вода.
Македонија
Изменет режим на сообраќај на автопатот во изградба Охрид-Кичево

СВР Охрид известува дека, поради поставување сообраќајна сигнализација и сообраќајна опрема на автопатот во изградба Охрид-Кичево, поставена е девијација на дел од делницата Песочани-Требеништа и Ново село-Ботун.
Тука сообраќајот се одвива по левата коловозна лента гледано од правецот Кичево-Охрид.
Поради интензивирање на градежните работи, сообраќајот од раскрсницата „Петња-Распаќе“ кај Охрид, до селото Подмољје, ќе се одвива по регионалниот (стариот пат) Охрид-Струга.
„Апелираме до возачите на патнички и други моторни возила, на крајна внимателност при движењето на овие патни правци и доследно придржување до поставените сообраќајни знаци“, велат од СВР Охрид.