Македонија
(Видео) Коалицијата „Храбро за Македонија“ ги поднесе листите за кандидати за пратеници до ДИК

Коалицијата „Храбро за Македонија“ денеска до Државната изборна комисија ги поднесе листите за кандидати за пратеници во Собранието на Република Македонија.
„Коалицијата „Храбро за Македонија“ ја поднесува оваа листа во која учествуваат Граѓанската опција за Македонија, Интегра и Партијата за целосна еманципација на Ромите. Ние сега имавме Централен одбор на којшто без било каква забелешка, едногласно беше усвоена оваа листа и во исто време сакаме да кажеме дека ја предаваме оваа листа во којашто имаме и доктори на науки и угледни доктори, имаме хирурзи, луѓе од различни области кои можат да бидат вистински репрезенти на граѓаните од нивните средини. Она за што овие шест листи ќе се залагаат за реформа на образованието, реформа на здравството и реформа на јавната администрација“, изјави лидерот на ГРОМ и кандидат за претседател на државата, Стевчо Јакимовски.
„Коалицијата „Храбро за Македонија“ на ГРОМ, Интегра и ПЦЕР, со кандидатските листи кои денеска ги поднесуваме и со програмската платформа со којашто ќе се појавиме на изборите, очекуваме да биде сериозен катализатор на процесите на политичката сцена во Македонија. Очекуваме дека третиот, нов пат, ќе изненади овојпат, очекуваме и дека ќе изненадиме со нашите цели во програмската платформа, ќе таргетираме извонредни критични точки во општестото, во политичкиот систем и се надеваме дека ќе го покренеме гласачкото тело и овие моќни 53% неопределени конечно ќе мора да сфатат дека со заокружување на гласачкото ливче ја креираат својата судбина, судбината на своите семејства, на своите деца и своето потомство и се надеваме дека ќе имаме сериозен одзив на овие избори“, кажа Љупчо Ристовски, лидер на Интегра.
„Јас сум пресреќен што овие кандидати ќе го поддржуваат Законот за извршување и ќе вложат максимален труд, доколку нормално вие ги изгласате, а би требало да ги изгласате бидејќи се засегнати граѓаните. На оваа листа се чесни луѓе и оваа коалиција ја поддржува таа иницијатива. Затоа сме денеска сите тука заедно, да поддржиме, да го подобриме животот на граѓаните и да извршителите ги пратиме кадешто им е местото, односно да не бидат тука, туку да се вратат сите извршители во судот и да почне да се спроведува Законот. Со овој стил на работење, извршителите го упропастија народот, имаме 500.000 жртви, починати од стрес поради тие дејствија на извршителите. Затоа сме денес тука, бидејќи оваа коалиција ја поддржува нашата ангажираност и нашите активности во делот на извршувањето во Република Македонија“, кажа Самка Ибраимоски, лидер на ПЦЕР.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Сиљановска Давкова: Не сум се фотографирала со восочни фигури на Доналд и Меланија Трамп

Фотографијата објавена на моите официјални профили на социјалните мрежи, на којашто сум заедно со претседателот на САД, Доналд Трамп, е автентична и направена во Њујорк за време на свечениот традиционален прием организиран од претседателот Трамп и неговата сопруга, Меланија Трамп, реагираше претседателката на државата Гордана Сиљановска – Давкова.
– Написите на одредени медиуми дека станува збор за фотографија со восочна фигура се целосно неточни, злонамерни и со јасна тенденција за дискредитација, вели таа.
Сиљановска – Давкова упати апел до медиумите за професионално, одговорно и чесно информирање на јавноста, со почитување на вистината како највисок демократски принцип.
Македонија
Денес дожд и температура од 13 до 21 степен

Времето во текот на денот се очекува да биде претежно облачно со повремени врнежи од дожд, наместа пообилни, проследени со ретки грмежи.
Според синоптичарите, ќе дува слаб со умерен ветер од југоисточен правец. Минималната температура ќе биде во интервал од 8 до 15, а максималната ќе достигне од 13 до 21 степен Целзиусов.
Во Скопје, се очекува претежно облачно со повремени врнежи од дожд. Според најавите, ќе дува слаб до умерен јужен ветер. Минималната температура ќе се спушти до 14, а максималната ќе достигне до 19 степени Целзиусови.
Локални врнежи од дожд се најавени и за утре, а потоа во следните два дена да биде претежно стабилно.
Од четврток се очекува нов влажен и постуден бран со пообилни врнежи од дожд и со значително опаѓање на температурата.
Македонија
Сиљановска Давкова објави дека се фотографираше со Доналд и Меланија Трамп

Претседателката Гордана Сиљановска Давкова на својот Фејсбук-профил објави дека ѝ претставувало чест да присуствува на приемот што го приредија претседателот на Соединетите Американски Држави, Доналд Трамп, и неговата сопруга Меланија Трамп, по повод 80. Генерално собрание на Обединетите нации.
Во објавата таа истакна дека во овие турбулентни времиња е важно да не се отстапува од демократските вредности и да се работи заеднички на зачувување на глобалниот мир и безбедност, додавајќи дека САД остануваат искрен сојузник на Македонија.
„Благодарност за гостопримството!“, напиша Сиљановска Давкова.